Part 1 ah khan Arsenal aṭanga Manchester United kan tarlang tawh a, tunah chuan Newcastle aṭanga Wolves kan en leh ang. (Celebrities te hi a tlangpuiin British milârte an ni a, EPL hi England rama khelh a nih angin thulâkna bleacherreport.com ah hian anni ho hi an tam ber a ni)

NEWCASTLE UNITED: Cheryl Cole, Sting

Ashley Cole nen an inneih ṭhin avangin Chelsea a ṭan emaw i ti maithei, mahse England ‘duh lai’ Cheryl Cole hi Newcastle United fan a ni hlauh thung. X Factor judge hlui hian Newcastle United jersey a la lei ziah a ni.

Politician te hi celebrities tia koh an ni ngai vak lo a, mahse milâr an nih ve tho avangin sawipawlh chang a awm fo mai. British Prime Minister hlui Tony Blair pawh hi Newcastle United supporter zingah chuan lar pawl tak a ni awm e. TV host lar tak pahnih Ant leh Dec (Britain’s Got Talent) te pawh Toon fans ruh tak an ni a,  zaithiam Sting, AC/DC singer Brian Johnson leh Shania Twain te pawh Newcastle United ṭantute zingah an tel.

NORWICH CITY: Stephen Fry

Norwich khuaa college kal ṭhin, British actor, journalist, TV presenter leh comedian ni bawk Stephen Fry hi Norwich City ṭantute zinga hriat hlawh pawl tak a ni ngei ang. Fry hi club ambassador a ni mek a, kum 2010 khan board of directors a zawm nghe nghe a ni.

Fry bakah rock band The Darkness, Prince Andrew leh TV host David Frost te pawh milâr zinga Norwich City supporter vek an ni.

QUEENS PARK RANGERS: Pete Doherty

Zaithiam, Libertines leh Babyshambles singer ṭhin Pete Doherty hi QPR fan ruh tak mai a ni. A club ṭan zawng te inkhel en mai a duhtawk lo a, QPR fanzine a ziak a, a music video ṭhenkhatah pawh QPR a ṭan zia hi a tilang ṭhin a ni

Fans dang zingah comedian Bill Bailey, The Clash guitarist Mick Jones leh Robert Smith te hian hriat an hlawh bawk.

STOKE CITY: Slash

Guns N’ Roses vanglaia an lead guitarist Slash hian a naupan lai hun Stoke khuaah a hmang a, Stoke City fan a ni hi thil âwm ve reng a ni awm e. FA Cup 2011 semi final-a Stoke City an chak hnu lawk khan twitter kaltlangin a lawmpuina thu a ‘tweet’ nghe nghe.

Tennis player Jeremy Bates, TV host Nick Hancock leh comedian Julian Clarey te pawh British milâr zinga Stoke City ṭantu te an ni.

SUNDERLAND: Peter O’ Toole

Irish actor zinga ropui ber tih theih Peter O’ Toole hi Sunderland fan ruh tak a ni a. Mahse Sunderland in Roker Park aṭanga Stadium of Light-a home ground an sawn hnuah tlemin a ‘dal’ ta deuh niin a insawi. O’ Toole hi stage leh screen ah hmingthang khawpin a lo tâl ve ve tawh a ni.

Mackems (Sunderland fans sawina) zingah Tim Rice leh Pet Shop Boy Neil Tennant te pawh an tel.

SWANSEA CITY: Catherine Zeta-Jones

Swansea City hi khawvela football team ṭha ber pawl chu an ni lo maithei a, mahse an fan zingah khawvela hmeichhe ‘ṭha’ ber pawl a tel. Swansea, Wales a piang leh seilian, actress Catherine Zeta-Jones chuan Swansea City fan ‘dik tak’ a nih thu a sawi. Naupangtê a nih lai aṭanga Swans (Swansea City fans an kohna) zinga ṭhanglian Zeta Jones hian Wembley-a Swansea City in play-off an khelh dawn pawh khan a hlauhthawn zia BBC South West Wales a hrilh a ni.

Cricketer Robert Croft, comedian Max Boyce leh zaithiam Cerys Matthews te hi Swans zinga langsar zual an ni.

TOTTENHAM HOTSPURS: Jude Law

Spurs fan Jude Law hi celebrities zinga football fan ruh pawl tak a ni ngei ang. He British actor hian Tottenham Hotspurs season ticket a nei a, UK-a a awm chuan Spurs inkhel a hmaih ngai mang lo. Nikum mai pawh khan Spurs training ground tlawhin Harry Redknapp leh players te nen an inhmu nghe nghe a ni.

Law bâkah hian musician Phil Collins leh author Salman Rushdie te chu Spurs fans an ni bawk.

WEST BROMWICH ALBION: Eric Clapton

Guitarist ropui, ‘Slowhand’ tia koh ṭhin Eric Clapton pawh West Brom fan a lo ni ve reng mai. Clapton hi a pi leh pu te bulah a seilian a, anni hi West Brom fans ruh tak mai an ni a, hei hi Baggies a nihna chhan lian tak a ni. Clapton hian tunhnaiah Chelsea a tuipui thar hle nia sawi a awm bawk.

Baggies zinga langsar deuh te chu  tennis player Goran Ivanisevic, TV presenter Cat Deeley leh comedian Lenny Henry te hi an ni awm e.

WIGAN ATHLETIC: Mikhail Gorbachev

Hei zet hi chu dangdai tak a ni. USSR president hlui Mikhail Gorbachev kha Latic (Wigan fans te sawina) a ni ve tlat mai.

Kum 1970 ah Soviet team Metallist of Kharkov leh Wigan ten friendly an khel a, khatih lai khan Gorbachev hi Metallist club assistant secrectary a ni. He match ah hian Wigan an khel ṭha hle a, heta ṭang hian Wigan hi a ṭanchho ta nia sawi a ni.

The Verve singer Richard Ashcroft leh Egypt Prime Minister hlui Hosni Mubarak pawh kha Wigan fan nia sawi a ni bawk.

WOLVERHAMPTON WANDERERS: Robert Plant

Led Zeppelin vocalist ṭhin Robert Plant hi Wolves fan ruhkawl a ni a,  kum 2009 aṭangin club Vice President ah ruat a ni nghe nghe. Plant hian ‘Kum 5 mi ka nihin ka pa in inkhel en turin min hruai a, Billy Wright (Wolves player hlui) in ka lam hawiin ban a rawn vai nghe nghe a ni.” tiin Express & Star chanchinbu a hrilh a ni.

Slade singer Noddy Holder, Olympian Denise Lewis leh Eric Idle te pawh Wolves fans ruh zinga chhiar tel ngam ṭhah an ni.

source: bleacherreport.com