Paolo Rossi – thim ata engah

Italian football chanchina match-fixing scandal turu ber pawl, Serie A club 8 leh Serie B club 5 zet inhnamhnawihna ‘Totonero betting scandal‘ an tih maiah inhnamhnawiha puh a nih avangin football khel thei lo turin kum hnih ngawt hrem ni mahse 1982 World Cup-a a thiltih ropui tak avangin kar hmasa December ni 9 a cancer natna vanga boral ta Paolo Rossi kha Italian mipuite tan chuan ‘hero’ a ni kumkhua tawh ang.
 
Rossi hian club lamah Vicenza leh Juventus tan hming a chher hle a, Serie B leh Serie A – ah a kum zawn a top scorer ni thei hmasa ber a ni. Club lamah Serie A nomawi 2, Coppa Italia, European Cup, European Cup Winners’ Cup leh UEFA Super Cup thlengin a chawi thei a, a hlawhtling hle. Mimal chawimawina lamah pawh European Cup top scorer, Ballon d’Or(1982), World Soccer Awards Player of the Year (1982) tih angreng a dawng nual.
 
A chanchina ngaihnawm ber zinga mi erawh 1982 World Cup kha a ni. Kum 26 a upa, a vanglai hmang mek Paolo Rossi chu ‘Totonero betting scandal’ vangin kum thum chhung hrem a ni a, a appeal hnuah a hremna hi kum hnih atan pawh tawi a ni. World Cup tan nan thla 2 chauh a awm tawh a, heng hunlai hian Italy hi champion tura rinkai an ni lo. World Cup – ah tak phei chuan kum 1938 hnuah an la champion leh lo.
 
Kum hnih atana hrem tawk Rossi chuan a hremna a hmang zo a, a inkhelh ngai miau loh avangin national team – ah a tel phak a beiseiawm loh. Mahse, sawiselna nasa tak karah Italy coach Enzo Bearzot chuan a ring lui tlat a, World Cup khelhna tur Spain – ah a hruai ta.
 
Rinlawk ang ngeiin Rossi a che tha lo a, sawiselna a nasa hle . Game 3 an khelh hnuah beiseiphak bakin Rossi a ‘che’ ta, 3-2 a team tha Brazil an hnehnaah hattrick a siam ! Hemi hnu hian semi-final – ah Poland lakah goal hnih thunin final – a West Germany 3-1 a an hnehnaah goal hmahruai a thun bawk. Kum 1938 hnua a vawikhat nan Azurri in World Cup nomawi an chawi a, Rossi hian Golden Ball leh Golden Boot a dawng kawp ! Garrincha (1962) leh Mario Kempes (1978) te nen champion nomawi chawi chunga mimal chawimawina pahnih hui thei awmchhun an ni.
 
Kum 1986 World Cup khel turin koh ni leh mahse hliamin a tlakbuak vangin a inlan thei ta lo a, kum 30 mi lek niin Italian striker ropui chuan inkhelh a chawlhsan ta a ni.
 
Chutiang mi ropui, harsatna tam tak a paltlang hnua rampum ‘hero’ ni leh thei chu nimin khan Vicena khawpuiah vuiliam a ni a, a kuang zawntu zingah 1982 World Cup – a a teammate Marco Tardelli, Antonio Cabrini, Giancarlo Antognoni, Alessandro Altobelli, Franco Causio, Fulvio Collovati leh Giuseppe Bergomi te an tel.