Praful Patel : Aizawl FC vauna in AIFF tizam lo

Tunhnaia Aizawl FC in ISL an khelh theih loh tur thuthang chungchangah AIFF President Paful Patel chuan Aizawl FC in AIFF an vaunaah te chuan AIFF chu an zam phah loh thu a sawi.

Paful Patel chuan Aizawl FC in thih thlenga chawnghei a an vauna chu dik lo a tiin Aizawl FC chu nikum 2016 a relegate an ni chungin AIFF in club phurna leh tuina te chu a hmuh avangin kumin I-league khelh tir leh chauh an nih thu leh heti chunga an rawn complain hi thil dik a ni lo a, tin thu an tihthluk hma a in vau chuan awmzia a neih loh tur thu a sawi rualin, Aizawl FC chak theih nana thawk tu zawng zawng te chu a lawmpui thu a sawi bawk.

Aizawl FC secretary general Vanlalnghaka Chhawnchhek chuan, “AIFF-ah ISL nena an tihfin hnuah pawh League sang bera khelh chhunzawm hi kan dil a. Mahse Kushal Das (AIFF general secretary)-in second division a kan khelh tur thu min hrilh hnu ah thuchhuah (in vauna) hi kan siam a, kan chanvo chu kan chuh ve a thiang a ni” a ti a. Praful Patel erawh chuan “Lehkha an rawn thehluh thu an sawi a, mahse kei chuan ka hmu ve lo a ni. India football kal zel dan tur leh nakum lama a ruangam chu engmah tihchian a la ni lo chungin vauna te an rawn tichhuak a, AIFF lakah hetiang hian awmzia a nei lo a ni. Tunah hian I-League hi official league a ni a, chutah chuan an la khel dawn a, League sang berah an la khel dawn a, in vauna thu chhuah hian awmzia a awm lo a ni” a ti.

Vawiin hian AIFF chu an thu dawn a, hetah hian ISL nena an in tihfin dan tur leh an kal zel dan tur an rel dawn a ni.