Chelsea captain John Terry chu vunrawng vanga inhmuhsitna ṭawngkam chhakchhuaka puh a nih hnuah, Zirtawpni khan a chungchang ngaihtuahtu court chuan thiam a chantir.  Terry thiamchan theih chhan hi ‘evidence’ duhthusam a awm loh vang niin Chief Magistrate Howard Riddle chuan a sawi a ni.

John Terry leh Anton Ferdinand te inkara buaina hi chu kan hre ṭheuh tawhin a rinawm a. Chelsea leh QPR in October 2011 a Premier League match an khelh ṭuma buai an ni a, he match ah hian Terry hian mihang Ferdinand chu a vunrawng vanga tham lo taka ṭawngkhumah puh a ni. Terry hi England captain a nih lai a ni a, chuvangin he case hian ngaihpawimawh a hlawh lehzual a tih theih awm e. He case kal zel avang hian Football Association chuan England captain a nihna a hlihsak a, hei hi duh lovin England manager Fabio Capello pawh a bân phah a nih kha.

He case hi London court ah ni li chhung ngaihtuah a ni a, hemi chhung hian prosecutor (a puhtu lam) in finfiahna engemawzat phawrhchhuakin court a entir a, mahse Riddle mit leh bengah tling zo a awm ta a lo a ni. He case hi a lâr a, a darhzau em avangin jury in thutlukna a siam lo a, thutlukna tâwp hi Chief Magistrate Howard Riddle ngei hian siamin, court rorelna hi prosecutor lam pawhin an pawm nghal thlap bawk.

Terry chuan racist a nih loh zia uar takin a sawi a, Ferdinand-a’n a diriamna ṭawngkam ngai tho chu ngeiawm takin a chhanglêt tih a pawm a, mahse vunrawng vanga inhmuhsitna ṭawngkam a chhakchhuak lo tih a sawi a ni. Terry hian ‘black’ tih thumal chu a hmang ngei a, ṭawngkam bawlhhlawh dang pawh a hmang tho a. Mahse hei hi racial abuse hrim hrim ni lovin, Ferdinand thusawi a chhanlêtna a ni a, Ferdinand pawh hian ‘black’ tih thumal chu a hmang ve tho a ni. Ferdinand hian Terry hi a chhaihkawlh hmasa a, Terry hian a chhânglet a ni tih hi kan hriat a ṭha awm e. He case ah hian Ashley Cole chu thuhretu-ah a ṭang nghe nghe.

An captain in thiam a chan hnu lawk hian Chelsea Football club chuan thuchhuah a siam nghal a. “Chief Magistrate Howard Riddle-a’n John Terry puhna paihthla-a thiam a chantir hian Chelsea FC chuan a zah a, lungawi takin a pawm. Field pawn lama buaina chinfel a ni tawh a, tunah chuan John Terry pawhin mumal leh lungmuang zawkin football kaihhnawih a ngaihtuah thei tawh dawn a, kan lawmpui hle a ni.” a ti.

FA an lo lang e

John Terry thiam chan vanga amah ṭantute lam authawm pawh a la reh hman lo a, England a football thuneitu sâng The Football Association (FA) chuan Terry case hi anmahni kutah an lâk thu an puang zui.

Court in thiamchan tir tawh mahse Terry case hi an enzui ve leh hrim hrim tur thu FA chuan a tarlang a. Engvanga chhui tur nge an nih a, engtin nge an chhui dawn tih erawh an sawilang lo a ni.

FA statement hi sentence hnih chauh a ni a, court thutlukna an hriatpui thu leh anmahniin a hrang a an ennawn ve leh tur thu a ni. Anni hi chuan racism chungchang an chhui vak a rinawm tawh lo a, football tihhmelhem lampang a nih a rinawm mah. A thui lo bawk a, a sapṭawng hi dah tel ila a ṭha awm e.

“The FA notes the decision in the John Terry case and will now seek to conclude its own enquiries. The FA will make no further comment at this time.”