Premier League tâwp a hnai tawlh tawlh a, rinlawk ang ngeiin result ‘rin loh’ tak tak kan hmu ta nawlh nawlh mai. Inrinni zana Premier League gameweek 31 ah champion tum Manchester City chuan a vawikhatna atân Etihad Stadium-ah point an hloh ve ta a, Sunderland nen 3-3 in an inhnehtawk.

Goal thuntute:

Manchester City: Mario Balotelli 43′(pen), 85′, Aleksandar Kolarov 86′

Sunderland: Sebastian Larsson 31′, 55, Nicklas Bendtner 45+3′

Tun season-ah Manchester City hian Etihad Stadium ah Premier League match 15 an khel tawh a, hneh loh an la nei lo mai ni lovin, hneh zawh loh pawh an la nei ngai lova, vawi 15 ah vawi 15 chak tawhin, season hmasa nen phei chuan a zawnin vawi 20 an chak tawh. Sunderland ve thung hi away record nei chhe ber pawl niin, tun season-a away match an khelh tawhah point 45 hmuh theih aṭangin point 15 chiah an la hmu a, hei vang hian Inrinni zana Manchester City in Sunderland an mikhual hian Manchester City hi chak tura ngaih an ni.

First half: A bet zawk in hma an hruai

Inkhel an ṭan a, beisei ang ngeiin Man City player ten ball an chang hnem a, half chance pawh an nei deuh zeuh zeuh. Midfield-ah Yaya Toure leh David Silva te intithu viau mahse City hian chance ṭha tak chu an nei hleithei bik lo. Sunderland in counter attack aṭangin hlauhawm vawihnih vel an siam ve bawk.

Man City fans te thlamuang taka an au dual dual laiin minute 31 ah Sunderland hian goal mawi zet mai an thun a. Tunhnaia Sunderland player ṭha ber tih ngam Sessegnon pass chu penalty box bulah Sebastian Larsson chuan lo changin, goal chhung dinglam leihrulah Joe Hart dan hman rual lohin a thun a, hei hi December thla hnua away team in first half a goal an thun leh hmasa ber a ni.

Sunderland fans te phur viau mahse field chhungah Man City in ro an rel chhunzawm a, goal chance ‘ṭha’ nei chiah si lova Sunderland an nawr tawm deuh reng hnuah minute 43 ah Dzeko penalty hlawhchhuah chu ‘cool’ zetin Balotelli chuan a thun. City goal thun zo an inthlahdah deuh nge ni, first half injury time ah dinglam aṭanga Sessegnon cross chu Nicklas Bendtner chuan Sunderland tân a head goal a, 2-1 in hma an hruai zui.

Second half: 3-1 to 3-3

Second half tirlamah Man City in midfield an thunun viau a, mahse Sunderland defence a phui tlat a, keeper Mignolet tân buaina tur a awm lem lo. Minute 54 ah Sunderland zawk hian counter attack aṭang bawkin an thun leh a, Sessegnon through ball nalh zet aṭanga ball kal zel aṭangin Sebastian Larsson bawkin Sunderland goal thumna a thun a, he goal hi Bendtner ‘assist’ a ni.

Manchester City hian an nawr deuh reng a, minute 60 ah Tevez rawn lutin, Balotelli leh Dzeko te nen striker pathum hmangin an nawr a, mahse Sunderland tlarhnunga Turner leh Kilgallon te an pel hleithei lo. City in an nawr lai hian Sunderland counter attack a hlauhawm tawlh tawlh thung a, inkhel tâwplamah hian team pahnihten chance an nei ve ve nual. Balotelli leh Kolarov te free kick pet tura an inhnial chu midangin an pawhhran hial a ngai a, kha khan team boruak a tichhe pha angem?

Minute 85 a ni a, City fans te beiseina pe turin Balotelli chuan mawi takin a pet goal a, a hnu minute 1 lekah City player khel ṭha ber tih ngam Kolarov chuan penalty box pawn aṭangin a thun zui bawk. City an phûr a, fans te authawm nen a tawplamah chance an nei deuh mawlh mawlh a, mahse goal an thunbelh thei ta bik lo. Title race-a point 2 hlu tak an hloh hi an champion loh phah angem?

Team Lineups:

Manchester City: Hart; Richards (Adam Johnson 46′), Kolo Toure, Kompany (c), Kolarov; De Jong, Yaya Toure; Silva (Tevez 58′), Balotelli, Milner (Pizarro 81′); Dzeko.

