Carles Rexach chuan kum 13 mi Argentine naupang chu Barcelona-ah trial nei turin a hruai a, he naupang hi metre khat leh centimetre 47 chauha sang a ni. Mizote hriat thiam dan tur chuan feet li leh inches 10 vel chauh a ni a, a rualpui dang Gerard Pique te nen chuan an insan hleih hle.
Trial ni hmasa berah chuan dressing room pawnah a insiam ṭan a, insiam pahin dressing room-ah chuan inthlahrung takin a ṭhu lut. Chutah coach Rodolfo Borrell chuan, “In fimkhur deuh dawn nia, a tet bik em hi, in ti na palh hlauh ang e,” tiin naupang dang chu a hrilh.
Tuna Manchester City assistant coach hna chelhtu Borrell-a’n dimdawih tura a hrilh naupang hi Lionel Messi a ni a, a chanchin sawi tam a ngai tawh lo – khawvelin Barcelona-a a ropui zia an hria.
Mahse maw, Paris Saint-Germain-ah an hlawtling ang em tih erawh zawhna awm thei a ni a, a tehfung a zirin hlawhtling lo thei a ni tlat.
A TEHFUNG CHU
Qatar Sports Investments-in PSG an lei hnuah Parisians hi France ramah an vawk lal len a, nomawi chawi theih chu an chawi vek. Hemi a nih avang hian Messi hian PSG-ah a ropuina a belhchhah dawn a nih chuan Champions League nomawi a chawi a ṭul.
Chutihrualin tehfung dang a awm leh bawk. Messi hi Barcelona tan bika duan a ni a, club dangah chuan Catalan club-a a hlawhtlin angin a hlawhtling tawk lo ang, titu an awm.
Messi-a’n a ropuina a belhchhah dawn em tih chu nakkumah a hriat chauh dawn a, point pahnihna zawk hi tun ṭuma kan sawi zau tur chu a ni. Argentina captain hian Barcelona chhuahsana PSG a pan avangin a ropuina tawhna hi a ti hmel hem thei tlat.
RONALDO PHAWT
A chunga point hi sawi zau hmain Messi elpui ber Cristiano Ronaldo sawi lan a ṭul. Portugal captain hian hlawhlting takin Manchester United, Real Madrid leh Juventus tan a khel a, league pathumah a hlawhtling.
Chutihrualin Ronaldo hian Italian club hi Champions League nomawi a chawipui theih loh avangin a ropuina erawh a belhchhah lo a tih theih (Ngaihdan erawh a inang lo fur ang). Mahse, Serie A Footballer of the Year-ah kum hnih a zawna thlan a nih bakah season liam ta khan top scorer a nih avangin Juventus a pan avangin a ropuina a hmel hem phah lo.
Ronaldo hian Messi-a’n PSG a pan hnuah a larchhuahna Manchester United-ah a let leh thung a, Portugal captain hian match thum lekah goal li a khung. Ropui ber nih duh ve ve an nih miau avangin Ronaldo che ṭha hian Messi hi nasa takin pressure a pe a ni.
PSG LEH MESSI
Lionel Messi hian PSG tan match thum chauh a la khel a, Ligue 1-ah Reims an hneh ṭumin minute 66-naah Neymar a thlak. Champions League-a Club Brugge nen an inkhelh ṭumin a vawi khat nan inkhel bul a ṭan a, 1-1 in an inhnehtawk a, Messi-a’n a khel tluan.
PSG khelmual Parc des Princes-a inlan hmasak ber chu Pathianni zan kha a ni a, Lyon hmachhawnin 2-1 in an hneh. Minute 76-naah Messi hi Achraf Hakimi-a’n a thlak a, chak tura goal mamawh lai tak a nih avangin Argentina captain hian a chetzia hmangin a lungawi loh tih a lantir. Poch-a hote hi Messi tel loin an chak!
French club hian September 22, Nilaini zanah Metz an hmachhawn dawn a, Mauricio Pochettino chuan, “Khup hliam vangin Metz a hmachhawn thei dawn lo. Leo khan a khup a en a, a inhliam nia ka hriat avangin ka thlak. Minute 76 chhunga a khelh danah kan lungawi a, goal tih loh chu a awm vek,” tiin a insawifiah. Manager ve meuh player pakhat vanga a insawifiah chiam hian Messi ropuizia a ti lang chiang hle.
A ROPUI DAWN EM?
PSG leh Lyon inkhel thlir chuan manager Poch-a thusawi hi an ṭawmpui ngei ang. Messi hi a khel ṭha a, freekick aṭangin woodwork a pet per bakah Neymar leh Kylian Mbappe te nen inkawpin Lyon keeper tan hna an siam sak.
Mahse, Messi a ni miau a, Argentina captain tehna hi chu a san bik em avangin a tling zo ta bik lo. A tawi zawng chuan Lionel Messi hi PSG tana a khelh tawh chinah beisei a pha lo.
Messi hi Barcelona tana a khelh laiin a inhliam meuh lo a, kum 34 mi a nih tawh avangin hliamin a tlak buak ve ṭan dawn pawh a ni thei ang. Hei erawh thleng lul suh se, FIFA World Cup-ah Argentina kawr haa Messi dam ṭha ver vawra a che vel hmuh a châkawm tlat.
Chutichung chuan Barca tana khelh tawhna kha thlir kir ila, season hnuhnung 13-ah khan match 30 a khel tling vek. Match 30 a khelh tlin chinah hian league-ah goal 20 a khung ziah a, 2011–12 season-ah phei chuan goal 50 a khung a, chutihrualin match 37 a khel tih hriat a ṭha.
PSG-ah erawh league match vawi ruk khelh tawhah vawi hnih chiah a la inlan a, Metz nen a khelh dawn loh avangin league match sarih an khelh hunah a khelh zat a pung ve dawn lo. Messi hi a inlan miau loh chuan French club tana a goal khung hun tur hi kan la nghah rih a ṭul dawn.
Hei chauh hi a ni lo, Messi contract-ah hian Argentina Clause a tel. Chumi awmzia chu Argentina tana friendly/competitive match khelh tur a awm a, a kal duh a nih chuan PSG-in an dang thei dawn lo.
October leh November thlaah World Cup qualifier khelh tur a awm leh dawn a, September thlaa international break nen a danglam lo a nih chuan Messi hian league match a khelh loh phah thei angn. A tawi zawng chuan Messi-a’n tun season-ah Ligue 1 match 30 a khelh tlin a rinawm lo a, match a khelh tam loh chuan a goal khung zat pawh a tlem dawn tihna a ni.
Season liam ta khan Mbappe-a’n match 31-ah goal 27 khungin top scorer a ni thei a, 2015–16 season khan Zlatan Ibrahimovic-a’n match 31-ah goal 38 a khung tawh bawk. Ibra record chu sawi loh Mbappe record pawh hi tluk phak a har dawn avangin PSG-a Messi ropuina kawng zawh tur hi awlsam dawn lo.
French forward Mbappe hi tlarhma lamah a huam hauh ve tlat a, Real Madrid nena sawizawm forward vang hian Messi tan goal khung tam a har thei bawk. Engpawh chu ni se, Messi chu Messi a ni miau a, season a tawp meuh chuan kawng harsa anga lang hi hnehsawh takin a zawh zo thei tlat.
