English Premier League club Queens Park Rangers chuan Joey Barton chu club captain a nihna a hlihsak a, a kar 6 hlawh chawitirin, a fimkhur chhunzawm loh chuan club atanga chhuahtirah a vau.

Joey Barton hian Premier League season tawp ni ah Manchester City lakah red card a hmu a, chhuah paha City player (Aguero) a pet bawk avang leh, Kompany tauh a tum bawk avangin hremna na tak a hmachhawn mek a ni. FA chuan match 12 chhung khel thei lovin a hrem a, £75,000 zet a chawitir bawk. Field chhunga chetmawi loh vanga hremna awm tawh zingah chuan hei hi a na ber pawl a ni ngei ang.

Barton hian nikum nipui laiin Newcastle United aṭangin QPR a zawm a, kum li chhung atan contract hi ziak mahse buaina a chochhuak leh a nih chuan a contract tihtawp sakah QPR hotute chuan an vau hial tawh a ni.

Chawlh hmang mek Barton chuan QPR official website leh twitter kaltlangin ngaihdam a dil tawh a. Twitter ah chuan “Ka fimkhur lo a, ka chetdan kha a pawlawh a, ka phutawk hremna ka hmu a ni. Pawisa hi chu a lo kal leh mai dawn a, ka tân a pawimawh ber lo. Captain nihna ka hloh leh match 12 ka khel thei lo tur hi a na ber zawk chu a ni. Ka chetdan kha a mawl a, ka thiltih leh ka awmdan kha a mawi lo a, mahse ka lo lêt leh ang tih hi ka ring tlat a ni. Tunah chuan he thil hi theihnghilh a, ka khelh theih ve leh top 10 a lang tura QPR puih hi ka tum ber a ni.” a ti.

Barton chuan QPR club official website ah pawh ngaihdam dilna a tichhuak tawh a. “Ka chetdan kha a dik lo a, ka chunga hremna lekkawh zawng zawng hi ka pawm vek a ni. Kan manager, ka teammate te leh QPR fans te chungah ngaihdam ka dil a. Manchester City players, staff leh fans te chungah pawh ngaihdam ka dil duh a ni.” a ti bawk.

QPR chief executive Philip Beard pawhin thuchhuah siamin, “Joey (Barton) awmdan leh a hnua a chetzui dan kha kan pawm thei lo hulhual a, kan ngaihdan a nih loh zia pawh kan hriattir tawh. Felfai taka thawhho theih dan kan nei thei hi a lawmawm a, hremna hi a ṭha zawnga a hman ngei ka beisei.” a ti.

Joey Barton hremna hi chu a phû ve reng kan ti deuh vekin a rinawm.