Barclays English Premier League a hmuhnawm chho zel a, Etihad stadium-a Aston Villa sawptu Manchester City chu hmahruaitu an ni.

Manchester City 4 – 1 Aston Villa

Manchester City chu Premier League hmahruaitu thar an ni ta. Etihad stadium-ah tun season bul  ṭan tha pangngai tak Aston Villa an sawp a, an ṭhenawm Manchester United aiin point 2 in an sâng tawh.

Inkhel inhnehtawk lo takah hian Agbonlahor hmangin Aston Villa in chance an nei hmasa zawk a, minute 12 ah keeper chauh a awm tawh hnuin a pet goal lo. Minute 28 ah tunhnaia ‘form’ tak Mario Balotelli chuan hnai set sawt aṭangin a bin goal a, first choice striker ni turin a dinhmun a siamṭha sauh sauh. First half ah team pahnihten chance an nei nual a, goal dang a luhbelh lo thung.

Second half-ah Adam Johnson, Kompany leh Milner ten City tân an thunbelh a, huntawp dawnah City tâna Premier League game hmasa ber khel turin Owen Hargreaves a rawn lut bawk nen, karleha Old Trafford luhchilh tur Manchester City tan kâr duhawm a ni ber mai. Villa goal hi Stephen Warnock thun a ni.

Premier League hmahruaitu ‘The Citizens’

Aguero, Nasri, Dzeko leh Tevez te tello-a khel Manchester City hi an ṭha tawlh tawlh emaw tih mai tur a ni. Goal an thun thei em em a, tlarhmaa mite an inman tawh a, Premier League team ‘naran’ tan chuan dan theih loh an ni ber mai. Midfield a ‘solid’ a, tlarhnungah Kompany leh Lescott te ho an la awm bawk. Tun season-ah vawi 1 chiah an la chak zo lo a, game 8 ah goal 27 an thun tawh. Gameweek 8 ah pakhatna an ni a, game 38 an khelh zawh hunah pawh pakhatna an ni lovang tih sawi ngam a har tial tial mai.

Chutih rualin City fixture te kha han en ila, top 6 team an la tum lova, Premier League-ah team chhia awm lo mahse an elpuite ai chuan an game a awlsam deuh kan ti thei ang. Manchester City thiam zia chu hai rual a ni lo a, karlehah fiahna tak tak an hmachhawn ang.

Norwich City 3 – 1 Swansea City

Kai thar pahnih inkhelah mual neitu Norwich City tân striker Pilkington chuan goal 2 a thun a, Canaries (Norwich City) te hi top 10 ah an la awm ve zel. He inkhelah hian Pilkington hian minute 50 lekah Norwich goal 1 na hi a thun nghe nghe a ni.

Norwich goal 2 na hi Russell Martin head goal a ni a, inkhel hmuhnawm tak ni lem lo mahse team pahnihte an inhnehtawk phian a, Danny Graham hmanga Swansea in an pet goal hnu phei chuan an innawrtawn nasa hle. Mahse Swansea an phûr tak tak hmain Pilkington hian minute 62′ ah a pet goal leh a, £2 million leka an lei thar hi Norwich City fans te duh ber a ni der tawh.

Tun season-a Premier League kaithar zingah Norwich City hi an dinhmun a ṭha ber rih a ni.

Queens Park Ranger 1 – 1 Blackburn Rovers

A tawp a tawpah chuan QPR player in an home ah an pet goal ve ta. Loftus Road ah QPR leh Blackburn Rovers te 1 -1 in an inhnehtawk a, mual neitu tân Helguson chuan minute 16 naah pet goal in, hei hi Blackburn tân Christopher Samba chuan minute 24 ah a rawn sût a ni.

Match hnuhnung bera chak lo nasa tak ve ve an ni a, QPR hi Fulham lakah 6-0 ngawtin an chak lo a, Blackburn in 4 -0 in Manchester City an hneh lo bawk. Chak tum ve ve, inhlau lem lo ve ve an ni bawk a, team pahnihten chance pawh an nei deuh mawlh mawlh a, second half-a goal a lut miah lo kha a mak zawk hial awm e.

Blackburn Rovers hi table mawngphahah an awm mek.

Wigan Athletic 1 – 3 Bolton Wanderers

Season tîra game 3 hneh loh nei lova an kaltluan hnuah Wigan an che chhe tluang zel a, a zawnin Premier League game 5 an chak lo tawh!!! Bolton Wanderers hi a zawna game 5 an chak loh hnuah an chak leh hmasa ber a ni thung.

Table mawnglama awm ve ve inkhel ni mahse game level a sâng phian a, Bolton tân player thar Chris Eagles a langsar hle. Minute 4 lekah Reo-Coker chuan Bolton goal 1 na a thun a, hei hi Mohamed Diame chuan minute 40 ah a rawn sut. Half time extra time-ah David Ngog chuan Bolton goal 2 na a thun a, hei hi Premier League-a away goal a thun hmasak ber a ni nghe nghe.

Second half-ah Bolton captain Kevin Davies chuan penalty a pêt goal lo a, mahse huntâwp dawnah Eagles chuan Bolton goal 3 na hi a thun a ni. Eagles goal thun zawha Bolton manager Owen Coyle lawm lutuk chu a hmuhnawm thei hial. Wigan hi 19 na an ni mek.

Stoke City 2 – 0 Fulham

Britannia Stadium hi Premier League-a stadium tlawh huphurhawm ber pawl a ni awm e. Inkhel ‘tight’ takah Stoke City in 2 – 0 in Fulham an hneh a, dan pangngaiin fans te thawm a ring leh ngei mai.

He inkhelah hian team pahnihten chance an nei nual a, goal bar an tihpet ve ve. Goal erawh a lut thei lawk lova, Stoke City goal 1 na hi minute 80 naa Jon Walters thun a ni.

Minute 87 ah Rory Delap chuan Stoke City goal 2 na hi a thun a, Potters ho hi 7 na-ah an inhlangkai tawh.