Player a ni lo, Coach a ni zawk

ZoFooty #FootballKaida

Player a ni lo, Coach a ni zawk
Wembley Stadium-a Germany mualpho ṭum aṭanga thla hnih a ral meuh chuan Die Mannschaft chu team dang daih an ni ta. Nizan khan an mual Mercedes-Benz Arena-ah Armenia 6-0 in an sawp.

(A sei leh ta khawp mai. Chhiartu tam lo mah se kan vui lo a, comment tam kan beisei lo. Germany ṭantute tlem a zawng ril ṭamna a hnem theih chuan kan lawm tawk e)

PLAYER A NI LO
Euro 2020 laiin Germany-in player an nei ṭha tawk lo, an ti. Amaherawhchu player ni loin Joachim Low zawk mawhpuh tur chu a ni ta. Hansi Flick hnuaia match hnih lek an la khel chungin team dang daih an ni tawh.

World Cup 2018 qualifier khelh lai kum 2017 aṭang daih tawh khan Germany inkhel hi a nung tawh lo hrim hrim a, Euro 2020-ah Portugal nen game hmuhnawm khel mah se game nghet ṭha tak an khel lo. Tunah erawh postion tinah an nghet ṭha hle (An tumpuite erawh team ṭha an la ni lo).

Player chungchangah chuan website transfermarkt chuan khawvela team hlu a tarlanah pangana an la ni pha a, player aṭanga teh phei chuan anni aia hlu chu England leh France te chauh an awm. Germany-in player an nei ṭha tawk lo tih chu a dik thei dawn a mi? Hniah duh kan awm chuan comment lamah aw…

TLARHNUNG HI
Hansi Flick-a’n khelh dan phung nghet 4-2-3-1 a nei a, chumi mila player thlang tur chuan a thawkrim tih a lang. Germany-in Liechtenstein leh Armenia an hmachhawn ṭumah hian Flick-a kut hnu hmuh theihin a awm der tawh.

Goalkeeper bikah chuan buaina a awm lo, Flick leh Low emaw coach dang pawh ni se Manuel Neuer a dam ṭhat chuan a lut ang tih a ni tawp. Bayern Munich keeper leh Germany captain hi a la rintlak. Tlarhnung hi Germany buaina chu ni ta a, hmun pawimawh a nih bawk avangin Low chuan risk duh loin midfielder ṭha bik Joshua Kimmich chu right back-ah a sawn phah hial.

Defence laia inkawp turah Low-a’n Antonio Rudiger leh Matthias Ginter te a hmang a, a chang leh defender pathum te a hmang bawk. Euro 2020 dawnah chuan Germany boss hian inrintawkna hlohin, thlan tawh lo tura a sawi Mats Hummels a ko let. Low hian a ‘system’ ni loin ‘player’-ah a innghat a, buaina a nei chho dawn tih chu Euro 2020 ṭan hma hauhin a lang ruak reng a ni.

Flick-a’n Germany an enkawl ṭan a, Low-a hnuaia hmun pawimawh changtute tel lo pawhin buaina a nei lo. Bayern defender Niklas Sule leh Euro 2020-a koh loh Thilo Kehrer te chu defence laiah a inkawptir a, Kehrer hi PSG tana khel laiin French club tan tun season-ah a la inlan vek.

Left back-ah Robin Gosens a rawn awm a, right back-ah Ridle Baku a hmang. Armenia nen erawh Gosens inhliam vangin a khel thei lo a, system ngai chiahah player rem dan a thlak. Kehrer chu left back-ah a sawn phei a, Sule leh Antonio Rudiger te an inkawp.

Gosens-a inhliam thlak tur hian Hoffenheim defender David Raum (K-23) leh Freiburg defender Nico Schlotterbeck (K-21) te chu rin an ni a, Flick erawhin Kehrer a ring ta zawk. Flick hian right back pawh rawn thlakin Ridle Baku aiah Jonas Hofmann a thlang a, kum 29 mi hi ram tan vawi tam en kan a ni tawh a, Flick erawhin chance vawi hnih a rawn pe ta. Liechtenstein lakah Gladbach player hi bench atangin a rawn lut a, a khel ṭha.

