Englo chu ! : February 1988 a Gazza leh Vinnie Jones te thlalak kha tun thleng hian a la lar. Jones hian football ai mahin khami tuma Gascoigne-a mipatna tak a hum sak chat kha a larpui zawk!
Plough Lane-ah Wimbledon leh Newcastle United an inkhel dawn a, Wimbledon hian Gascoigne-a dan chah dan tur an ngaihtuah nasa hle.
An coach Don Howe chuan Gazza an danchah loh chuan an tumpuite chu an tan an khawng dawn lutuk tih hriain training-naah a danchah dan tur an zir tlut tlut. Gascoigne-a aiawhtu atan an hnena training lai kum 16 mi chu an hmang a, Vinny Jones chuan a veng thin.
An inkhelh hun a thleng dawn ta. Magpies player te hi Wimbledon mualah an warm-up a, Gascoigne chuan a thiam a show kual a, a che vel chu Jones hian a thlir. Training-naa kum 16 mi a dan ang mai maia dan chi a ni lo tih a hre nghal. An inkhel zui ta.
Defender Jones hi ball thehtu atan hman niin thui tak tak a vawrh thin a, mahse, hetia ‘long throw-in’ a lak lai hian a mi ven Gascoigne chu a kalsan zel a ngai. Ven hneh loh a duh bawk si lo chuan tawngkam nen tan a khawh. “Pa thau, lo kalsawn suh. Ka rawn let leh nghal dawn” tiin a mi vena zawk chu amah hlata awm lo turin a vau ta chher chher mai.
He an invauna hi thlalatu Monte Fresco chuan a lo hre fuh. A ruaituten ti tura an tih loh lam muala inkhel thla la lo chuan Jones leh Gazza te inzui chu a tinzawn ta ngar ngar. Chutah le, Jones-a’n a kut veilama Gazza sazu-a a thamsak vak avanga Gascoigne-a te thawt lai thla a la fuh ta. Hei ngei hi football huanga thlalak lar bera an sawi zui tak fo chu. He thlalak hian kar lovah khawvel a dengchhuak, inkhelh lama ropui vak lo Jones chuan a lar phah hle.
Newcastle player tha ber danchah a nih avangin team pahnihte hi goal thun lovin an inhnehtawk ta a ni.
Jones hian a hnu zelah pawh a chetdan mawi lo tak avang hian media ten an thinhrik tih sawiin inkhelh zawhah Gascoigne chuan Jones hi Rose par sen a thawn lui ngat a, Jones lah diau duh hek lo, Toilet brush a lo thawn let. Thian tha takah an inchhuah zui ta a ni.
1987–88 season hi Gazza rawn lar tan tak tak kum niin PFA Young Player of the Year atan thlan niin PFA Team of the Year-ah a tel bawk.
Gascoigne hi a chetthat tak em avangin club hrang hrangin hlawh tam zawk pek huamin an dawr a, chung zingah chuan Tottenham leh Manchester United an langsar. Gazza hian a club vawn mek chhuahsan a hreh avangin an thu a ngaichang a, an hnena awm zui zel tura an duh tak tak chuan chhuahsan a tum lo. Mahse, club enkawl dan hlui taka enkawl mek Newcastle United inrelbawlna thlak danglam chhoh dawn lai niin board lam an buai a, Gazza hi kum 18 a nih laia a hlawh zat hlawha an hnena cham zui turin an sawm ve chauh!!
Spurs-in Newcastle-a a hlawh £250 let ruk pek inhuamin Manchester United pawhin hetiang zat hi pek an huam. Gazza chuan a chhuak dawn a nih rau rau chuan Liverpool zawm a duh ber a, mahse, a club duh ber hian an dawr lo.
United manager Alex Ferguson chuan Gascoigne hi an club zawm turin a sawm a, Gazza pawhin zawm ngei a tiam. Ferguson hian thlamuang takin chawlh a hmansan a, chawlh a hmannaah chanchinbu atangin a player duh em emin a hunlaia British record fee £2.2 million a Tottenham a zawm thu a hmu chu a lunghnur hle.
Ferguson chuan a chanchin a ziahnaa Spurs hian Gascoigne an lakluh theih na’n hian an chhungkaw harsatna hmang tangkaiin In an leisak a, hei vang hian an chang ta lo tih a tarlang. Gazza pawh hian Tottenham-in an club a zawm avangin £100,000 an pe tih sawiin £70,000 chu a nu leh pate mamawh thil hrang hrang lei na’n a hmang tih a sawi.
