London club Queens Park Rangers chuan an manager thar atan Mark Hughes an lalut ta a, kum hnih leh a chanve daih contract an ziahpui a ni.

Kum 48 a upa Hughes hian Rangers manager bang ta Neil Warnock a thlak a. Warnock hian Barclays Premier League-a relegation zone aia point khat chauhva sangah a awmpui reng avangin QPR hian an ban a ni.

Warnock an ban dawn tih aṭang khan Manchester City leh Wales boss hlui Hughes hi QPR manager tur hian a hming a langsar nghal hle a. Chelsea, Fulham leh Manchester City te a enkawl tawh a, tawnhriat ngah tak a nih avangin Hughes hian QPR hi dinhmun ṭhaah a dah theih ngei a beiseiawm a ni.

QPR hi Malaysian sumdawng hausa Tony Fernandes-a’n a lei aṭangin club hausa tak an ni chho a. Tun January thla-a player lei nan pawh hian pound maktaduai 20 atanga 30 vel sen an inhuam nia sawi a ni a, chu bakah Loftus Road pawh mihring 30,000 len theihna tura chei ṭhat an tum mek bawk a ni. Kum khat pawh tling lo a enkawl hnuah club neitute rilru leh a tumdan a inpersan vanga Fulham chhuahsantu Hughes hian QPR ah hian beiseina a nei a ni ngei ang.

Lakluh a nih hnu lawkah Hughes chuan, “Football-a han let leh a, QPR manager nih hi a ropui khawp mai. Tunah leh hun rei zawk atana ka mawhphurhna ka hria a, club neitute tumdan pawh ka hre bawk a. He club chanchin ropuizia leh supporter pawh an neih ṭhatzia hi mi zawng zawng hriat a ni bawk a, ka phur hle a ni,” a ti.

QPR chairman Fernandes pawhin, “Mark hian Premier League-ah manager ṭha a nihzia a lo lantir tawh ṭhin a, international level thleng pawha tawnhriat nei tawh a ni. A duhdan leh kan tumdan a inan avangin kan lawm hle a ni,” a ti ve bawk.

Mark Hughes hian Fulham a chhuahsan hnu khan Aston Villa leh Sunderland boss a ni hman ṭhelh a, mahse hna nei lova a awm chhunzawm zel hnuah QPR a zawm ta a ni. QPR ah hian assistant manager Mark Bowen, first-team coach Eddie Niedzwiecki leh goalkeeping coach Kevin Hitchcock te nen an luhchilh dawn a ni.