Chutihrualin coach ṭha Flick-a hnuaia chuan mihring an pawimawh ber lo a, an khelh dan a pawimawh ta zawk. Player-ten an tihtur an hriat a pawimawh a, Germany khingpui an la ṭhat tawk loh bawk avangin player-ten an tihtur an hre chiang hle.

MIDFIELD HI
Toni Kroos tel lohna midfield hi ruak hung tura ngaitu pawh an awm thei a, Real Madrid midfielder hi sawi nep chi rual a ni lo bawk. Chutihrualin Flick-a duhthusam nia lang zawk chu Kimmich leh Leon Goretzka te dah kawp a ni a, England leh Germany inkhelh ṭuma Goretzka chet dan hmutu tan chuan Bayern midfielder hi dah san a har ang.

Mahse maw, Goretzka leh player dang khelh ṭhat tawk loh chhanah khan Low-a’n mawh a phur zawk. Chumi piah lamah chuan Goretzka nen inkawp rem em em, Kimmich chu right back-ah chhawr a ni daih bawk. Liechtenstein an hmachhawn tumin Kimmich leh Ilkay Gundogan te an inkawp a, Manchester City midfielder pawimawhin Germany-a hmun pawimawh a chang pha chiah lo hian an squad chhah zia a pholang.

No. 10 role chelhtu Chelsea midfielder Kai Havertz a dam ṭhat loh avangin Marco Reus a rawn awm a, Borussia Dortmund captain zuna uai tawh chuan ani aia tha player tih an ngah kher lo ang. Chutihrualin helai hmuna awm thei tur hi Thomas Muller a awm bawk avangin bul ṭan phak a har dawn.

GOAL NAWRTUTE
Germany-in tun dinhmunah Timo Werner aia ṭha an kawl lo a, hei hi Joachim Low-a hmuh fuh loh a ni. England lakah Werner hian bul tan mah se group stage match thumah Chelsea striker hi bench-ah ṭhuttir ṭhin a ni a; Flick erawhin Bayern Munich-a a sengluh theih loh striker hi rinrawlah a hmang.

Mual sira awm tur chuan Bayern Munich duo Leroy Sane leh Serge Gnabry te an awm. Sane hi tun season-ah Bayern Munich ṭantuten an au el nasa a, a chhan ber chu a man phu khawpin a khel ṭha tawk loah a ngai. Julian Nagelsmann-a’n mual vei lamah a hmang a, hma a sawn hle. Flick pawhin Sane hi mual vei lamah a rawn hmang leh ta chiah. Club enkawltu coach leh ram enkawltu coach te inkarah boruak ṭha a awm tih a lang a, national team ṭha din turin hei hi a pawimawh reng a ni.

Flick hian Kai Havertz-a chungchangah Thomas Tuchel ngaihdan a la a, Werner chungchang pawh an sawi tel ngei dawn. German coach pahnih thil hriat inhrilh tawn hian hmasawnna a awm phah ngei ang.

A GOAL MAWLH MAWLH
Liechtenstein ang lo takin Armenia-in an nawr ngam a, captain Henrikh Mkhitaryan chu Manchester United leh Arsenal tana khel tawh a ni a, Borussia Dortmund atanga lar chhuak a nih avangin Germany hi a hrechiang ngei ang le.

Mahse, Armenia tan Germany an ṭha mah mah. Flick-a enkawl Bayern Munich-in goal an khung tam ang bawkin Germany pawhin goal an khung tam. Minute rukna lekah Gnabry-a’n angle zim tak atangin kawh zetin a pet goal a, Bayern forward goal phenah hian team game mawi hmuh tur a awm.

Gnabry hian Werner a pe a, Chelsea forward hian Goretzka pe lehin Bayern midfielder hian Gnabry tlan lut nena innang fuh tawk turin box chhungah a thawn lut a, goal mawi tak hmuhin a awm. Gnabry hian a tih thin angtin thingpui no chawk ni awm fahranin a kut chu a ti vir a, hei hi NBA star James Harden a tih dan a entawn a ni tlat (hre lo kan awm takin).

