PREMIER LEAGUE PLAYER TE HLAWH A SANG – Lawmkima Hmar

Zirchianna thar bera a lan danin Premier League player te chawlhkartin hlawh chawhrual chu £50,000 chung lamah a vawikhat na’n a awm.

Sportingintelligence’s Global Sports Salaries Survey tarlan danin England a football league sang ber Premier League player pakhatin kumkhata an hlawh chawhrual (average) chu £2,642,508 emaw chawlhkartin £50,817 (Rs. 43,74,479.81) emaw a ni.

Zirchianna atanga a lan danin hlawh pek tam lamah Basketball club te an sang ber thung a, NBA club Oklahoma City Thunder chuan player hlawh atana insen tam lamah record an siam.

Zirchiannaah hian player te hlawng pangngai chauh chhut a ni a, hamthatna hrang hrang an dawnte chhut tel a ni lo. Tun tumah hian player hlawh atana inseng tam Sports Club zingah Basketball an sang a, Top 10 ah 7 an lang; kum hnih liam ta khan Top 10 ah hian Football club 8 an lang a ni.

NBA in TV a an inkhel tihchhuahna atanga pawisa tam zawk an huiluh avangin player te hlawh pawh a sang sawt a, kumkhata player te hlawh chawhrual chu £5.5m niin hei hi kumkhata footballer te lakluh £50,817 aiin a sang zawk.

European football powerhouses Barcelona, Paris St-Germain leh Real Madrid te chu hlawh atana inseng tam Top 10 a football club lang 3 an ni a, a bak 7 chu NBA club vek an ni.

Manchester United chu hlawh pek tam lamah 23-na niin an thenawm Manchester City chu 24 an ni a, United leh City hian chawhrualin chawlhkartin player pakhat hlawh atan £100,000 vel an pe a, kumkhat atan United hian £5.241m thehchhuakin City hian £5.235m a thehchhuak thin bawk a ni.

Manchester khw club pahnihte hnuai chiahah hian Chelsea (£4.451m) awmin Arsenal (£4.037m), Liverpool (£3.649m) leh Noth London club Tottenham (£3.154m) ten an dawt a ni.

Chawlhkar khata Lionel Messi £500,000 hlawhtir tura inremna ziahpui hlim Barcelona chuan player hlawh atan chawlhkartin £6.6m an seng a, Arab sum ringa nung PSG chuan dawtin chawlhkartin player hlawh atan £6.472m an seng ziah bawk.

Premier League player kumkhat hlawh chawhrual £2.6m a nih mek laiin German Bundesliga lamah £1.26m a ni a, French Ligue 1 chuan chawhrualin £944,4075 an pe bawk. Players tha tamna Spainish La Liga in an pe tam bik lem lo va, kumkhat chhunga player pakhat hlawh chawhrual chu £1.68m niin Italian Serie A club ten chawhrualin kumkhat atan player pakhat hlawhah £1.33m an seng bawk.

Hetih mek lai hian hmeichhe infiammi te hlawh erawh mipa nena khaikhina ralah chuan a hniam hle a, khawvela hmeichhe football league sum sen tam berna Women’s Super League (England) a player pakhatin kumkhatah £26,752 vel hlawhin hei hi Premier League-a mipa te hlawh aiin a let za laiin a tlem zawk a, kumkhata a ram mipui vantlang sum lakluh £27,271 ai pawhin a tlem zawk a ni.