Premier League-ah game khelh tur a tlem tawlh tawlh a, a hmuhnawm tawlh tawlh emaw tih mai tur a ni. Inrinni zan Premier League match, Villa Park-a khelhah Aston Villa leh Chelsea ten match hmuhnawm min hmuh tir a, team pahnih fans te an inauchhawk zak zak hnuah Chelsea hi 4-2 in an chak ta zawk a ni. Hei hi kum 2009 hnua Villa Park-a Chelsea an chak leh hmasa ber a ni nghe nghe.

Goal thuntute:

Chelsea : Daniel Sturridge 9′, Ivanovic 51′, 83, Fernando Torres 90+2′

Aston Villa :  James Collins 77′, Eric Lichaj 80′

He inkhel hi Aston Villa captain hlui, Zirtawpnia thisen cancer a vei tih hriatchhuah Stiliyan Petrov chuan a en ve a, inkhel hma leh inkhelh laiin Villa Park mipuiten ‘standing ovation’ an pe a ni.

First half ah Sturridge:

Inkhel an ṭan a, Chelsea in bul an ṭan ṭha zawk. Inkhelh ṭan aṭanga minute 9 lekah veilam aṭanga Juan Mata pass chu Torres-a’n a pet goal tawh ngei dawn nia a lan laiin Villa defender Warnock chuan a lo tackle hman a, mahse hemi ball per hi Daniel Sturridge chuan lo changin a pet goal zui a, Chelsea in hma an hruai.

Goal a luh hnu hian team pahnihte an inbeitawk chho viau a, mahse midfield-ah Chelsea an chungnung zawk a, an goal nawr pawh a na zawk. Chelsea tlarhmaah Torres leh Mata te an langsar fal nalh a, Chelsea defender te Agbonlahor-a’n a tibuai zeuh zeuh bawk. First half tâwp dawnah Villa an hlauhawm tih loh chu Chelsea in first half an thunun hneh viau. Chelsea defender David Luiz chu a kheimit hliam vangin first half tâwp dawnah thlâk a ni.

Second half-ah goal 5:

Second half tirlamah Villa an rawn hlauhawm viau a, mahse minute 51 ah Juan Mata corner aṭangin Ivanovic chuan a ti goal a, 2-0. Goal hnih an thun hnuah Chelsea an khel ṭha chhunzawm a, inkhel an thunun a, a bikin Juan Mata a langsar hle. Villa pawh hi goal chance nei lo chu ni bik lo mahse han ui vawng vawng tur khawp chance duhawm an siamchhuak lem lo.

Minute 77 a ni tawh a, dinglam aṭanga Villa throw rawn kal chu vengtu nei lo James Collins chuan awlsam angreng takin a lo head goal. Aston Villa fans te an bengchheng thar thut a, minute 80 ah Marc Albrighton cross chu Eric Lichaj chuan awlsam zet in, goal bul lawk aṭangin a pet goal zui. Villa Park-a Villa fans te thawm chu ring tak a ni.

Minute 83 ah, Aston Villa fans te phûr lai takin Ivanovic chuan corner aṭang bawkin Chelsea goal thumna a thun a, a tâwplamah Aston Villa in siphurh sut tumin nawr viau mahse minute 92′ ah Torres chuan Chelsea goal 4 na leh he inkhela chak zawk tichiangtu chu a thun ta a ni. He goal thun tura Fernando Torres finish hi, hmana Fernando Torres finish tho kha a la ni e.

Chelsea lawmna tizual turin Arsenal an chak lo a, Tottenham chet chhiat lai a ni bawk a, palina dinhmun hi Chelsea banphakah a awm a, a kar telin an hnaih hret hret zel e. Pathianni zanah Chelsea fans ten Tottenham Hotspurs mikhual Swansea City an ṭan viau ang.

Team Line ups:

Aston Villa: Given; Lichaj, Collins (Heskey 82′), Baker, Warnock; Ireland, Gardner, Herd (Albrighton 70′), Bannan; Weimann, Agbonlahor.

Chelsea:  Cech; Ivanovic, Luiz (Cahill 45′), Terry, Cole; Mikel, Lampard; Sturridge, Mata (Malouda 74′), Kalou (Ramires 59′); Torres.

Torres is back?

Inrinni zanah Ivanovic hi goal 2 thuntu zawk a ni a, a goal thunte hi an pawimawh em em bawk. Mahse Chelsea fans te tân striker Fernando Torres pet goal tluka lawmawm kha a awm âwm lo e. Torres hian a pet goal mai bakah Ivanovic goal 2 na kha a siamsak a, a game hnuhnung 5 ah goal 3 khung tawhin, assist 4 a nei tawh. A pet goal leh assist te hi chu thudang ni se, tunhnaia a khelh dan en hian, hmana Torres kan hmuh ṭhin ang kha kan hmu leh ṭep tawh niin a lang.

He Spanish striker goal thun thei ‘ṭhin’ hi season tâwplam, palina nih inchuh boruak a vung tak tak lai hian Chelsea in an la mamawh dawn chauh a. Amah vanga season tâwpa Chelsea in palina dinhmun an luah theih vaih chuan a hmaa a ‘nawi’ lai zawng zawng kha theihnghilh a ni ang a, Premier League defender te hlauh rawn ṭhin Torres hi Chelsea fans te player ‘duh ber’ a ni thei ngei ang. Champions League final-a Chelsea chakna goal a thun phei chuan…..i lo thlir phawt ang u hmiang.

Roberto di Matteo a lungawi

Chelsea ‘interim’ manager Roberto di Matteo chu a players te khelh danah a lungawi a. “Minute 5 chhunga goal 2 an rawn thun tih loh kha chu inkhel kan thunun viau a, kan game a ṭha khawpin ka hria. Collins hi boruakah a hlauhawm em em a, ven hneh a har a, kan veng hneh ta lo reng a ni. Mahse khami tih loh ah kha chuan kan khel ṭha a, chance tamtak kan insiam a, goal post kan pet per bawk a, kan khel ṭha takzet a ni.

“Tupawhin pet goal se a inang vek ka ti ṭhin a, Torres hian midang a siamsak ṭhin a, tunah chuan a pet goal ve ta. Goal 4 kan thun thei hi kan lawm a, a tawpa a (Torres) pet goal kha goal mawi tak a ni.

“Tunhnaiah game harsa tak tak kan hmachhawn a. Stoke hi khelh harsa tak an ni ziah a, chumi zawhah Manchester City nen kan inbeitawk leh em em a, Spurs kan tum leh nghal bawk. Tunah chuan kan hmabaka game awm te hi chak chhoh zel a, kan chunga awmte pressure siamsak hi kan tih theih tawk a ni rih a. Vawiina an (Aston Villa) siphurh an rawn sût zawh khan chebuai thei kan ni a, mahse he team hi team huaisen, tlawm duh lo a ni tih kan lantir a ni.” tiin inkhelh zawhah a sawi.

Chelsea hi season tâwpah Palina an nih phâk i ring em?