Leroy Sane a hmuhnawm a, goal hnihna erawh Gnabry ke aṭangin bawkin a chhuak – team goal tho a ni. Sane-a’n a khalh lut a, Goretzka a pe, Bayern midfielder hian Reus a pe a, Dortmund captain-in a cross lut. Timo Werner-a’n a dummy (pet ṭhelh) a, Gnabry-a’n minute 15-naah goal-ah a chantir. Germany ṭantute naupang pakhatin Gnabry goal khung lawm dan angin a lo lawm ve, a lawmawm reuh khawp mai.

Germany-in pressure an pe nasa a, Armenia-in an tihsual phah. Gnabry-a’n vengtu nei lo Werner a pe a, ball pass a nat hret avangin keeper-in Chelsea forward a rawn ti buai hman. Minute 35-naah goal thumna hmuh a ni ta tho a, Gnabry-a ball vawrhluh chu Werner-a’n flick letin Reus-a’n kawh zetin a volley goal – class heuh heuh tak chu a ni.

Goal lina hi minute 44-naah a lut a, hei pawh hian replay chu a dawl leh pek khawp mai. Kimmich-a’n buai miah loin ball a dinpui a, ding leh vei lamah a hawi kual hnuah a ke vei lamin Goretzka tlan lut tana tauh nuam tur tawkin a vawrh lut a, Bayern midfielder hian Werner tana siam sakin Chelsea forward-in a ti goal. Tun hnaia fiamthu thawhna lek lek atana an hman Werner-a’n Flick-a hnuaia match hnih a khelhah goal hnih a khung der.

Werner hi a vanduai zawk, second half-ah a goal khung chu offside vangin an pawm lo. Gnabry-a’n hattrick a siam sak theih nan duhsak takin Werner hian Bayern forward hi a tih goal theih reng a pe a, Gnabry-a’n a tlawn hman lo chiah chiah.

Chutihrualin Germany erawh an hmuhnawm chhunzawm a, minute 52-naah Kimmich-a’n corner aṭanga ball petin box chunga vawrh lo loin box pawna awm Hofmann tan a vawrh. Gladbach player hian a ke dinglamin vawi khatah a rawn volley goal nghal.

Flick-a’n bench aṭangin Jamal Musiala leh Florian Wirtz te a luhtir a, kum 18 mi ve ve an ni. Player pahnih hi an hmuhnawm nghal a, chance ṭha bik rawn siamin Hofmann-a ball pet chu goalline atangin Armenia defender-in a dang.

Minute 72-naah goal hnih khungtu Gnabry chu Karim Adeyemi-a’n a rawn thlak a, kum 19 mi striker chevel a hmuhnawm hle. Injury time-ah Wirtz-a’n right back Hofmann nen wall pass hmangin Armenia midfield an ṭhiat a, wall pass hmang bawkin Wirtz leh Adeyemi ten tlarhnung an thiat a, RB Salzburg forward hian ram tana a khelhna hmasa berah goal tha zet a khung.

Germany-in goal ruk an khung a, Flick-a enkawl leh Low-a enkawl team danglamna a lang. Chutihrualin Low-a hnuaiah Germany-in World Cup nomawi an chawi a, Flick-a’n Low elpha tur chuan hmabak a la ngah hle.

NEXT ICELAND
Germany-in September 9, Nilaini zan dar 12:15 hian Iceland an hmachhawn dawn a, hnehna an chang thei a nih chuan Flick-a leh a hote tan World Cup a hnai sawt dawn.

Low hnuaiah khan Germany-in Iceland leh Romania te an hneh tawh a, amaherawhchu North Macedonia an hneh loh avangin table chung berah an awm lo. Flick-a hnuaiah erawh vawi hnih an chak a ni ringawt lo a, hmahruaitu Armenia lakah goal ruk nghawt an khung avangin table chung berah an awm mek a ni.