PAUL GASCOIGNE – Part-II

Estimated read time 7 min read

Professional footballer: Newcastle United-a a luh tirh lamah Paul Gascoigne hi a thau lutuk avangin an buaipui kan tih tawh kha. 1984-85 season khan an manager Charlton chuan a rihna tihniam turin chawlhkar hnih hun a pe. Thuawih takin ni 10 chhung chu ip rit tak nen a training ta ngat ngat a, youth team captain a ni zui nghal. An manager Charlton hian a duhsak hle a, a thau lutuk a hlauh avanga ei tur thenkhat ei a phalsak loh na chungin Warford hneha FA Youth Cup-a an han champion meuh chuan a thiante nen ‘burger’ a chhawp sak teuh.

Gascoigne-a thianpa Joe Allon chuan 1984–85 season hi Gascoigne-a “Gazza” tih a nih tan kum leh kum 1990 Italy World Cup-a ropui taka inlan thei tura a kuhmum tan kum niin a sawi.

Gascoigne-a thatzia club dang ten an hriat tanna pawh 1984–85 season hi niin Gazza hi youth team captain a ni. Newcastle hian FA Youth Cup final thleng turin goal 20 thunin goal 3 chiah an chhuah, champion inchuhin Watford nen an inhmachhawn dawn. Youth team-ah hian senior contract ziak tawh 7 lai an awm a, heti chung hian Gazza hi captain a ni tho.

First leg-ah Newcastle an nawi a, 0-0 in an inhnehtawk. Champion tur chuan Watford khelmual hman thiam Vicarage Road-ah an chak ngei ngei a ngai. Second leg-ah an tumpui ten Newcastle-in player tha chungchuang tak an nei tih an hriat phah. Gazza hian ball tlanpuiin a lo chuhtu Watford player pakhat chu zahthlak khawpa chiangin a bum phar phawt, a bum tak player hi a tlawmngai ngang mai, inher vatin rang takin a umzui leh ngat. Mahse, Gazza hian a hma aia chiangin a lo bum leh. Newcastle youth coach Jimmy Nelson chuan, “I talbuai ang e, fimkhur rawh” tiin a lo au. Gascoigne hian a talbuai dawn lo a nih tih entirna’n ball a thunun hnehzia lantir pahin mual sira an coaching staff te ava siai zeuh! Yard 50 zeta hlaa awm a thianpa Joe Allon-a keah a va dah sak ta chat! An phu dual a, Allon hian goal-ah a chantir.

Gazza a chepui zel, final-a a goal hmasa zawk chu a tauh goal phawt; mi tlemte chauhin an tih theih tur goal ropui thun zuiin 4-1 in hnehna an chang a, an champion. A goal hnihna hi a hnu thleng pawhin Charlton leh a assistant Maurice Setters ten a ropuizia an la sawi a, an manager Charlton chuan Gazza goal hnihna thun ve leh a assistant Setter-a hnenah, “Maurice, kum 100 pawh dam ta teh reng la hetianga goal ropui hi chu i hmu leh tawh ngai lovang,” a ti thlawt.

An inkhelh zawh hnu lawkah Jack Charlton hian Gascoigne chu professional contract ziak tura sawmin Norwich City hmachhawn tur first team zingah a tel tur thu a hrilh. A hruai tel ta ngei a, mahse, kum 17 mi Gazza hi rilru lamah ala inpeih lo tih hriain a luhtir ta lo.

Kum 18 a upa a nihin Gazza hian Newcastle United-a chawlhkar tina £120 hlawha kum hnih chhung cham turin contract a ziak. Hamthatna dang neuh neuh nen chuan £200 hu a ni. A hlawh zat hi tunlai ang atan chuan tlem hle mahse a hunlaia rawlthar hlawh tam berte zingah a tel pha.

An manager Charlton chuan Gascoigne hi tunge a nih a hrechiang hle. Mi khawngaihna ngah tak a nih avangin a sum hmuh ang angte midangte tan a semral hreh dawn lova, a nih loh vek pawhin zu lei na’n a hmang vek dawn tih a hre sa. Chuvangin a hlawh zawng zawng a lak nghal vek theih loh na’n a hlawh chanve bak chu a mamawh tawk lek lekin a laktir thin.

A khelhpui thinte chuan a tlawmngaihzia an sawi nasa thin.

