Premier League gameweek 8 ah club lian pahnih, Chelsea leh Arsenal ten an khingpui an hneh ve ve a, Champions League khelh phak tum Tottenham Hotspurs an chak zo lo thung.

Chelsea 3 – 1 Everton

Season tirah Manchester khaw club te angin thawm nei lian lem lo mahse ngawirengin Chelsea an kal tluang zel a, Stamford Bridge-ah Everton 3-1 a hnehin pathumna dinhmun an sawh nghet zel. Chelsea hi tunhnaiah an ‘form’  khawp mai a, game hnuhnung pahnihah goal 8 an thun tawh.

He inkhelah hian English striker Daniel Sturridge chuan minute 31 ah Chelsea goal hmasa ber a thun a, he goal-ah hian Mata finzia kan hmu. Torres tel lova khel Chelsea game a mawi a, tlarhmaa Mata, Sturridge, Drogba leh Lampard te inkawp a fuh ngei mai. First half-ah team pahnihten goal chance tha tak tak an neih hnuah minute 45 ah John Terry chuan Lampard freekick atangin a head goal.’

Second half tan chiahah Osman chuan Everton tan a thun tep a, hemi hnulama Chelsea ball inpe kual vel chu a ‘mawi’ thei kher mai. Minute 61 ah Ramires chuan Chelsea tan thun lehin 3 – 0 a ni a, he goal hi Mata siamsak tho a ni. Everton lam pawhin chance an neih nual hnuah Vellios hmangin goal 1 thun ve mahse ‘Blues’  hmatawngte an dang zo lova, Chelsea hian point 3 chiahin pakhatna ni lai Manchester City an pha lo.

Juan Mata : The ‘new’ show runner

Tunhnaiah Chelsea in Everton an chai hleithei lo thin a, an inkhelh hnuhnung pasarih ah chak an nei ngai lo. Everton hi Stamford Bridge-a an game khelh hnuhnung 5 ah chak loh la nei lo an ni a, mahse heng game 5 ah te hian Juan Mata an la hmachhawn ngai lo.

Football chu team game ni mahse team tinah player langsar bik hi chu an awm deuh zel a. Chelsea-ah hian khawi position-ah pawh player tha an awm vek tih theih tur khawpin an tha a, chutichungin Inrinni zana langsar ber chu Spanish midfielder ball thiam Juan Mata hi a ni. A mit a fing em em a, ball tel lova insiamrem a thiam em em bawk. A passing that thu hi chu sawi tam pawh a ngai awm lo e. Chelsea hi an champion a nih ngat chuan Juan Mata hi an champion chhan zingah a tel ngei ang le.

Rooney thlaktu tur Sturridge?

Daniel Sturridge hian England senior team tan a la start lova, mahse tuna a khelh dan en hi chuan Capello hian a koh vat a rinawm. A game hnuhnung 4 ah goal 4 a thun tawh. Team tana a tangkaizia ngaihtuahin a goal thun hi chu a ve chauh a ni zawk mah awm e.

Euro 2012 ah Wayne Rooney chuan group stage a khel dawn lo a, a thlaktu turin Sturridge hi an hual ru ta fur mai. Season tawp hmain game tam tak a la awm a, tuna a form hi a chhawmnung thei a nih ngat chuan England fans ten Sturridge hming hi an sa rual dual dual maithei. Hmabak erawh a la tam ngei mai.

Tunlai chu Premier League-ah Chelsea game a hmuhnawm deuh ber mai awm e. Sturridge a awm a, Mata a awm tawh a, Lampard a rawn form leh tawh bawk nen, tun dinhmuna Chelsea tum hi thil huphurhawm tak a ni ngei ang. Villas Boas hian striker-ah Torres leh Drogba thlan tur a nei a, Malouda leh Anelka te pawhin bench bak an chang ta meuh lo. Ramires inhliam erawh an ui ve viau ang le.

Season tirah Manchester khaw club pahnih an vul hluai a, tunah chuan Chelsea sawi tel ve zel a ngai tawh ang.

Arsenal 2 – 1 Sunderland

Arsenal in Emirates Stadium-ah mikhual Sunderland 2-1 in an hneh a, captain Robin van Persie chuan goal 2 a thun.

Inkhel an tan chiah a, fans thenkhat an la thufel hman lo tihin Arsenal in an pet goal. Gervinho ball siamsak chu van Persie chuan second 29 lekah a pet goal a, hei hi tun season-a Premier League goal rang ber a ni. Goal an thun hnuah Arsenal ‘dik tak’  kan hmu zui a, passing game mawi tak kan hmu. An khelh fuh tum chuan Arsenal aia game ‘mawi’ hi Premier League-ah an la awm thei lo a ni e.

Arsenal in goal 2 na thun an tum a, van Persie leh Gervinho ten chance tha tak tak an nei. Mahse Black Cats ho zawkin he inkhela goal hnihna hi an thun ta zawk a, minute 31 ah Sebastian Larsson chuan freekick atangin mawi em em maiin a pet goal.

Second half ah team pahnihte an innawrtawn zak zak a, Sunderland keeper Mignolet a langsar khawp mai. Substitute Arshavin in ‘magic’ a show zuai a, Sunderland defender pathum a bum hnuah a pet goal teuh ngei mai.

Goal nawr na zawk Arsenal in minute 81 ah chakna goal an thun a, a pet goal tu chu Robin van Persie tho a ni. He goal hi freekick atanga a thun a ni nghe nghe. Inkhel tawp lamah Sunderland hian rawn nawr ve deuh mahse Arsenal in chak an phu zawk a, top half-ah an lang ve leh ta. First half-a an game enin top 4 lam pana an kal zel a rinawm.

Captain’s weekend

Tun weekend chu Premier League club lian captain te chetthat tum tak a ni awm e. Liverpool captain in hmelma kumhlun lakah goal a thun a, Arsenal captain in goal 2 a thun a, Manchester City captain in a thun a, Chelsea captain in goal a thun mai bakah a khel tha em em bawk. Goal thun ve lo Evra pawh a club tana khel tha ber pawl a ni.

Inkhel dang result

Newcastle United (Ba 48′, Amoebi 86′ ) 2 – 2 Tottenham Hotspurs (van der Vaart 40′, Defoe 68′)

West Brom (Brunt 8′, Odemwingie 75′) 2 – 0 Wolves