Pa mak CK Vineeth

Indian footballer te zinga chanchin mak danglam tak nei thin CK Vineeth a che leh a, a thiante’n ISL an khelh mup mup laiin India ram hmun hrang hrang fangin ni 60 chhung zet a zinkual tawh !

“Keimah in enletna hun neih ka duh a ni ber mai. Ka pa pawhin mahni chauha ka kal chhan min zawt a, mahse darkar khat chauh ka inngaihtuah. Ka social media account zawng zawng ka titawp a, kalna tur bik pawh nei loin ka inkhalhchhuak tawp mai a ni,” tiin a sawi.

Kum 32 a upa hian December ni 23 khan Goa atangin Kerala – a an khua Kannur a pan a, heta tang hian Karnataka, Maharashtra, Agra, Delhi, Punjab, Kashmir leh Himachal Pradesh – ah te zin kual tawhin Manali atangin an khaw lamah haw tumin a inbuatsaih mek a ni. Zin nan hian Mahindra Thar a hmang a, km 15,000 chuang a inkhalh kual tawh.

CK Vineeth hian Bengaluru FC, Kerala Blasters leh Chennaiyin FC tan hlawhtling takin a lo khel tawh a, tun season tan dawn khan Jamshedpur FC chhuahsanin East Bengal a zawm a, ISL club thar tan hian vawi hnih chauh a inlan hman tihin ‘loan’ a chhuahtir an tum a, khelmual chhunga kir leh vat ai chuan intihharh nan chawlh lailawk a thlang ta a ni.