Pathianni pual… – Ema

Estimated read time 3 min read

“Kum 16 mi ka nihin Isua Krista tâna nung turin ka inhlân a. Kristian chhungkua aṭanga seilian ka ni lova, football khêl tura enkawl seilen ka ni deuh tawp mai,” tiin Ballers in God dintu Crystal Palace leh Tottenham Hotspur midfielder hlui John Bostock chuan Kristianna kawng a zawh tirh a sawi a.

Crystal Palace academy-a a awm laia FC Barcelona in kum 10 daih contract an lo zawrh ngat tawh khawpa rawlthar a nih laia beiseiawm ni ṭhin Bostock chuan a chanchin sawi chhunzawmin, “Chutiang football khêl tur ngawr ngawr chauha ka inngaih laia Isua Krista’n ka nuna hna a han thawk chu Kristian, football khêl ve chauh zâwk ka ni tih ka in hrechhuak a. Chutah chuan ka talent dawn chu keima tâna hmang lova talent min petu Pathian ropuina zâwka hmang turin thutlukna ka siam ta a ni,” a ti.

Rawlthar a nih laia Barcelona mai bakah Real Madrid, Inter Milan, Manchester United, Chelsea leh Liverpool te pawhin an ngaihven êm êm Bostock chuan chutianga club lian leh hmingthang tak takten an ngaihven lai chuan Pathianin kawng danga a hruai thu a sawi a –

“Pathian chuan kawng zawh ka tum mêk, kawng nuam tur ni a ka hriat aṭangin min hruai kawi a, nuam ka tihna kawng ni lovah min hruai ta a. Pathian ta kan nih chuan tihkeh kan ngaihna laiah Pathian hian min lo tikehsawm nasa ṭhin khawp mai a, hei hi thil nuam tak pawh a ni lo.

“Kum 21 ka nihin Spurs ka chhuahsan a, mahni inrintawkna ka tlachham êm êm a. Pathian hnenah ka ṭawngṭai a, ‘Lalpa, football hi chawlhsana I tana rawngbawl tura kal a ṭul a nih chuan ka kal mai ang’ tiin.

“Chutah chuan Pathian Thlarau Thianghlim chuan, ‘Tunah chuan i inpeih ta e. I thil hmangaih ber kalsan huam khawpin rilru i siam thei ta a, i inpeih tawh e’ tiin ka thinlungah thu a rawn sawi a ni.”

Doncaster Rovers midfielder kum 30 mi Bostock hian Kristian footballer a theih ang angte huikhawmin Ballers in God chu a kalpui a. Podcast te siamin hetah hian footballerten an Kristianna nun te, anmahni a rinna in hna a thawh dânte an sawi ṭhin a ni.

Ballers in God podcast-ah hian Arsenal forward hlui Benik Afobe, Manchester United hmatawng hlui Idion Ighalo, Newcastle United midfielder hlui Gael Bigirimana leh Tottenham Hotspur academy winger hlui Paul-Jose M’Poku ten an ‘testimony’ an lo puangchhuak tawh a ni.

“…in tih apiangah pawh Pathian ropuina tûr hlîrin ti rawh u.” (1 Korinth 10:31)

C Tlanthianghlima

Football tui ve tak

You May Also Like

More From Author