Tottenham Hotspur : Gascoigne hian White Hart Lane-a a season hmasa berah goal 7 thunin Terry Venables-a team te hi 6-naah a awmpui a, a lehpek season-ah 3-na a nihpui bawk. BBC Sports Personality of the Year 1990 atan thlan niin Tottenham Hotspur’s Player of the Year atan thlan a ni bawk.
1990–91 season-ah Gascoigne hi PFA Team of the Year ah tel phain Tottenham chu FA Cup final a thlenpui nghe nghe. FA Cup final ah hian na takin a inhliam a, a khelhpui Lee Clark chuan hemi tum hian inhliam lo ngat se chuan khawvela player tha ber a nih ngei a beisei tih a sawi.
Inhliam avangin 1991–92 season pum a inkhel mumal thei lo. Kum 1991 kum tawp lamah a inkhel thei tawh tihin Nighclub-a an insualnaah a hliam belchhah a, hun rei zawk a bawksawp phah.
Hetih hunlai hi UK ram pumpuiin sum lama harsatna a tawh lai, hna nei lo chungchang leh an ram dinhmun tlakhniam zel thu ten chanchinbu phek hma an luah thin lai a ni nain ‘Gagcoinge-a’n Lazio pan a dil thu’ chuan headline a chang reng tho.
An club innghahna a nih mek lai hian Spurs chuan sum harsatna namen lo an tawk a, leiba £10 million an nei bawk. Tichuan ui tak chungin Italy club SS Lazio-ah £8.5 million an hralh an titlu ta a ni.
Lazio : Kum 1992-ah £5.5 million in Lazio a pan a, Italian club hian an club a zawm avanga lawmthu sawi na’n £2 million hnih an pek bakah chawlhkartin £22,000 a hlawh. September 27, 1992-ah a club thar tana a inlan hmasak ber tumin Genoa a hmachhawn a, a inkhel hi British TV te pawhin an tichhuak hial.
Italy a pan hnu hian leirem a rap lawk thei lo. An fans ten an duh viau laiin an club neitu Sergio Cragnotti lawm erawh a hlawh lo. Gascoigne hian chibai buk na’n Italy tawnga ziak ‘I fanu hnute lian deuh kha’ tih a lo thawn hmanhmawh lehpek chu niin!
Italy-ah hian a hming a tha lo. Reporter kut a thlak bakah TV-a an programme an pekchhuak mek laia microphone a phawi avang ten an hmu he.
Stadio Olimpico-a a season khatnaah hian fak leh sawisel a hlawh chhawk. Rome Derby-a AS Roma nena an inhmachhawn tumin hun tawp hma lawk minute 88-naah an nihrualna goal a thun a, hei hian sang takah a vawrh.
Mahse, a vanduai a tih theih ang chu. April 1993 a ram tana a inkhelhnaah a biang ruh a titliak a, hei vang hian hmai venna vuah chunga a inkhelh a ngai. Mahse, Lazio chu 5-na nihpuiin kum 16 hnua a vawikhat na’n Europe-a inlan thei turin a siam.
1993–94 season an chuangkai a, ei leh in lama insumna chang hre lo Gascoigne a thau tawh hle. An manager Dino Zoff chuan 13kg zeta a rihna tihniam turin thupek khauh tak a pe. A tihniam lo a nih chuan first team-ah hmun a chang dawn lo. An manager beiseina hi reiloteah a puitlin thei. Vanduaithlak takin inhliamin a tlak buak leh a, an manager hian a dam thuai theih na’n chawlh a pe.
Mahse, Gazza chuan ‘Chawlh ka hman chuan ka thau leh vek dawn’ tiin chawlh pe lo turin a ngen. Chawlh an pe ta ngei a, thau mum kungin a rawn haw!
Kum 1994-ah Lazio hian Foggia coach Zdeněk Zeman chu an manager thar atan an la lut a, coach dangte ang lo takin Zeman hian training-naah whistle a hmang nasa thin hle. Tumkhat chu an coach hian a whistle awmna a hre lo, an zawn chiam hnuah an training-na bula tla thin Vatawk pakhatin a lo awrh daih! Gazza tih a ni tih an hre vek nain tuma’n an sawichhuak ngam lo.
Kum 1994 April thla hian an trainning-naah Italian defender lar Alessandro Nesta nena an inchilhna lamah a ke ruh a titliak a, a inkhelh chhunzawm theih na’na fitness kalpui dan chungchangah an manager Zeman nen ngaihdan inang lo tak neiin an inhmuthiam lova, Scotland club ropui Rangers a pan phah ta a ni.
(Chhunzawm tur… Lawmkima Hmar)
