PAUL GASCOIGNE – Part -V

Ram tan : Gascoigne hi kum 1988 atangin England senior team-a khel turin koh tan a ni a, ram tan competitive match-ah first XI a chan hma hauhin 1990 FIFA World Cup, Italy-in an dawl tum khan koh a ni. Hei hi a hming a chher tak takna pawh niin Maradona nen player tha ber nih an inchuh.

A hma zawnga hmun pawimawh chang ngai lo hian World Cup group game 3 a khel kim vek a, Egypt an hneh tumin an chakna goal tur a siamsak. Second Round-a Belgium an hneh tumin penalty area-a free-kick changkang a pir luh hmangin David Platt chuan goal a thun. Quarter-final ah champion lai Argentina hnehtu Cameroon nen an inhmachhawn. Penalty a chawi avangin an khingpui ten goal an thun phah. Extra-Time ah fing lutuka through-ball a pek hmangin Gary Lineker chuan penalty hlawhchhuak ve thungin an chakna goal a ni zui.

July 4, 1990 a semi-final a West Germany an hmachhawn tuma a thlalak chuan British mipuite a vel. Juventus khelmual chhuanvawr Stadio delle Alpi, Turin-ah champion zui ta Germany nena an inhmachhawn tum hian Thomas Berthold-a lakah yellow card a chawi. Belgium an khelh tumin yellow card a lo hmuh tawh bawk si avangin final an lut a nih pawhin a khel ve thei dawn lo. England innghahna a nih mek laiin a ram tan a inlan zui thei dawn lo nia hriain card a hmuh rualin a mittui a tla. Penalty shoot-out ah Stuart Pearce leh Chris Waddle ten penalty an hlah avangin England hi an tla zui ta a ni.

October 1992 a, FIFA World Cup qualifying-a Norway nen an inkhelh dawn tumin Norwegian television crew pakhat chuan Norway mite tana thu tlem tal sawi turin a ngen a, Gascoigne chuan tha taka sawi ta mai lo chuan, “fuck off Norway” tiin tawngkam mawi lo a chhakchhuak leh!! He thil hian inkhel boruak aiin hmun a chan len zawk tak avangin thupha a chawi nghe nghe. England hi Netherlands leh Norway hnuaiah awmin kum 1994 World Cup khel turin an tling zo ve ta lo.

Inhliam avanga thla 15 zet a inkhelh theih loh hnuah Euro 1996 chu England-in a dawl dawn a, Gascoigne pawh inbuatsaih na’na friendly match an khelh chhoh mekah player pawimawh a ni.

Hong Kong-a friendly match an khelh tumin England player te zanah chhuakin ‘setana tuibur’ an lem nasa lehpek hle. Ha doctor thutna ang chi chair-a thuin zu an intulh chiam. Hetia an awm lai thlalak hi tournament tan hmain a darh vak.

Scotland nena an inkhelh tumin Gazza hian goal a thun, a thiante nen dangdai takin an lawm. Dentist chair-a thu ang deuhin Gascoigne hi mualah a zangthal er awr a, a thian ten a kaah zu an tulh der chiam. He an goal lawm dan hi a lar hle. England hian semi-final ah Germany hmachhawnin penalty shoot-out ah tuna The Three Lions coach ni mek Gareth Southgate chuan penalty a hlah a, an tla zui ta a ni.

Glenn Hoddle-a’n England national team a enkawl hnu pawh khan player pawimawh niin qualifying match hnuhnung bera Italy nena 0-0 a inhnehtawk tumin a khel tha hle a, kum 1998 FIFA World Cup khel turin an ram a tlinpui.

Mahse, an tlin hnu lawkah, world cup khel tura thlante hming puanchhuah na’n chawlhkar khat chiah a awm tawh tihah British chanchinbute chuan zana chhuah phal a nih loh laia Gascoigne leh a thian DJ, Chris Evans ten zanreia khawlaia Arsa hem hmin an ei lai thlalak an rawn vawrhdarh ta thut. Hei vang hian Hoddle chuan England tana khel turin a ko duh ta lo. France pan tur zingah a tel ve lo tih a hriat ve leh Gazza thinrim hian England manager Hoddle-a room a vuakdarh sak chiam nghe nghe a ni.

