Manchester City executive Patrick Vieira chuan Premier League title race boruak ti lum hat thei tur ṭawngkam a nei leh ta a, Manchester United chu Old Trafford-a referee puihna dawng ṭhin nia sawiin, hei hi an hlawkpui hle a ni a ti.

Thawhṭanni khan Old Trafford-ah Manchester United in Fulham an mikhual a, kha match ah khan huntâwp dawn ṭepah Fulham player chu penalty box chhungah tihtluk a ni a, mahse referee in penalty a pe lo. Man United 1-0 in an chak a, Premier League-ah point 3 in hma an hruai zui a nih kha. Ni hnih a liam a, Vieira a ṭawngchhuak ta chiah a ni.

Vieira chuan, “(Manchester) United in home game an khelh chuan team dangin kan neih ve loh ‘advantage’ an nei bik ṭhin. United, Madrid, Barcelona leh Milan te an home a khelh an harsat em em chhan pakhat chu referee te vang a ni. Hetiang ‘hamṭhatna’ hi chu team lian, chak ngun deuh hian an nei duh tlangpui a, keini pawhin kan duh ve a nih chuan kan chak deuh reng a ngai dawn a ni.” tiin BBC Sport a hrilh.

Champion kan phû ber

Vieira hian a la duhtawk lova, Manchester City chu team ṭha ber an nih thu sawiin, Premier League champion nih pawh an phû ber tih a sawi. Vieira chuan Manchester a Soccerex conference ah thusawiin, “Tun hi kan ropui hun a ni. Kumtir aṭangin team ṭha ber kan ni a, kan khel ṭha ber bawk a, he club hian champion a phû a ni.” a ti.

Vieira hian Manchester United dinhmun ṭhat zia a hmuhhmaih bik lova, an ṭhenawmte chu champion tura beiseiawm ber an nih thu a sawi bawk.

Rio Ferdinand a ngâwi lo

Vieira thusawi puanzar a nih hnu lawkah twitter lama tam ve tak, Manchester United defender Rio Ferdinand chuan tweet a nei nghal a, kar khat chhunga Man United chungchang sawia ṭumhnih ṭawngchhuak tawh Vieira chu United vei lutuk duh lo turin a ti. Hei hi a tweet chu a ni.

“Why is Viera so concerned with Man Utd….2 comments in a week or so….c’mon maaaaaan let it go,”

Ben Arfa penalty hre reng rawh

Thawhṭannia Fulham nen an inkhelh zawh khan United lam chuan ṭanchhan an lo siam daih tawh a. Old Trafford-a Manchester United leh Newcastle United an inkhelh ṭuma Rio Ferdinand-a’n penalty box chhunga Hatem Ben Arfa a tackle, penalty tur ni miah lo penalty an chawi ṭum te an sawichhuak a ni.

Tunhnaiah Man United leh Man City te khelmual pawnah an inbauh ta zauh zauh a, an pahnih inkar boruak hi a la ‘lum’ chho zel dawn niin a lang. Vieira hian Scholes an kohkir vangin Man United chu team hlauthawng tak niin a sawi tawh a, Sir Alex-a’n hemi chhân nan hian City in Tevez an koh kir chungchang a sawichhuak tawh bawk.

Sir Alex-a’n engtin tak chhanglêt ang maw? A him chin aṭangin lo thlir ang aw…

source: bbc.co.uk