Manchester United midfielder Paul Scholes chuan football khelh a bansan thu a puang a, season thar atang chuan United player ni lo in coaching staff a ni tawh ang.

A thiante Gary Neville leh Ryan Giggs ang bawka club pakhata rinawm tluanchhuak Scholes hian kum September 21, 1994 ah Manchester United senior team tan a khel tan a, game 650 chuang khelin goal 150 a thun a, intihsiakna 24 zet ah a team a champion puiin football player champion ngun ber te zing a mi a ni. Heng a medal dawn zingah hian English Premier League winner medal 10 leh Champions League medal 2 a tel nghe nghe.

Midfielder piang tawh zawng zawng zinga ropui ber pawl Zinedine Zidane-a’n “The best player I have ever played against” a tih, Iniesta leh Wilshere te role model, Christiano Ronaldo player ngaihsan em em ni bawk the Ginger Master hi khawvela ball pass thiam ber pawl a ni ti ila kan sawi sual awm lo e. A vanglaiin midfielder goal thun thei ber pawl a ni a, 1990s chho a United in England a ro an rel laiin an player pawimawh ber pawl a ni. Tunah chuan kum 36 a ni ve tawh a, Sir Alex-a’n la duh hle mahse contract thar sign lo in inkhelh a chawlhsan ta a ni. Manchester United player ropui an sawi apiangin Paul Scholes hi a tel ve tawh ang.

Football field pawnah chanchin a nei tam lo hle a, English tabloid leh paparazzi ho meuh pawhin hairstyle a a buai loh zia bak ziah tur an nei tam lo thin hle. ‘Quiet man of English football’ hian England tan game 66 khel in goal 14 a thun bawk a ni.