Inrinni zanah Premier League gameweek 14 khelh a ni a, inkhel inhnehtawk tak tak a awm laiin inhnehtawk lo fe fe pawh a awm nual mai. Manchester City chuan pakhatna dinhmun an sawhngheh sauh sauh a, a mawngphaha awm Blackburn Rovers pawh chakin, 18 naah an inhlangchho a ni.

Manchester City 5 – 1 Norwich City

Etihad Stadium-ah Manchester City hi Premier League game 6 ah an chak zâwn tawh a, game 1 ah goal 3 aia tam hret thun ziah ang an ni. Heti a nih avang hian Norwich City hi chu hneh tur chiangsa-a ngaih an ni a, hneh pawh an hnehsawh angreng khawp mai.

Line ups:

Manchester City: Hart; Richards, Kompany, K Toure, Clichy; Y Toure, Barry; Nasri (Adam Johnson 69′), Silva, Aguero (Balotelli 72′); Dzeko (de Jong 82′) .

Norwich City: Ruddy; Naughton, R Martin, Barnett, Tierney; Bennett (Grant Holt 60′), Crofts, Johnson (Fox 77′), Pilkington (Hoolahan 59′), Surman; Morison.

A tir phat aṭangin Manchester City in game an thunun zawk. Yaya Toure leh Gareth Barry ten midfield an thunun hneh a, dan pangngaiin David Silva a langsar leh hle bawk. Norwich City in Morison an maltlat tir tawp a, midfield leh defence-ah an inhnawhkhawm.

Man City hian inkhel thunun zawk mahse Norwich lamin goal an thun hmasa teuh hle. Minute 10 na a Norwich long ball lo changtu Morison chuan Man City defender te a tlanpel vek tawh hnuah ball a control fuh chiah loh avangin Joe Hart chuan a lo tibuai hman. Norwich lamin goal thun an tum tehchiam lo a, penalty box bawr velah awmkhawm tlat a, Nasri, Barry leh Dzeko ten chance ṭha tak nei mahse hunrei tak chhung chu Norwich keeper an paltlang thei bik lo.

Minute 32 ah Man City hian Aguero hmangin goal an thun a, Norwich defender te karah a kechhipin a pêt zeuh a, a nalh danglam kher mai. Man City an khel ṭha tawlh tawlh a, minute 52 ah Nasri freekick pet chu ho angreng takin Norwich keeper in a chhuah bawk.

Second half-ah pawh Norwich City in Grant Holt rawn luhtirin an game a kâng hret a, ball pawh an chang hnem ve deuh. Mahse an phûr dawn chauh tihin minute 68 ah Yaya Toure chuan penalty box chhung aṭangin, defender te inkarah mawi zetin a pet lut kual a, Norwich tan beisei tur a awm tawh lo.

Man City hian inkhel an thunun chhunzawm a, mahse Norwich City hmatâwngte an chhuah leh zauh ṭhin. Minute 81 ah Morrison chuan rawn Norwich tân a rawn thun ve nghe nghe a ni. Mahse Premier League hmahruaitute hian an la duhtawk lova, minute 88 ah Adam Johnson thawhrah sengtu Balotelli shot chu Norwich keeper in a lo dang per a, he ball per hi Balotelli chuan goal line bul aṭangin a dâr (shoulder) hmang ngatin a thun. Man City goal 5 na hi minute 91 naa Adam Johnson pet goal a ni.

Hneh theih loh Man City?

Manchester City hian game 14 ah point 38 an hmu tawh a, tun season-a chak loh nei lo awmchhun niin, Premier League team zinga goal thun hnem ber an ni bawk. Inkhelh zawha commentator te sawi ang deuhin, ‘Premier League champion team an ang tawlh tawlh’ mai. Player an nei ṭha a, player pawimawh inhliam an nei lo bawk a, tun dinhmunah kher chuan England-ah an vawk lal len a ni ber. England team zingah tunge Manchester City hneh thei hmasa ber ang le?

Norwich City hian an hneh ngang lo a ni ber. Tunah hian game 14 ah point 16 an hmu tawh a, an dinhmunah lungawi lohna tur an nei bik awm lo e.

Wigan Athletic 0 – 4 Arsenal 

Arsenal chuan gameweek 13 a Fulham an hneh loh ṭuma an thinrimna Wigan lakah an leihbua a, mikhualna ramah goal 4 ngawt an thun.

Line ups

Arsenal: Szczesny; Koscielny, Mertesacker, Vermaelen, Santos; Ramsey, Song (Arshavin 80′), Arteta; Walcott (Benayoun 80′), van Persie, Gervinho (Coquelin 80′).

Wigan Athletic: Al Habsi; Stam, Gohouri, Caldwell, Figueroa; Diame (Mc Arthur 89′), Jones, Gomez (Crusat 59′), McCarthy, Moses; Sammon (di Santo 59′).

He inkhelah hian Wigan in minute 5 lekah hmahruaina theihna chance ṭha tak an nei nghal a, chângtu nei lo Gomez chuan hnai zet aṭangin a pet out hlauh. Mual neitu lam hian bul an ṭan ṭha a, Arsenal keeper tibuai lutuk lo mahse an hmatâwngte an khel ṭha. Mahse ball chang tam zawk Arsenal tân Mikel Arteta chuan minute 28 ah goal ropui a thun a, minute 29 ah van Persie corner aṭangin Thomas Vermalean chuan a ti goal zui bawk.  Hemi hnu hi chuan Arsenal player te hlirin ball an chang tawh a ni ber mai. Veilam sirah Gervinho a langsar tawlh tawlh a, tunhnaia khel ṭha thei tak Ramsey pawh kan hmu ngun khawp mai.

Second half-ah pawh Arsenal bawk hi a khel ṭha zawk an ni a, van Persie leh Gervinho ten chance ṭha tak tak an nei. Second half ṭan hnu lawkah hian Ramsey chu penalty box chhungah Gohouri chuan a ti tlu a, penalty ni awm tak a nih laiin referee chuan a pe lo a ni. Wigan pawhin Gomez hmangin goal thun theihna chance ṭha tak an nei ve bawk.

Minute 61 ah Gervinho chuan a thun ta nge nge a, van Persie shot, keeper dan per chu hnai set sawt aṭangin a pet goal. Minute 78 ah captain Robin van Persie chuan BPL-a a goal 14 na a thun bawk. Subsitute Benayoun chuan minute 85 ah keeper chiah a awm tawh tihin a pet goal lo hlauh bawk. Huntawp thlengin goal dang a lût tawh lova, Arsenal hian game 14 ah poin 26 hmu tawhin, Wigan hian point 9 chiah an la hmu thung.

Inkhel dang result

Tottenham Hotspurs chu a zawnin vawi 6 an chak ta a, White Hart Lane-ah mikhual Bolton Wanderers chu 3-0 in an hneh. He inkhelah hian Gareth Bale, Aaron Lennon leh Jermain Defoe ten an thun a ni. Premier League-a winger nei ṭha ber tih ngam Spurs hian point 31 an hmu tawh a, an elpuite aiin game 1 in an la khel tlem bawk.

Inkhel dang result chu a hnuaiah tarlan a ni a, bracket chhung ami hi an point hmuh tawh zât zel a ni

(10) Blackburn 4 – 2 Swansea City (14)

Blackburn: Yakubu 20′, 45′, 57′, 82′; Swansea City: Lita 35′, Moore 66′

(16) QPR 1 – 1 West Brom (15)

QPR: Helguson 20′ ;  West Brom: Shane Long 81′