POOM: “KA JERSEY HAK TUR PAWH CLUB KHAN MIN SIAMSAK LO..”

April 5, 1997 a ni a, English football a in barakhaihna a thleng a. Derby County chuan Manchester United chu 3-2 in an hneh a, hemi tuma hming langsar ber chu Derby goalkeeper kum 25 mi Mart Poom a ni.

“Ka jersey hak tur pawh club khan min siamsak lo,” tiin United an hmachhawn dawn khan Derby chuan a jersey hâk tur pawh an siamsak lo tih Poom chuan a sawi a. A sawi zelnaah, “Kan inkhelh dawn zingah Manchester United club dawrah Russell Hoult-a jersey kha an keng phei a. A hming leh a number kha rawng dum an hnawih hnan a, chumi chungah chuan ka hming leh jersey number 21 tih kha an va chhut chawp tir a ni,” tiin Estonian goalkeeper chuan Old Trafford-a an inkhelh hma boruak a sawi.

Poom hian a pianna khua Tallinn a University of Technology-a lehkha a zir thlengin a naupan lai atanga a ngainat em em football chu a thlah hleithei lo a. A thlah lo mai ni lovin a zirna zawk chu a thlah ta zawk a. Engineer nih tuma lehkha zir khan football khelh a thlan tâk avangin an university atang chuan a bâng ta tawp a, an khaw club Tallinna Lovid leh Sport Tallinn ah te bul tanin football chu ‘full time’ in a khel tan ta a.

Kum 22 a tlin kumin Portsmouth chuan an la ta hlauh a. A mumang ramah a chêng tan tihin an ram Estonia chu European Union-a an tel loh avangin work permit a hmu thei ta si lo a, contract la nei mahse Fratton Park chu hreh tak chungin a chhuahsan leh ta a. Mahse a nghet ni lovin loan in an khaw club FC Flora chu a zawm a. Kum 3 an ram club a loana a khelh hnu chuan kum 1997 ah England a khel thei turin work permit a nei ta chauh a ni.

October 9, 1996 a ni a, Estonia leh Scotland te chu zan dar 6:45 ah World Cup qualifier khel turin an in buatsaih a. Mahse Scotland lampang chuan an khelhna tur Kadriorg Stadium chu light a that loh thu FIFA hnenah an thlen a. FIFA chuan inkhelh hun chu chawhnu dar 3:00 ah an sawn hma thut a. Hei hi an khelhna tur stadium atanga km 60 vel laia hla a inkulh Estonia team chuan chhunah an hre chauh a.

Hemi chungchang hi Poom chuan sawiin, “Estonia football federation chuan zana khel turin ticket te pawh an zuar vek tawh a. Chhunah inkhelh hun sawn a ni tih kan hriat chauh avangin kan team hruaitute chuan a hma a kan lo in puahchah tawh angin zana inkhel turin kan in buatsaih chhunzawm a. Mahse Scotland chu chawhnu dar 3:00 a khel turin stadium an lo kal chu niin, kan tel lovin an lo inkhel ta a nih kha,” tiin a sawi.

FIFA chuan hemi chungchang hi ngaihtuah nawn lehin Estonia leh Scotland te chu inkhel tha leh turin an ti ta a, Scotland lam an lungawi lo hle a. An han inkhel ta a, Scotland tana khel tha tak mai Duncan Ferguson leh Gary McAllister te aia khel tha lehzual a awm a, chu chu Mart Poom ngei mai hi a ni. Poom khelh that a zarah goal lut lovin an in hnehtawk ta a ni.

Heta Estonia leh Scotland inkhel hi Portsmouth a Poom laluttu Jim Smith bawk chuan a hmunah a lo en leh a. Jim hi hetih hunlai hian Derby manager ni tawhin Derby chu Premier League-ah a kaipui nghe nghe a. Jim hian Poom chu a la duh reng a ni ang chu, transfer bazar inkhar ni hma chiahin kum 1997 March thla tawpah Derby-ah a lalut leh ta a ni.

Paulo Wanchope leh Dean Sturridge te ho nen Derby chu hma an sawnpui hle a. An club chanchina a vawikhatna atan English top flight football ah 8-na niin Derby chu an rawn lar chho hle a, UK lalnu Queen Elizabeth II pawhin an club a tlawh hial a nih kha.

Hemi hnu hian Poom pawh hi a lar chho in Derby aia club lian zawk Everton, Ipswich Town leh Manchester United te atangin sawmna te pawh a dawng a. Mahse Estonian goalkeeper chuan, “A bikin Everton leh Manchester United ten min duh tih ka hriat kha chuan hetiang ang sawmna te hi chu player tupawhin an hnawl ka ring lo. Mahse kan hotute ka nawr lui duh lo a, tin he club (Derby) ah hian ka rinawm in he hmunah hian kan chhungkua pawh kan in bengbel tawh a. Chuvang chuan insawn loh pawh chu pawi ka ti ta lo a ni,” tiin a sawi.

Poom hian kum 20 chuang professional football a khelh chhunga hrehawm a tih tlemte zingah May 17, 2006 a Arsenal in UEFA Champions League final a FC Barcelona an hneh loh kha niin a sawi a.

Hemi season hian Poom hian Arsenal hi zawmin UCL final a Arsenal squad a awm kha a lo in beisei ve hle a. Mahse squad-ah a tel ta si lo a. Stade de France a UCL final khelh chu a sir atanga a lo en zingah a tel ta a.

He inkhel chungchang hi a thlir lêt a, Estonian hranghlui kum 47 mi chuan, “Lehmann hnawhchhuah a nih khan ka bulah a rawn thu a. Almunia a han tlân luh khan ‘Keimah zawk ka ni thei asin mawle’ tiin ka lo ngaihtuah a ni,” tiin UCL final a a inlan lo chu a ui thu a sawi.

Estonia tana vawi 120 zet mai inlan Poom hian football a chawlhsan hnuah Arsenal goalkeeping coach in a awm rên râwn a. Chumi hnuah kum 2009 khan Estonia National Team tan goalkeeping coach hna thawkin he hna hi vawiin thlengin a la thawk a ni.