English footballer zinga talent neih tha bera an chhal fo, mahse, a nun kawng chhuk chhoh, mak sak leh ingeuh avanga a nih tur ang ni pha lo satliah mai pawh ni lova, kawng kama chatthla kual vel ta vel mai mai Paul Gascoigne-a chanchin hi a ngaihnawm a, a uiawm hle bawk.
An hunlai kha tharum hman nasatna English football-a ramdangmi an seng luh chhoh tan lai kha a ni a, an football khelh dan phung pawh tunhma ngaihtuahin a danglam sawt hle a, mahse, ‘Gazza’ tia hming lem atana fei hmawr zum tih an phuahsak Gascoigne-a tan erawh buaina tham a ni lo!
Tharum a ngah a, ball a chawk kual thiam hle a, hla tak tak atangin dik tak takin a pe nalh nalh thei a, ban pahnih inkar a duhna laiah a thawlh luh zat zat theih bakah a lu a hmang thiam hle. A awmhmun sawn miah lovin awlsam takin a khingpuite a bum thei a, a tlan chak hle bawk.
FourFourTwo chanchinbu chuan he attacking midfielder hi, “Midang ball a pek dawn a Glenn Hoddle-a mit ang mit nei, mi ball chanlai a chuh dawn a Bryan Robson-a anga ball chhuhsak thiam central midfielder” tiin a chanchin an ziak.
English hranghlui Gary Lineker khan Gascoigne hi a inkhelhpui tawhte zinga pianpui thiamna ngah ber a ni, a ti a, England coach ni mek Gareth Southgate chuan English player a hmuh phak zingah Paul Gascoigne, Paul Scholes leh Wayne Rooney te chu player danglam bik an nih thu a sawi ve bawk. He midfielder hi Liverpool player ropui Steven Gerrard chuan a ‘hero’ a nih thu a sawi bawk.
Footballer chanchin ngaihnawm bik chu :-
Paul Gascoigne tia kan hriat hi a hming pum chu Paul John Gascoigne niin a hming hi British band lar Beatles member Paul McCartney leh John Lennon te hmingchawia phuah a ni. May 27, 1967 khan Gateshead, County Durham, England-ah a piang a, a pa John Gascoigne hi thil thiara inhlawh thin (Mutia kan tih ang chi) niin a nu Carol Gascoigne hi factory-a thawk a ni bawk.
Gateshead Boys tana a khelh laiin naupang football thiam zawnga fehchhuak ten an hmu fuh hlawm a, English football club Ipswich Town-a luh tumin trial nei mah se an hnawl. Middlesbrough leh Southampton-ah trial nei zui mah se an hnawl ve ve. Kum 1980 khan vanneih thlak takin a club tan em em Newcastle United chuan school ala kal mek laiin an la lut.
Mahse, Newcastle-a lut hnu hian an academy-a awm ve dang Jimmy Gardner nen intibuaiin an insual deuh reng mai a, tlanchhe paha kut inthlak leh inrin loh laia inbeih thut thut an chin avangin court-ah hruai an ni fo. An hotute lu a hai hle.
Hetih hunlaia Newcastle chairman Stan Seymour Jr. chuan Gascoigne hi English footballer ropui George Best nena tehkhinin, “George Best thluak tel lo,” a ti.
Gascoigne te hi chhungkaw harsa ve tak niin a naupan lai hun chu retheihna leh lungaihnain a tuam nasa hle a, hei hian a chhe zawngin a tun hun thleng a nghawng! Sawrkarin miretheite tana In a sak sakah chengin an insawn kual zing hle. An chhungkaw boruak a tha lova, a unau an insual nasa thin hle bawk.
Kum 10 a nih kumin Gascoigne chuan a thianpa nau Steven Spraggon chu dawrah a kalpui a, tul lo deuh deuha a tei kualpui mek laiin Derwentwater Road-ah Ice-Cream phur Van-in a su hlum. A thianpa nau motor-in a sut hlum chhanah amah hi mawh phurtu berah inngaiin ruang a hmuh hmasak ber a ni bawk.
A hnu lawkah a thiante zinga pakhat, Newcastle United-a a awm ve, khawlin a ei hlum lai a mit ngeiin a hmu leh bawk a, he a thil tawn hian a nun a tinuam thei lo.
Heng thil rapthlak tak tak a tawn lai mek hian a pa chu a batna ten a thil neih an chhuhsak mek bawk a, kum 10 mi lek Gascoigne-a nun chu hlauhnaa khatin phut uih uih a chin tak avangin enkawl zui a ni nghe nghe.
Gascoigne hian pawisa thap (gaming machine) a atchilh a, a pawisa hmuh ang ang chu inthap na’n hmang zo vekin pawisa a neih loh hnuah dawr a rawk chhunzawm mai thin.
Football a khelhin a nun hrehawm lutuk leh amah mawlh tlat thintu chu a kiang thin tih a hriat avangin tih tak zetin a inkhel a, a nu leh paten sum an thawhchhuah hleih theih loh avangin kum 15 a nihin a chhungte chawmtu-ah a tang tan tawh. Professional footballer nih chu an dinchhuah theihna tur awmchhun a ni tih a hriat avangin a bei ngawrh sauh a, hei hi a hlawhtlinna chhan pakhat a ni.
Kum 16 a tlin ni takin Newcastle youth team-ah a inziak lut ta a ni.
Naupang chum beng buang a nih avangin Newcastle youth team a zawm tirh hian a kum leh san zawng phu lohvin a rit a, footballer pawh a ang lo zawk. Thau siam thei chi a ei nasat avangin an manager Jack Charlton a mangang ru hle. Tichuan thau siam thei aia thahrui siam thei a ei theih na’n a pualin ruahmanna siam a ni a, chhunah a chawlhna tur bik restaurant-ah chauh thil an eitir thin a; mahse, a zan phah lutuk chuang lo.
A tawpa tawpah Charlton chuan a rihna chu innek nikhuaah a tangkai hle dawn tih hriain hman tangkai dan a zirtir bakah Gascoigne chuan a chet muan phah lo tih hriain a nih ang angin a pawm ta a ni.
Gascoigne hi naupang phawk tak a ni a, a kum rualpuite mai ni lo, Newcastle senior player te pawh thliar chuang lovin a chhaih kual nasa thei hle a, an buai phah fo. Tum khat chu Newcastle defender Glenn Roeder-a pheikhawk hrui a lo suihzawm leh tlat mai. Roeder hi thinrim takin an manager Charlton-a office-ah lutin, “He kum 16 mi, chum beng buang tak hian a thil chin hi a sim loh chuan ka ching chau dawn a ni,” tiin a hrilh.
Charlton leh a thawhpuite chuan Gascoigne hi kovin an zilh a, club atanga hnawhchhuah hialah vau zuiin thawhlehkhatah sim mai lo mah se a zia phah sawt. A naupan lai atanga chhertu Charlton chuan Gascoigne hi phuba lak ching a nih loh bakah a che sual ve thei hrim hrim tih sawiin youth tournament pawimawh lutuk an khelh dawnah ho taka inhliamin a khel ve thei lova, Bus-ah an senior player Kevin Keegan-a ballboot a tibo teh tlat bawk !
(Chhunzawm tur… – Lawmkima Hmar)