England tan hian vawi 57 inlanin goal 10 a thun a, kum 1998 hnu lamah a inlan zui ta lo a ni.

Khelmual pawn lam : Gascoigne hi kum 6 lai a lo zui tawh Sheryl nen kum 1996 khan an innei a, mahse, kuthlak a chin avangin kum 3 hnuah an inthen leh.

A chanchin ziakna bu 3 –Gazza : My Story, Being Gazza : Tackling My Demons leh Glorious : My World, Football and Me te tihchhuah a ni tawh. Heti khawpa ropui si hi November 2008 khan kum hnih chhung chhiah a lo pek loh bakah leiba £32,000 a nei tih hriatchhuah a ni.

Kum 2015 khan a bialnu hlui a tihbuai bakah thlalatu kut a thlak avangin thubuai siamsak a ni a, a bodyguard mihang chu hmusit taka a tawngkhum avangin £1,000 chawitir a ni.

December 27, 2016 khan London hotel pakhatah chi inthliarna lam hawi zawnga midangte hmusit taka a tawng chiam avangin ha hmai bal nuan khawpa sawisak a ni a, kutthlaktu hi chawlhkat 23 chhung Jail-ah khung niin £7,800 chawitir a ni.

Kum 1998 atang khan rilru lama harsatna a tawh avang leh zu bawiha a tan avangin vawi engemawzat Rehab-ah awmin damdawi ina dah luh a ngaih chang a tam hle bawk.

February 2008 khan zu leh damdawi a khawih nasat avanga a talbuai chuan intihlum a tum avangin ven ngaiin hun rei tak chhung a awm. Kum 2010 khan license nei lo leh rui chunga motor a khalh avangin vawi 4 lai man a tawk a, a tihnawn leh chuan Tan Ina khung tura tih a ni. Hemi hnu lawk hian rui chunga motor a khalh bakah Cocaine a ken chu man tel a ni a, Court-ah inlan lovin Rehab-ah a lut. Chawlhkar 8 chhung atan hrem a ni zui ta tho.

February 2013 khan Arizon Rehab-a a awm mek laiin ICU-a dah ngai khawpin zu avangin a na a, a thian cricketer hlui Ronnie Irani leh broadcaster Chris Evans te puihnain enkawl dam a ni. A senso zawng zawng hi a thiante hian an tumsak vek.

Mahse, heti chung hian railway security guard kut a thlak avangin man a ni a, £1,100 chawitir a ni.

Kum 2018 August thla khan Rel (train)-a a chuanpui hmeichhe pakhat kut a thlak avangin Durham station-ah British Transport Police ten an man a, hemi kum vek November thla hian hmeichhe pawngsual tuma puh a ni leh. Mahse, thiam a chang hlauh. Kum 2018 February thla khan a pa John Gascoigne chuan kum 72 mi niin Cancer avangin a boral san ta bawk.

Hmingchhiatna tam tak nei mahse April 2017 a, an thenawmte in rawk tum a lo beih let avangin fak a hlawh hle a, misual nena an inbeihna lamah hliam tuarin damdawi inah dahluh a ni nghe nghe a ni.

Manchester United manager hlui Sir Alex Ferguson chuan Gazza chungchang hi sawiin, “An hunlai na na na kha chuan amah aia player tha an awm lo. Hlim sanga inkhel thin a nih avangin a khel kha hmuh a nuam bik em em a ni,” a ti.

SS Lazio-a lo enkawl tawh thintu Dino Zoff chuan Gazza hi, “Naupang duhawm tak, rilru tha tak a ni. Chutih rualin buaina a thlen reng bawk. Zing chaw atan Ice Cream a ei a, chhun chaw atan Beer a in thung ! Player a nihna chauh thlir chuan amah kha a that hian a tha hliah mai a ni,” a ti.