PAUL GASCOIGNE (Part – IV)

Rangers : July 1995 khan £4.3 million in Rangers a zawm a, a hunlaia Rangers player man to ber niin chawlhkartin £15,000 a hlawh. Celtic Park-a Old Firm derby an khelh tumin goal turu lutuk a thun. Mual dung tluan deuh thaw ball a khalh hnuah an hmelma kumhlun Glasgow Celtic lamah thunin lar satliah lohvin a lar.

December 30, 1995-a Hibernian nena an inkhelh tumin a che maksak leh ta. Referee Dougie Smith chuan player pakhat chu yellow card pek tumin card a phawrh a, a thlauh palh hlauh. Gascoigne hian card tla chu chhar khalhin referee zawk hi yellow card a pe; referee a lawm lo, a thu zawkzia lantirin Gazza hi yellow card a pe.

Ibrox Stadium-a Aberdeen an mikhual tumin hat-trick a siam a, a team tharte hi league title a lakpui nghal a, Scottish Cup final-ah Heart hnehin trophy 2 an chawi.

Hemi season hian Gascoigne hi a che tha hle a, vawi 42 a inlan atangin goal 19 lawih a thun a, PFA Scotland Players’ Player of the Year leh SFWA Footballer of the Year lawmman a dawng kawp hial.

A dawt leh season-ah vawi 34 inlanin goal 17 a thun a, league title leh League Cup title an lak chhunzawm leh. Mahse, zu a in nasat tak em avangin an manager Walter Smith leh assistant Archie Knox te lu a tihai ta hle.

Kum 1997-ah Italian player rothap Gennaro Gattuso chuan Rangers a zawm a, Gascoigne hian a lo dawngsawng tha hle. A lo lawmna chi khat atan a mawza a hnim sak!

Hetih hunlai hian Rangers chuan tihdan nghet tak an nei; player te chu training-na hmunah Suit leh Necktie nena an inthuam a ngai! Gattuso hi thawmhnaw lam ngai pawimawh lo chi a lo ni bawk nen hak tur a nei lo.

Nikhat chu Gascoigne hian Glasgow khawpuia thawmhnaw thuina hmun leh man to berna hmunah a kalpui a, Suit 7/8 la turin a ti. Puanthuitu te nen an club chuan inremna neiin Rangers player ten chu dawra thawmhnaw an duh zat zat chu lain season tluanin an hlawh atanga tlem te tea pek turin an la thei niin a hrilh.

Gattuso chuan Suit bakah kawr, necktie leh thawmhnaw dang a mamawh tur nia a hriat chu a hmarcha mal ta hmiah hmiah a, £10,000 man zet a ni. Mahse, a hnuah Gattuso hian an club leh puanthuituten eng inremna mah an lo nei reng reng lo tih a hrechhuak. Mi thilphal Gascoigne hian an player thar kum 19 mi chu a inthlahrun loh na’n a lo bum lek chu niin. Gattuso hian a chunga Gazza thatzia hi a theihnghilh ngai loh thu a sawi.

November 1997-a Old Firm Deby an khelh tumin Gascoigne hi Celtic midfielder Morten Wieghorst-a lakah a che rum hle a, match 5 khel thei lo turin hrem a ni. A kum leh January thlaa Celtic Park-a Old Firm derby an khelh tumin an tumpui Catholic kohhranin an tan rawn Celtic fans te huat zawng takin a tihel na’n Protestant unauten an tanrualzia entirna atana an hman thin ‘Phenglawng tum ang deuha awmin’ a goal thun a lawm.

A goal lawm dan sawisel hlawh tak avang hian boruak a sosang hman hle a, a club hian £20,000 an chawitir. Northern Ireland hel pawl Irish Republican Army (IRA) te hnen atangin thaha vauna a dawng zui.

Zu a in nasat em avangin a dinhmun a tlahniam a, 1997-98 season khan vawi 28 inlanin goal 3 chiah a thun.

Middlesbrough : March 1998-ah £3.45 million-in ram tana a khelhpui thin Bryan Robson-a enkawl English second division club Middlesbrough a zawm ta nawlh; Premier League-ah a kaipui.

Premier League-ah a club chetthatpuiin December thlaah 3-na hial nihpui thei mahse zana zu ina an chhuahnaah a thianpa a thi a, mawhphurtua a inngaih avangin rilru lamah hatsatna a tawh belh. Zu in runpui an buatsaihnaah kalin no 32 ngawt a in avangin a chatthla chiang hle a, an manager Robson chuan Priory Hospital-ah a dah lut. Rehab leh Training Ground a kartawn zak zak.

Chanchin chhiain a um chhunzawm zel; Riverside Stadium-a Aston Villa an hmachhawn tumin Villa midfielder George Boateng chu a lu-ah na takin a nghawk lui a, ama Kiu ruh pawh hi a khi hial! Football Association chuan match 5 khel thei tura an hrem bakah £5,000 an chawitir ta a ni.

Everton : ‘Boro’ atang hian January 2000-ah Rangers-a a pu Walter Smith-a enkawl Everton a zawm a, a fit loh lutuk leh rilru lama harsatna a tawh avangin a khel tam lo. A khelh chhunah erawh mit a la hle.

Zu avangin a buai zual zel a, Cottonwood, Arizona, USA-a Rehabilitation Centre-ah a lut thla rawih. A rawn chhuah hnuah inkhel turin a fit tawh e, tiin November 3, 2001 khan The Toffees tana a goal hmasa ber chu Bolton lamah a thun. A lakah beiseina a san chhoh leh mek laiin a kap bawr a hliam avangin thla 3 a chawlh zui a ngai a, hemi tuma a goal hi English Football-a a goal hnuhnung ber a ni zui ta a ni.

An manager Walter Smith hian March thlaah Goodison Park chhuahsanin David Moyes chuan a rawn thlak a, Gascoigne pawhin Everton hi a chhuahsan ve ta nghal a ni.

Hun tawp lam : Second Division club Burnley zawmin play-offs an thlen phak loh avangin thla hnih hnu lekah a chhuahsan. Kum 2002 nipui laiin American club D.C. United zawm turin a trial a, an duh lo. Second Division club Gillingham-ah trial lehin an duh chuang lo.

February 2003 khan thla 9 chhung atan China League One club Gansu Tianma a zawm a, player leh coach nih a fawmkem. Vawi 4 inlan a goal 2 a thun hnuah zu leh depression avanga inenkawl turin US a pan leh. A club lamin let tura an tih hnuah pawh a let leh duh ta chuang lo a ni.

Tichuan July 2004 khan League Two club Boston United chu player-coach ni turin a zawm a, manager ropui tak nih a inbeisei thu a sawi. Mahse, thla 3 hnu lekah chhuahsan lehin football lamah a inhnamhnawih zui ta lo a ni.

(Chhunzawm tur… Lawmkima Hmar)