Football-a pawh darh/chet reng pawimawhna hi thil thar a ni lem lo. Hungary team hmingthang takin kum 1953-a hnehsawh tak maia England 6-3 a an sawp ṭumte khan Hungary player-te kha an tlan ṭhinna pangngaia awm reng lovin an ṭhiante nen an position an inthlan thleng zung zung a; lehlam pawl player-te tan khan tu ber ngen chân (mark) tur hriatthiam a har em em a ni.{source history of football}

Tun hnu hian tlan dan ‘ṭha leh fuh’ hian chawinun thar leh a ni a. Ball khalh chung ni lova, thiam taka ṭanhmun lo thlak kual pawimawhnaber pakhat chu lehlam pawlte ṭanhmun tih pelhsawlh a, hmun pawimawh laia mahni leh lamtangte tana remchang ṭha siamsak a ni ber awm e. Striker ni ta la, lehlam centre-back lah i bulah tâp chawt mai bawk si se la; mid-field lamah i tlan let daih chuan –

(1) tu mahin an hnaih loh leh ball pass remchang tak turin i insiam thei ang a (2) centre-back chuan rawn umzui ta che se la, i pawlte tan lehlam goal hnaiah remchang tha tak a insiam thei ang.

Amaherawhchu, (2) zawk hi awmze nei tur chuan i pawl tu emaw hmun awlah chuan a lo awm vat a ṭul a. Inrem dan pakhat, 4-4-2 formation-ah hian tuna kan sawi mek hi hman lar tak a lo ni tawh thin a; striker pakhat zawk chu lehlam centre-back tana um loh theih lova thui tak tlan let phutin, a striker-pui chu a hmun awl siamah chuan a rawn tlan lut vat ṭhin. Mahse he chetphung hi a mawlmang fu mai; a chhan chu midfield leh striker inkar hi a hlat tham avangin striker pahnihte tan tlan tawn kual zung zung hi thil harsa tak a ni.
Thuah li-a inrem dan (four-band formation) hmang hian forward (te) leh midfield-te inkar zau tak chu a tihzim theih a; forward tlan danin hmun awl (space) a siam chu awlsam leh rang zawkin a hman ṭangkai theih zawk ṭhin. 4-4-2 formation-ah kha chuan forward-a tlan pakhat kha forward-a tlan tho midangin a rawn pui a ni deuh mai a; 4-2-3-1 formation angah te hi chuan forward-a mal tlan pakhatin space a siam chu midang pathum-in rawn hmang ṭangkai theiin, a sira tlânte pawh 4-4-2 formation aiin an rawn hnai zawk fe a ni.

Hetiang deuh bawk hian winger chuan forward tan space a siamsak thei tho bawk a; chutiang ang zelin attacking midfielder chuan defensive midfielder tan space siamsak zelin, tun hnua attacking full-back-te an lo awm zel takah hian full-back-te pawhin space an insiamsak zel thei ṭhin a lo ni. A tawi zawnga sawi chuan, thuah 4-a inrem (4-band formation) hi thuah 3-a inrem (3-band formation) aiin inthlak tawn zung zung leh space siam a awlsam zawk a, a pawimawh zawk hle a ni.

AC Milan enkawltu Arrigo Sacchi hunlai kha tlan dan phung ngaihpawimawh rawn uar chhoh thar leh ṭanna niin a lang a. Paolo Maldini chuan, “Sacchi a lo lan hma kha chuan team pahnihte inbeihna kha thil pawimawh ber a ni satliah a; anni nen kha chuan ball tel lova tlan dan kha thil pawimawh ber niin, hnehna kan chan chhan ber pawh a ni,” tiin a sawi.

Hetih rual vek hian modern football-a inkhelh kalphung thar dang – midfield-a ball cham reipui ngaihpawimawh avanga attacking position-a khelte tlan vel dan a lo pawimawh ta sawt bakah, footballer-te inkhelh dan phung chak ta em emin counter-attack a tih hlauhawm zual sawtte pawh hi thil pawimawh leh ngaihven zui tlak tak a ni bawk awm e.

Tlan dan fuh hi lehlam pawl attack-na atan a pawimawh em avang hian, striker ṭha pawhin an lar phahin, an pawimawhna pawh a pun phah hluai a. Portuguese striker Pedro Pauleta kha hetiang lama thiam chungchuang leh hriathlawh a ni. Kum 10 liamtaah khan chuan striker maltlat hna ber chu lehlam goal bula rei tak ball chan theih a ni a; tunlaiah chuan striker maltlat-te hi fing taka tlan a, ṭanhmun tha lo insiam tura beisei an nih bakah, a tul hunah chuan midfield lamah pawh thui tak tlan let (false nine) thin tura ngaih an ni. Hetiang tactic hi Wayne Rooney leh Liedson te khelh danah kan hmu thei ang.