Sunderland: Mignolet; Bardsley, Turner, Kilgallon (Kyrgiakos 82′), Cattermole (Vaughan 93′); Larsson, Gardner, Colback, McClean, Sessegnon; Bendtner.

Manchester City an zam em ni?

Sunderland an draw avang hian Manchester City hi an ṭha ta lo tihn a ni hauh lova, mahse season tirlama ropui taka an khelh ang kha chuan an khel tawh lo tih chu a chiang awm e. A tawp inum, chak chhoh deuh char char a ngaih tawh laiin an game hnuhnung pali-ah vawikhat chiah an chak tlat mai a, point 12 hmuh theih turah point 5 chiah an hmu. Tunah hian anmahni aia vawikhata khel tlem zawk Manchester United aiin point 2 in an la hniam a ni.

Sergio Aguero inhliam hnuah Man City tlarhmain ngai a awh pha lo a, Aguero inhliam lai hi player pawimawh David Silva khelh ṭhat loh lai nen a innang chiah a, Balotelli hi a khelh ṭhat leh khelh chhiat a inzat vel bawk si. Hun pawimawhah player pawimawhte an che ṭha tawk lo a tih theih awm e. Goal 3 lai an thun zana an hmatâwngte duhkhawp lohna lo sawi hi a awm lo kan ti maithei. Man City tlarhma hi a ṭha lo a ni lo a, season tirlama an goal nawr na lutuk ṭhin ang kha kan hmu ta lo e tihna chauh a ni.

Martin Oneill a luh hnuah Sunderland dinhmun a ziaawm chho hret hret a, relegation zone-a awm ṭhin kha 9 na an ni leh ta vang mai.

Mancini: Aguero chu awm se kan chak ang

A player te khelh danah Man City manager Roberto Mancini a lungawi lova, “Kan khelh dan tur dik tak chu a tawp minute 15 a kan khelh dan ang kha a ni. A tirlamah kan khel ṭha lova, first half ah phei chuan kan game kha a muangin a hlauhawm loh em em a ni. Etihad stadium ah goal 3 kan chhuah ngai mang loh avangin kan phawklek deuh niin a lang.

“Ka players te hi tlemin an hnual deuh a, mahse Thawhṭanni-ah Manchester United hi an chak zawh ka ring lo a, an indraw chuang kan inthlauhna hi point 3 chauh a ni leh dawn a, chuvangin kan hnual rei lo ang. Manchester derby ah hian point 1 emaw, point 2 emaw pawhin lo hniam zawk mah ila kan chance a la ṭha em em a, mahse tun aṭang chuan point 3 kan hmuh char char tawh a ngai ang.

“Vawiinah khan Sergio chu khel thei se kan chak ang tih hi ka chiang a (200 per cent certain), a khel thei lo hi pawi ka ti em em a ni. Ka ngaihdanah chuan Mario (Balotelli) kha a khel ṭha tawk lova, hetiang game ah hi chuan danglamna thlen turin striker te kan mamawh a, a tawp dawna pet goal ringawt hi a tawk lo a ni. Tunah chuan tih theih kan nei tawh si lo.” a ti. Balotelli tân ngaihthlak a nuam hauh lo ang le.

Martin O’Neill: Chak kan phû zawk

Sunderland manager Martin O’Neill chuan a player te khelh dan chu fak in, chak zawk nih an phu thu a sawi. “Kan khel ṭha em em a, goal ropui tak tak kan thun bawk a, 3-1 a nih lai khan kan dinhmun a ṭha em em tawh a, mahse a tawplamah kan chau ta deuh a ni. Chak kan phu zawk a, champion tum team lakah khati khawpa kan khel ṭha kha a ropui a ni.

“A tawpa goal kan chhuah te kha a uihawm em em a, chak lo ang hialin rilru a na thei a ni.” tiin a sawi.

Tun ang hunah, champion tum tân chuan hneh ngei tur nia lang hneh zawh loh hi a pawi thui viau maithei a, Thawhṭan zanah Manchester United in Blackburn Rovers an hneh vaih chuan an inthlauhna hi point 5 a ni dawn a, inlehpelh a har tawh maithei. Mahse Man United hian Edwood Park-a Blackburn Rovers an tum hnuhnung 11 ah vawi 2 chiah hnehna an la chan avangin chak lo thei ve tho an ni. Tunge champion ang? An inthlauhna hi point 2 nge, point 3 nge, point 5 a nih dawn? Thawhṭanni zan kan nghah phawt a la ngai e.