“Point thum kan hmu dawn” – Paulo Meneses

Naktuk chawhnu dar 2-a NEROCA mikhual tur Aizawl FC coach Paulo Meneses chuan naktuk inkhelah hian point thum an hmu dawn tih a sawi.

Mualneitu Aizawl FC hian NEROCA aiin match khatin an khel tlem a, point 14 neiin pangana an ni mek. Naktuk inkhelah hian an chak a nih chuan palina an ni thei dawn a, amaherawhchu point 18 nen a pathumna ni mek NEROCA hneh hi thil awlsam a ni dawn lo.

Chak tum Meneses

Aizawl FC in an home match hnuhnung pahnih atangin point 4 an hlawh chhuak a, an mikhual leh tur NEROCA nena an inkhel tur hi inkhel pawimawh bik a ni.

“Kan khelmualah kan khel dawn a, point thum kan hmu ngei ang. Si khat chauh pawhin chak ila, ka lawm ang. Point thum hmuh hi kan tum ber a ni,” tiin Portuguese coach hian a sawi.

Aizawl FC tan a thu lawmawm lo erawh David Lalrinmuana a la khel thei dawn lo a, tlarhnunga chhawr rim Masih Saighani pawh yellow card pali (4) a hmuh tawh avangin suspend a ni a, a aiah C.Lalrosanga a lut dawn tih Meneses chuan a sawi bawk.

NEROCA ve thung hi

Manipur club NEROCA hi an state atanga I-League club hmasa ber an ni a, Imphal atangin inkhel en tur fans an rawn nei dawn hial a, an khelmualah phei chuan tantu an nei tha thei hle. Tun season-ah vawi 9 khel tawhin an match hmasa ber a Minerva Punjab an hneh lo tih loh chu hneh loh an la nei lo. Tun season-ah an lamah goal nga (5) lut tawhin goal chhuah tlem ber an ni bawk.

An coach Gift Raikhan hi Pune FC academy coach hlui a ni a, Mizo footballer hrual a ngah tawh hle. “Mizo footballer zingah thian tha leh enkawl tawh ka nei nual a, unau ang mai kan ni. Naktuk inkhel tur pawh hi derby angah ka ngai chiah lo. Aizawl hi AFC ‘B’License ka zawhna hmun a nih bawk avangin ka tan chuan ‘homecoming’ ang mai a ni,” tiin Raikhan hian a sawi a, Pune FC-a a enkawl thin Mizo footballer boral ta Lalrinawma Lianhna hming a lam laiin a hnuk a ulh hial.

Player en bik tur te

Champion lai Aizawl FC player zingah tu ber hi nge an innghahna tih hriatthiam a har a, game riat an khelh tawhah erawh Avilash Paul, Kareem Omolaja, Leonce Dodoz leh Alfred Jaryan te chhawr rim an ni. Tlarhnungah Masih Saighani a din theih dawn loh avangin NEROCA hmatawng tawnhriat ngah Subhash Singh leh Nigerian striker Felix Chidi dang turin Kareem-a khelhthat a tul dawn a, an lak thar hnua chhawr rim R.Laldinliana sawi hmaih a thiang lo bawk.

NEROCA tan an goalkeeper leh captain ni bawk Lalit Thapa hi an inghahna a ni a, tlarhnunga ding Liberian defender Kallon Kiatamba leh Australian Aryn Williams te hi an la inlan kim vek a, Gouramangi Singh an la nei cheu.

Season hmasa Durand Cup-a Aizawl FC laka goal awmchhun thuntu Mizo tlangval David Lalbiakzara chu a khel dawn tih an coach hian a sawi chiang a, hmatawngah Felix Chidi leh Subhash Singh bakah Haitian attacker Jean Francis Fabien Vorbe hi chhinchhiah tur a ni a, Ukraine club tha Dynamo Kiev midfielder hlui, kum 23 lek a upa Akhlidin Israilov hi an ram Kyrgyzstan tan pawha vawi 12 inlan tawh a ni a, a en tlak viau ang.

Posted in AIFF, Aizawl Football Club, I-League, Ramchhung.

Leave a Reply

Or