Newcastle tana a khelhpui thin Joe Allon chuan, “Gascoigne hian amah aia mamawh zawk nia a hriat a hmuh phawt chuan amah pawhin chan nei dawn lo mahse a pawisa a pe vek duh dawn, tih ka chiang,” a ti.

Lee Clark pawhin Gascoigne hian sum a ui lo ni mai lovin midang tanpui a peih hle tih a sawi. Tum khat chu Clark-a ten Wembley stadium-ah youth international match an khel a, zan dar 09:30 ah Rel Service hnuhnung ber a chhuah dawn avangin a pain a nang hman dawn lo; amah lah a inkhelh a ngai bawk si. A tuk lawka international match khel tur Gascoigne hi a dinhmun a hrilh a, Gascoigne chuan awlsam takin, “Ka lo hruai dawn nia,” a tia, a lo hruai sak mai. A thiante tan hun a nei thei mai zel. Senior zinga a khelh hnuah pawh youth team zingah a remchan apiangin a training ve thin a, engdang vang ni lovin naupang zawkte bula fiamthu thawha phul hlut nuam a tih vang a ni ber.

Newcastle United chuan 1985–86 season hian manager atan Willie McFaul an la a, Gascoigne pawhin Tottenham lama an hralh tak Chris Waddle-a hmunruak luahin first eleven a chang. September 21, 1985-ah Oxford United lamah top division-a a goal hmasa ber a thun a, goal 8 a thun chhunzawm avangin Rothmans Football Yearbook, front cover-ah a lang pha ta hial.

1986–87 season-ah Magpies tan Gazza hian goal 4 thunin point 3 chiahin division hniamah an tla lova, hei vang hian a dawt leh season-ah Mirandinha an la lut. Mirandinha hi Brazilian zinga British club-a lut hmasa ber niin George Robledo leh a unaupa Ted te hnung zuiin South American zinga British club zawm hmasa 3-na a ni.

Mirandinha an lawmluh ni hian Gazza hi a che maksak leh bik hle. Benwell training ground-ah an player thar chibai turin Newcastle player te an intlar thap a, a hma lama ding Gascoigne chuan Mirandinha hi a chibai vat. A chibai zawh ve leh a tawp lamah va intlar lehin Brazilian player thar hi a lo chibai nawn leh! Gascoigne-a phirpui ka nia, a ti leh hman pek!

Gascoigne hi Mirandinha English zirtirtu atan insawi lut chawpin kawng engkimah a kaihruaitu atan an hmang zui a, an tihfuh nge an tifuh lo tih pawh hriatthiam a har. Chawlhkar khat chhunga ni hrang hrangte a zirtir a, mahse, Nilaini tih aiah chhechhamna lam hawi thu a lo zirtir daih!

Tum khat chu Mirandinha hian soup leh hot drinks zawrhna Benwell-ah coffee lei a duh thu a sawi a, a tihdan tur Gascoigne a zawt. Gazza chuan, “Coffee ka lei duh a..” tihna atan “Fuck off Ronnie. Fuck off!” tih a lo zirtir. Mirandinha chu coffee lei tumin dawr a lut, a nghaktu Ronnie hnenah chuan, “”Fuck off Ronnie. Fuck off!” ava ti ta mai. Ronnie chuan min va zahlo mai mai ve le, tiin an inmelh rum hle. He thil thlen dan hi a hmuna awm ve Lee Clerck chuan a hnuah an sawichhuak a, an thiante nuih za lutuk chu leiah an let hawl hawl hlawm.

Gascoigne leh Mirandinha hi an inzui nasa hle a, chanchin pawh an ngah dun. Tumkhat chu Gascoigne hian a Brazilian thianpa car hi a hawhsak teh tlat, vanduaithlak takin khem nuanin a rawn hawpui. Mirandinha fate chuan a pa car a tihchhiak sak aiah uite leisak turin an ti a, Gazza pawh hian uite tha chi Springer Spaniel a leisak a, a hmingah ‘Gazza’ an phuahsak!

Gascoigne leh Mirandinha te hi English chhumbung tak takin an titi nasa a, an tawngkam hian a hunlai chuan British a luah hneh; TV nen lamah tihchhuah a ni.

(Chhunzawm tur…. Lawmkima Hmar)

C Tlanthianghlima

Football tui ve tak

You May Also Like

More From Author