Pathianni zanah Premier League match 5 a awm a, game chhinchhiahtlak tak tak kan hmu. Khualmualah Chelsea an tlawm a, tunhnaia rawn che ṭha chho tak Arsenal an chak thung.

Arsenal (Gervinho 27′, van Persie 73′, 82′) 3 – 1 Stoke City (Crouch 34′)

Arsenal season a fuh chho zel a, Pathianni-ah an mikhual Stoke City chu 3-1 a hnehin table chunglam an pan zel. Emirates Stadium-a inkhel hmuhnawm takah hian Arsenal captain Robin van Persie chuan goal 2 a thun a ni.

First half-ah goal 1 ve ve

Arsene Wenger-a’n a captain van Persie bench ah a ṭhuttir a, tlarhmaah Chamakh, Gervinho leh Walcott te a luhtir. Inkhel ṭantirh phat aṭangin Welsh midfielder Aaron Ramsey a langsar a, Arteta nen game an thunun. FMinute 20 chhungin Arsenal tân Chamakh, Arteta, Gervinho leh Ramsey ten pet goal theihna chance an nei vek a ni.

Minute 27 ah Gervinho hmangin mual neitu lam hian an pet goal ta nge nge a. He goal hi Ramsey ‘assist’ niin Arsenal a zawm hnua Gervinho goal 2 na a ni. Mahse Arsenal in hma an hruai rei lova, Crouch chuan minute 34 ah Stoke City siphurh a rawn sut a, hemi hnu hian team pahnihte an inbeitawk viau mai.

Oh captain my captain

Second half-ah Arsenal game a tlahniam a tih loh theih loh. Goal nawr na zawk leh ball chang tam zawk ni mahse goal an thun lawk thei bik lova, Stoke City defender te an ‘confi’ tawlh tawlh mai. Mahse minute 66 ah Premier League striker ‘hot’ ber tih theih van Persie a rawn lut a, Stoke City bang a ding rei lo.

Van Persie hian minute 73 leh 82 ah a pet goal a, heng goal pahnihte hi Gervinho siamsak ve ve a ni. Arsenal fans an hlim a, season tira tlawlh reng mai Arsenal laipui a puak deuh reng tawh mai. Arsenal hi an game hnuhnung 7 ah vawi 6 an chak tawh a, tunhnaia an game hnuhnung 5 ah an la chak vek. Tunah hian point 13 hmu tawhin Premier League-ah 7 na an ni mek a, an player ṭha te hi an inhliam lo a nih ngat chuan hma an sâwn zel dawn niin a lang.

Queens Park Rangers (Helguson 10′) 1 – 0 Chelsea

First half-ah red card 2

Inkhel ṭantirh aṭangin football game rang tak kan hmu a, team pahnihten passing game an khel. Minute 9 chiah a la ral tihin David Luiz chuan penalty box chhungah Helguson a tihtluk avangin penalty a chawi a, penalty hlawhchhuaktu Helguson hian he inkhela goal hmasa ber hi a thun zui a ni.

Goal a luh hnuah Chelsea game a fuh thei bik lo. QPR player te an thawkrim a, ball an chan loh laiin a laiah an inhnawhkhawm tlat a, Faurlin leh Derry ten Chelsea forward te ball inpekual tur vawi engemawzat an dangchat. Mahse player ṭha zawk Chelsea in chance an nei zeuh zeuh tho a, goal hlauhawm tak erawh a tam lem lo.

Chelsea an hlauhawm dawn chiah tihin Bosingwa chuan Wright Philips a pawhthluk avangin red card a hmu a, minute 41 ah Drogba chuan QPR player a tlawh vangin red card a hmu bawk.  Bosingwa red card zawk hi chu Chelsea fans ten awm lo an ti khawp ang.

Second half A tlem zawk an thiam zawk

Second half-ah player 9 a khel Chelsea an khelṭha tluanchhuak zak a. Si phurh belh inhuamin an nawr a, goal ah vannei deuh se chuan an siphurh an sût mai bakah chak thei dinhmunah an ding.

Minute 69′ ah Lampard chu penalty box chhungah tihtluk a ni a, mahse referee in penalty a pe lo. Chelsea goal bawh a na a, a tam zawk leh home-a khel zawk QPR an bet tawlh tawlh mai. Counter attack-ah mual neitu hi an hlauhawm thung a, second half laihawl vel aṭang chuan hmuhnawm tak a ni. Chelsea player te an ṭang deuh nge ni, red card 2 bakah hian yellow card 7 tehmeuh an hmu a, Ashley Cole phei chu tun season-ah yellow card 5 a hmuh tawh avangin match 1 hrem a ni ang.

Chelsea hian minute 80′ ah Anelka hmangin an thun teuh hle a, Lampard leh David Luiz te pawhin chance ṭha tak tak an neih an hmang ṭangkai lo. Hei hi tun season-a QPR in home game an chak hmasa ber a ni a, Chelsea tân tun season-ah vawi 2 an chak lohna chiah a ni bawk.

Inkhel result dang

Blackburn Rovers (Formica 28′) 1 – 2 Tottenham Hotspurs (van der Vaart 15′, 53′)

Fulham (Ruiz 67′) 1 – 3 Everton (Drenthe 3′, Saha 90′, Rodwell 92′)