Post Ziah Dan

1. Registration: A hmasa berin ZoFooty-a thil post tur chuan account neih phawt a ngai. Website chunglam dinglamah in register-na leh in register hnua in sign in-na a awm ang. Football tuimi tawh phawt chu a in register theih reng a ni.

 

 

 

 

 

2. Log In: I in register zawh hnuah “Log in” tih kha i click dawn a ni.

 

 

 

 

 

3. Log In Page: I “username” leh “password” kha type la, log in tih kha click rawh le.

 

 

 

 

 

 

 

 

 

4. Dashboard: I username leh password a dik chuan a hnuaia page hi a lo lang ang. Posts button kha i click dawn nia.

Hetah hian post awm zawng zawng, post chhuah tawh te, publish mai tura peih tawh (scheduled) te, admin ten endik nghak mek (pending review) te leh endik tura a ziaktute’n an la dah loh (draft) te a lo lang ang.

 

 

 

 

 

 

 

 

 

 

5. Ziak Rawh Le: Posts tih hnuaiah khan Add New tih a awm ang. Click la, post thar chu i ziak thei dawn a ni.

 

 

 

 

 

 

6. Read More: Post kan ziahin kan dah hmaih miah loh tur chu Read More tag tih hi a ni. He tag hmang hian home page-ah kan thil ziah paragraph hnih-thum vel chiah a lang anga, a bak zawng chhiar tur chuan Read More tih button click theih turin a lo awm dawn a ni. A tlangpuiin paragraph hnih hnu velah i dah thin dawn nia.

 

 

 

 

 

 

 

 

 

 

 

 

7. Save Draft, Preview, Catagory, Tags & Submit for Review: A hnuaia picture tarlan ang hian i post kha dahthat rih i duh chuan Save Draft kha i click dawn nia. I publish hnua a lan dan tur en i duh chuan Preview tih kha click ang che. Eng Category hnuaia awm tur nge tih kha i thlang nghal bawk dawn nia.

Post kan ziahin Tags hi theihnghilh loh a tha ang. Tag hmang hian i post kha midang tan zawn a awl dawn a ni.

I duhthusama i ennawn hnuah Submit for Review tih kha i click leh anga, tichuan ZoFooty admin te’n remchang hmasa berah an lo publish dawn a ni.

Post Ziah Dawna Hriattur Pawimawhte:

I. Mizo Tawng

a) Mizo Tawnga thil kan ziah hian tihsual a awl em em a, member te kan fimkhur theuh dawn nia. Spelling dik lo a tam lutuk hian midang tan chhiar a hahthlak a, kan thil ziah hlutna a tihhniam phah a ni.

b) Kan thil post reng reng hi SMS a ni lo tih kan hre theuhva, chuvangin Mizo Tawng tluangtlam pangai hman ngei i tum ang u (Entirnan: “kn t dn nia” aiah “kan ti dawn nia”, “ponah an inkhl a” aiah “pawnah an inkhel a”, etc).

c) Ziah zawm leh zawm loh turah hian kan fimkhur lehzual a ngai. Entirna tlem lo tarlang ila:

i) Sentence tawpah “ani” tih aiah “a ni” hman zawk tur.

ii) “Ah” tih hi sap tawng thumal hnunga kan dah a nih loh chuan a hma chiaha thumal nen khan ziah zawm tur. Sap tawng kan hmang a nih erawh chuan “-” (hyphen) a inkarah dah mai tur. Entirnan: “Inchhungah ball an sep”, “field-ah an inkhel”. Thil ak sawi nan kan hmang a nih erawh chuan ziah zawm loh tur a ni. Entirna: “Bag ah dan i thiam lo vem ni?”

iii) “Lo” tih hi a hma chiaha thumal nen ziah zawm miah loh tur. Entirnan: “Lala chu a inkhel thiam lo”, “Liana te an lo kal”, “Ka thianpa lo chu zau tak a ni”.

d) Mizo Tawnga “tri” (T hnuaia dot chhut) hi awlsam taka dah mai a harsat avangin a aiah “T” pangai hi hman mai tur. “Tri” han tih deuh kher a ngai lo. Entirnan: “Trawng”, “trial”, “trul” tih loh tur.

II. Punctuation

a) Sentence tawpa fullstop (“.”) emaw exclamation mark (“!”) pakhat aia tam kan dah dawn a nih chuan pathum (3) chiah hman tur. Entirnan: “Ball pet ringawt a rilruah a lang a…”, “Mapuia’n a pet goal!!!”. Pahnih emaw, pali leh aia tam hman loh tur.

b) “Lawman a khalh tlang” tih aiah “Lawma’n a khalh tlang” (“Lawma” leh “n” inkarah apostrophe dah mai tur).

c) Punctuation marks (comma, fullstop, semicolon, etc) zawhah space dah zel tur a ni.

III. Source

a) Mi thuziak kan la chhawng a nih chuan a source emaw, a ziaktu hming/lehkhabu tarlan thin tur. Website dang ami a nih chuan a link dah tel thin a tha.

b) Hetianga website dang ami thuziak kan lak chhawn reng rengin a vai vaiin “copy-paste” loh tur; paragraph tlem azawng post la, a bak chhiar zawm theih turin a link dah mai tur a ni.