Premier League ah hian club pali (Manchester United, Arsenal, Chelsea leh Blackburn) chiah an la Champion thei a. Champion thei zing ami Blackburn Rovers leh Pune F.C. chu ni 7 October, zirtawpni zan dar 6:30 hian Shiv Chhatrapati Stadium, Balewadi, Pune ah an intum dawn. Blackburn Rovers team ah hian Ryan Nelsen, Michel Salgado, Ayegbeni Yakubu, Christopher Samba, David Dunn, David Hoilett, Jason Roberts, Steven N’zonzi, Ruben Rochina, leh an lak thar Scot Dann, David Goodwillie, leh an manager Steve Kean te an rawn tel a. Inkhel hmuhnawm kan hmu lo anih pawhin players ropui erawh kan hmu dawn tho a ni.

Blackburn Rovers hi khawmualpui dang club ni mahse kan ram Club Pune F.C. aia kan hriat chian zawk te annih avangin Pune F.C. hi i han belchiang zawk te ang.

Pune F.C. hi August 2007 chauh a din ni mahse Indai ramah chuan an Club in relbawl dan hi a changkang ber a. Red Lizards (Pune F.C. Nickname) hi I-League team niin 2010-11 season khan 5 na anni a. Mi 12,000 lenna Shree Shiv Chhatrapati Sports Complex chu Home Ground ah hmangin, he club hi Ashok Piramal Group ta a ni.

Inkhel tur lampang i han thlir teh ang.
Pune F.C. Head Coach Derrick Pereira hian 4-4-1-1 formation a rawn hman ngei rin a ni a. Keeper ah Football Players Association of India (FPAI)-Indian Football Awards 2011 a ‘Best Player in Asian Cup 2011’ dawngtu Subrata Paul a inhliam avangin a aiah Shahin Lal Meloly a awm hmel. Subrata bakah hian an foreign player Mandjou Keita (Guinea) a khup hliam vangin a khel thei lo bawk ang.

Probables Line Up: (4-4-1-1) Goalkeeper: Shahin Lal Meloly . Defence : Gurjinder Kumar (LB), Caitano Costa (CB), Chika Wali (CB), Othallo Tabia (RB). Midfielder: Shanmugam Venkatesh (LW), Arata Izumi (CM), Baldeep Singh Junior (CM), Lester Fernandez (RW), Pierre Djidjia Douhou (AM). Striker: Jeje Lalpekhlua

FPAI-Indian Football Awards 2011 a ‘Best Young Player’ dawngtu Jeje Lalpekhlua hi Pune F.C. lamah chuan player langsar ber tur a ni a. India player in Premier League Club lamah an petgoal thei hlauh anih chuan Jeje-a Lalpekhlua hi a nih ngei a rinawm. Zofooty chuan Jeje a kawmna kan nei thei hlauh a. A chungah kan lawm takzet zet a ni.

ZF: Professional i nih hnu hian Premier League Club hi tum i in beisei ngai em?
Jeje: Ngaihtuah chu sawiloh mumang ah pawh ka mang phak ngailoh ania, hetiang khel thei tura min awmtir thei tu Pathian hnenah lawmmthu ka sawi nghal bawk.

ZF: Blackburn Player ah hian han ngaihsan deuh te i nei em? Jersey thleng pui thei ta la, tunge i thleng pui ang?
Jeje: Han ngaihsan bik em em chu ka nei lova mahse jersey ka thleng pui thei anih chuan Salgado ka thleng pui ang. Mahse Salgado hi a inhliam a, a khel thei lo ang tih thom te a awm a.

ZF: In Coach ( Derrick Pereira) ten eng ang chiahin nge he match hi an ngaih pawimawh? In game pangai in khel dawn nge defensive in inkhel dawn?
Jeje: Defensive lam chu kan practice nasa khawp mai. He match hi kan khelh na zel tura experience ah a pawimawh avangin kan thei ang tawk a tha chuan kan inpuahchah ve.

ZF: I beisei ngai loh thil a thleng a, tunah erawh beiseina dang i neih ngei a rinawm. I petgoal theih i in beisei em?
Jeje: Theih tawp chhuah ka tum a, pet goal ve ngei pawh ka tum ang.

ZF: Keini pawn petgoal ngei turin kan duhsak che. Eng boot nge i bun dawn? Vanneihna boot an tih ang te hi i nei em?
Jeje: Mercurial pink ka bun ang…Ka boot hi tun season liamta International match leh I-league match a ka goal thun zawng zawng a ka bun kha a nia.

ZF: I teammate hlui leh i thian tha Rozama leh Rindika te nen in khel ho tawh si lova, i ngai ve thin em?
Jeje: Nia, Mizo te chu an ngaihawm duh khawp mai.

ZF: Engnge mizo mipui te i chah duh?
Jeje: Tawngtai naah minlo hreve reng turin ka chah e..

ZF: Tawngtaina ah chuan ka lo hreve reng ang che.Kawmna hun tha tak min pek avangin kan lawm e.
Jeje: Keipawh ka lawm e.