Zirtawpnia Beijing National Stadium, Beijing-a pre-season friendly match ah Manchester City chuan Yaya Toure leh Pablo Zabaleta te goal hmangin Arsenal 2-0 in an hneh.

Friendly ‘mai mai’ mah nise intum turte an hrawl hre hraw bawk a, manager pahnihten team tha tak an luhtir ve ve a. Manchester City manager Roberto Mancini chuan a player neihthat ber ber Tevez, Aguero, Yaya Toure, Kompany, Zabaleta te a tir atangin a luhtir vek a, Arsene Wenger pawhin Vermaelen, Arteta, Alex Song, Gervinho leh Walcott te a luhtir ve bawk. He inkhelah hian beisei aiin entu an tlem a, stadium hmun li a thena hmun khat vel lai a ruak a ni.

First half-ah City goal 2

Pre-season match 3 khel tawh Manchester City hian bul an tan tha zawk a, a tirlamah a sir atangin Arsenal defence an thiat phei zauh zauh. Inkhelh tan atanga minute 15 chhungin Kolarov leh Biton ten Man City tan chance tha tak tak an hloh a, Aguero leh Tevez pawh kan hmu ngun hle. Mahse rei an inkhelh hmain Premier League-a ‘possession game’ khel thiam ber Arsenal in ball an chang tam tan a, Walcott a langsar tawlh tawlh a, a goal shot, Vincent Kompany lo dan chu Arsenal tan uihawm tak a ni. Carl Jenkinson leh Santos ten chance tha tak tak an neih an hlah bawk.

Arsenal khelhthat lai takin a bet zawk City in goal hnih an thun a. Minute 41 ah Zabaleta chuan Yaya Toure ball pek chu hnai zet atangin a pet goal a, minute 44 ah Yaya Toure hian a pet goal zui ve bawk. First half a zo a, ball chang tam zawk Arsenal in sihnih an phur.

Second half: Ruah a sur, goal a sur ve lo

Second half ah Arsenal in bul an tan tha zawk a, City hian goal venhim an ngaipawimawh zawk niin a lang a, mual laiah Arsenal player an langsar viau. Minute 49 ah Gervinho chuan chance a nei nghal a, Arsenal naupang rual ten ro an rel dawn niin a lang hman. Mahse experience ngah zawk City defence a khawng chhunzawm a, minute 56 a Alex-Oxlade Chamberlain shot, goal ban pahnih a per ve ve hnua sawtchhuak leh ta tih loh chu Arsenal in clear chance an hmu meuh lo.

Inkhel tawplama Arsenal goal nawr a hmuhnawm tluk zetin City nawrlet (counter attack) a hmuhnawm a, Aguero chip goal loh te, Gibbs leh Aneke long shot, City keeper in a lo save te, Eastmond thun loh te chu goal hlauhawm zual a ni. Second half ah hian ruah a sur avangin duhthusamin field a tha lo a, team pahnihten an duh ang thalin an khel thei loh phah niin a lang. Inkhel hmuhnawm chungchuang a ni lo a, players zingah kan hriatsa an tam avang leh, club lian leh club lian inkhel an nih avangin inkhel entlak tak erawh a ni e.

Manchester City (4-3-1-2): Pantilimon; K Toure, Kompany (Boyata 56), Savic, Kolarov; Zabaleta, Biton, Razak (Denis Suarez 87); Y Toure (Johnson 76); Aguero (Lopes 90), Tevez (Evans 83). Subs: Johansen (g), Scapuzzi, F Mancini.

Arsenal (4-4-2): Fabianski; Jenkinson (Aneke 65), Bartley (Miquel 46), Vermaelen, Gibbs; Walcott (Chamakh 46), Diaby (Coquelin 46), Song (Eisfeld 76), Arteta (Oxlade-Chamberlain 46); Santos (Afobe 57), Gervinho (Eastmond 65). Subs: Szczesny (g), Miyaichi, Yennaris.

Referee: Howard Webb.