English Premier League an khel rei tual tual a, ṭan a na tawlh tawlh emaw tih mai tur a ni. Inrinni zanah match 5 a awm a, inkhel result in thlir thuak thuak teh ang. (He post siam lai hian Liverpool te an la inkhel lo)

Wolves (Doyle 84′, O’Hara 86′) 2  – 2 Swansea City (Graham 23′, Allen 35′)

Premier League gameweek 9 a inkhel hmasa berah Wolverhampton Wanderers leh Swansea City te an inhnehtawk.

Molineux stadium-ah hian first half-ah mikhual lamin ro an rel a, Wolves passing a fuh thei lo. Swansea City hian minute 23 ah Danny Graham hmangin hma an hruai a, he goal siamsaktu Mark Gower-a pass chu ‘class’ tak a ni. Team pahnihten first half-ah chance an nei nual a, minute 35 ah Swansea bawkin Joe Allen hmangin an pet goal a, he goal hi Graham siamsak a ni thung. Tunhnaia a zawna vawi 5 chak lo tawh Wolves fans ten half time-ah manager leh player te an boo hluah hluah mai.

Second half-ah Wolves manager Mick Mc Carthy chuan substitute awmze nei a siam a, Jarvis leh Hammill lachhuakin Milijas leh Guedioura te an rawn lut. Mual neitu lam hian nawr viau mahse chance ‘ṭha’ an insiam tam thei lova, fans ṭhenkhat phei chu an haw tau hman hial a ni. Mahse minute 84 ah Kevin Doyle chuan Wolves tân a pet goal a, a hnu minute 2 lekah O’Hara chuan an siphurh a rawn sût zo. Goal 2 na siam tura Wolves player te ball inpekual vel kha chu a ‘Arsenal’ in ti ve ngeiin ka ring.

Tun season-a away game-a chak la nei lo Swansea hian point 9 an hmu tawh a, Wolves hian point 8 an hmu tawh thung.

Aston Villa (Bent 23′) 1 – 2 West Brom (Olsson 45′, Scharner 57′)

Villa Park-a West London derby-ah West Brom in Aston Villa 2-1 in an hneh. He inkhelah hian penalty vawi 2 a awm a, red card mak angreng tak phawrh a ni bawk.

Mual neitu ‘Villains’ ho hian inkhel tir lam an thunun a, midfield-a Petrov, Bannan leh Chris Merd te inkawp a hmuhnawm. Minute 10 lek chhungin Bent leh Bannan ten chance ṭha tak tak an nei hman a ni. Minute 23 ah Ben Foster chuan Agbonlahor a tihtluk avangin penalty a châwi a, hei hi Darren Bent chuan cool zetin a pet goal. Mahse minute 35 ah West Brom in penalty an hmu a, Aston Villa midfielder Merd chuan red card a hmu bawk. Referee in penalty leh red card a pek nachhan hi hriatthiam a har hle. Chris Brunt chuan penalty hi pet goal lo mahse red card hian game a thlak danglam vek kan ti thei awm e.

First half tâwp dawnah Olsson chuan corner aṭangin a head goal a, West Brom chakna goal hi minute 57 a Scharner ‘volley’ goal a ni. West Brom goal 2 hi corner aṭanga lut ve ve a ni a, corner pettu hi penalty ṭhelhtu Brunt ve ve a ni bawk.

A tlem zawk leh goal thun ngai Aston Villa in an nawr hleithei lo a, an siphurh sût tur hian chance pawh an insiam hleithei lo a ni ber mai. Huntawp thlenga goal dang luhbelh loin mikhual West Brom hian hnehna an chang ta a ni. Hei hi kum 1969 hnulama Villa Park-ah West Brom an chak leh hmasa ber a ni nghe nghe. (League bikah).

Team pahnihten point 11 ve ve an hmu tawh a. West Brom tân a zawna game 2 an chakna niin, Aston Villa hi a zawnin vawi 2 an chak lohna chiah a ni thung.

Newcastle United (Cabaye 80′) 1 – 0 Wigan Athletic

St. James Park-a inkhel inhnehtawk takah Newcastle United chuan an mikhual Wigan Athletic 1-0 in an hneh a, Premier League-a an ‘dream start’ an chhunzawm zel.

He inkhelah hian Newcastle United in ball chang tam zawk mahse goal an thun hleithei bik lo. Tunhnaia che chhe tak Wigan player te an thawkrim em em a, Victor Moses leh Rodagella ten an chance ‘ṭha’ neih an thun lo. First half-ah mual neitu lam tan Obertan a langsar a, fimkhur deuh ṭhin se a ṭhiante chance ṭha tak tak siamsak thei dinhmunah vawi duai lo a ding.

Second half-ah Newcastle United in Ben Arfa rawn luhtirin an hlauhawm sawt a. Wigan defender te khelh ṭhat ni a ni a, goal awm lo in a tawp mai dawn emaw tih hnuah, French international midfielder Yohan Cabaye chuan penalty box pâwn aṭangin Newcastle chakna goal nalh tak hi a thun a ni.

Tunah hian ‘Toons’ ho hian point 19 an hmu tawh a, palina ni mekin naktuka khel tur Manchester City an phak lohna chu point 3 chauh a ni. Competition hrang hrangah game 14 zet chu hneh loh nei loin an kaltluang tawh bawk. Wigan Athletic erawh a zawnin vawi 6 an chak lo ta a, manager Roberto Martinez dinhmun a chiang lo tawlh tawlh mai.

Bolton Wanderers 0  –  2 Sunderland (Sessegnon 82′, Bendtner 92′)

Reebok Stadium-ah tun season-a beisei pha lo pahnih an inkhel a, mikhual Sunderland 2-0 in an chak. Bolton manager Owen Coyle dinhmun a derthawng tawh ngei mai.

Inkhel hmuhnawm lem lo takah team pahnihte an inhnehtawk phian a, game pumpui thlirin mikhual lam hian chak an phu zawk a tih theih awm e. Goal pahnihte hi huntawp dawn a lut ve ve niin minute 82 ah Sessegnon chuan Sunderland goal 1 na a thun a, goal 2 na hi injury time-a Arsenal striker hlui Bendtner thun a ni. Sunderland fans te an sapatal a, Bolton fans te erawhin lungngai takin stadium an chhuahsan ngei ang.

Bolton hi Reebok stadium-ah vawi 5 an inkhel tawh a, home fans te hmaah hian an la chak lo fai vek a ni. Game 9 ah point 6 chiah la hmuin 18 na an ni mek. Sunderland hian point 9 an hmu tawh thung a ni.