Manager lar Manuel Pellegrini chu La Liga club Real Betis manager thar atan ruat a ni a, season thar atangin a enkawl ang. Kum 66 a upa Chilean manager hian kum thum daih contract a ziak a ni.
Pellegrini hi manager tawnhriat ngah tak niin an ram Chile bakah Spain, England, Argentina, China leh Ecuador – ah te club hrang hrang a lo enkawl tawh a. Kum 2004 – 2009 khan Spanish club vantlang Villarreal chu enkawlin La Liga – ah pahnihna te nihpuiin 2005/06 season phei chuan Champions League semi-final an lut hial a ni.
Hemi hnu hian Real Madrid a enkawl a, Madrid khawpuia Kaka, Cristiano Ronaldo leh Karim Benzema te laluttu a ni. Madrid – ah hian La Liga – a an point hmuh san ber record (96 points) siam pui mahse Barcelona tluk loin pahnihna an ni a, Malaga lamah a pem san. Malaga – ah hian hming a chher viau a, an club chanchina a vawi khat nan Champions League quarter-finals a luhpui.
Kum 2013- 2016 chhung Manchester City enkawlin Premier League – ah vawi khat a champion pui hman a, hemi hnu hian Chinese Super League club Hebei China Fortune leh Premier League club West Ham te a enkawl leh a ni.
