Britannia Stadium hi Premier League-a stadium bengchheng ber a ni a, he hmuna lenluh hi Premier League club ten an huphurh ṭhin a, away a Stoke City tum hi thil chakawm a ni lo.

Inrinni zana Premier League khelhah Stoke City leh an mikhual Manchester City te 1-1 in an inhnehtawk a, Stoke City tân Peter Crouch chuan goal ropui thunin, he goal hi Yaya Toure chuan Man City tân a sût a ni. He result avang hian Manchester City chu Premier League hmahruaitu thar an ni leh ta a, mahse pahnihna Manchester United aiin goal difference chauhin an sâng a, vawikhat an khel tam tawh bawk a ni.

Team Line ups:

Stoke City: Begovic; Wilkinson, Shawcross, Huth, Wilson; Jerome (Pennant 51′), Whelan, Whitehead, Etherington (Palacios 81′); Walters, Crouch (Jones 93′).

Manchester City: Hart; Zabaleta (Milner 83′), Richards, Kolo Toure, Clichy; Barry (Tevez 74′), Yaya Toure; Silva (Adam Johnson 62′), Nasri, Balotelli; Dzeko.

First half a hmuhnawm lo

First half-ah team pahnihten goal an thun lova, goal thunna chance ṭha pawh an nei mang lo ve ve. Stoke City lamin tlarhma-ah palian pahnih Crouch leh Jerome te an dintir a, anni pahnih hi long ball an pe nasa a, game mawi tak tih tur ni lo mahse Man City defender te an tibuai ve deuh reng. Player nei ṭha zawk leh ball thiam zawk Manchester City in midfield an thunun a, an passing pawh a mawi zawk a, mahse Stoke City player te an inremkhawm fuh em a, a pawi tak tak hmain Man City forward te anlo dang thei deuh zel a ni.

Stoke City corner, tuma tawh loha Man City goal a luh tawh mai tur nia lang chu Zabaleta chuan goal line bul aṭangin a petchhuak a, hei hi first half-a Stoke City hlauhawm ber ṭum a ni. Man City hian Dzeko leh Balotelli hmangin chance an nei ve bawk. Goal chance a tlem a, game a rang lo a, first half hi inkhel hmuhnawm tih tur a ni lem lo.

Second half ah goal ropui

Second half ṭan aṭanga minute 1 pawh a ral hmain Man City hian chance duhawm lutuk an nei a, Edin Dzeko chuan keeper nen chiah an inhmachhawn tawh hnuin a pet goal lo.

Minute 59 a ni a, goal ropui kan hmu ta. Man City penalty box dinglam pawnah Peter Crouch chuan ball a chang a, ball a chantirh hian goal hnungchhawnin a ding a, hlauhthawn tur a awm lo. Mahse Crouch hian a ke dinglama ball a control (sêp) zet hnuah inher pahin a volley a, Man City keeper Joe Hart banphak lohah mawi takin a lût. Hetiang goal hi striker ṭha ten thun an châk ṭhin a, thiam bakah tihfuh leh vanneih tel a ngaih avangin mi tlemte chauhin an thun thei a, heng mi tlemte zingah hian Peter Crouch pawh a tel ve ta. Crouch hian hei aia goal ropui hi a la thun ngai lova, football a khelh chhungin hei aia goal ropui hi a thun tawh kher lo maithei !!!

Man City hian an siphurh sût tumin an nawr nghal a, goal hlauhawm pawh an nei zeuh zeuh. Minute 76 ah penalty box pâwn aṭanga Yaya Toure shot kawh zet chu Stoke keeper in a dang hman lo a, 1 – 1 a ni. Hemi hnu hian team pahnihte an innawrtawn zak zak a, a tawplamah Man City striker Tevez lo lut mahse Stoke City hi a hlauhawm zawk leh goal nawr na zawk an ni. A tawp thlengin goal dang a luhbelh lova, huntawp dawna Palacios leh Yaya Toure te long shot chu team pahnihten an ui vawng vawng ngei ang.

Tichuan….

Inkhelh hmain Man City manager Roberto Mancini chuan Britannia Stadium-a Stoke City khelh a harsat thu a sawilawk a, an game a ‘physical’ em avangin hneh an har thu a sawi. He Stoke City team hi Premier League-a team direct ber an ni maithei a, winger pahnih an nei a, anni hian striker palian an chawm leh a, a lai aṭanga mawi taka ball lakluh tih vel hi an game a ni tehchiam lo. Mahse he game ‘direct’ tak hi Premier League club lian tak takte lakah ṭangkai takin an lo hmang tawh ṭhin a, Britannia stadium hi a zim bik avangin winger an ṭangkai bik a, tlarhnung aṭanga long ball pet pawh a dik duh bik niin a lang. Inrinni zanah pawh ‘home advantage’ kan hmu leh ta e.

Manchester City hi tunhnaia away game 8 ah vawihnih chiah an chak a, tunhnaia pakhatna dinhmun an hloh chhan chu away a result an neih ṭhat tawk loh vang tih a chiang. Mancini naute hi experience neih loh vanga a tawplama zuihral tur niin mi ṭhenkhatin an sawi ṭhin a, away-a Stoke City hneh zawh loh hi pressure zo lo tihna a ni hauh lo a, mahse hun pawimawhah point an hloh hnem ta deuh. Player malkhaiah chuan Premier League-a ṭha ber an ni maithei a, heng player te hi season tawpa champion tum inum boruak hian a hmet khawng dawn nge dawn lo tih chu kan hmu zel dawn e.

Statistics

Inkhel dang result

Chelsea chuan Stamford Bridge-ah Tottenham Hotspurs an hneh zo lova, Champions League khelh tum team pahnihte hi goal awm lovin an inhnehtawk a ni. Inkhelh hmain Chelsea manager di Matteo chuan Tottenham an hneh ngei a ngaih thu leh, an hneh zawh loh chuan Champions League spot (palina) chan loh mai a hlauhawm thu a sawi a, palina ni tura an elpui berte hi an hneh zo chuang lo. Game 8 khelh tur a la awm a, point 5 in anni pahnih hi an la inthlau a, season tâwp hmain inlehpel hman tak ang maw?

Tunhnaia che ṭha tluang thei reng reng lo Liverpool an chak lo leh ta a, Anfield ah Wigan 1-2 in an hneh lo. Arsenal chuan a zawna Premier League game 7 an chakna ni turin Aston Villa 3-0 in an sawp thung.

Wolves chuan season lehah Championship lamah min liamthlaksan dawn ta nge nge niin a lang a, Norwich City an hneh lo a ni.

Chelsea 0 – 0 Tottenham Hotspurs

Arsenal 3 – 0 Aston Villa
Arsenal: Gibbs 16′, Walcott 25′, Arteta 92′

Bolton Wanderers 2 – 1 Blackburn Rovers
Bolton: David Wheater 29′, 35
Blackburn: NZonzi 56′

Liverpool 1 – 2 Wigan Athletic
Liverpool: Luis Suarez 48′
Wigan: Shaun Maloney (pen) 30′, Gary Caldwell 63′

Norwich City 2 – 1 Wolves
Norwich: Grant Holt 26′, 45′ (pen)
Wolves: Matt Jarvis 25′

Sunderland 3 – 1 QPR
Sunderland: Bendtner 41′ , McClean 70′, Sessegnon 76′
QPR: Taiwo 79′

Swansea 0 – 2 Everton
Everton: Baines 59′ , Jelavic 76′