RAFA BENITEZ: THUTIAM HLEN LOHNA LEH IN RIN LOHNA – NEWCASTLE UNITED KA CHHUAHSAN CHHAN DIK TAK CHU

Estimated read time 6 min read

“Khawiah pawh kal la, i kalna hmun apiangah i thinlung zawng zawng pe rawh.”

Chinese philospher leh politician ropui Confucius-a thuziak hmang hian bul ka han ṭan ang e.

Newcastle a mipuite hian an club ka chhuahsan chhan tak tak hre si lo hian thil eng eng emaw hi an sawi a, St. James Park a kum 3 ka awm hnu a China ka pan chhan hre lo hian thil tam tak an sawi.

Hemi chungchangah hian engmah sawi hi ka tum lem lo a, Newcastle ṭantute hnenah pawh manager thar Steve Bruce leh a teamte thlawp turin ka chah a. Mahse kar kalta matchday programme a Newcastle managing director Lee Charnley-a’n a thuziak ka chhiar khân ngawi reng thei lovin min siam ta a, hei hi ka ziak ve ta a ni.

Tun ṭum chiah hi hetiang hi ziah a ngaih ngêi ka beisei a, nidangah chuan football ah chauh ka rilru pek ka duh a ni, football ah chauh.

Kum 2016 a Newcastle ka zawm khan ka thinlung zawng zawng ka pe nghâl a. Club chanchin lo awm tawhte ka hria in club in hma a sawn theihna tura a theihna te ka hmu chiang hle a, chumi avang chuan ruahmanna an siamah te ka tel ve duh avangin leh ka chhungte awmna Merseyside aṭanga hla vak lova awm ka duh bawk avangin Newcastle kha ka zawm a.

Nitin club tan keimah aṭang a ṭha ber zel ka pe a, club dang aṭanga sawmna ka dawn ve te pawh hnawl in division hniam Championship a kan tlâk pawhin ka châm a. Heta sawmna ka dawn ṭhenkhat hi tuna Dalian Yifang in contract min pek aia tam zawk te hi an ni.

Charnley-a’n (matchday programme a) sum um anga min chhuah kha dikin sum lo um ta ni ila chu Newcastle kha ka chhuahsanna a rei tawh ang.

Football coach ni a hun eng emaw chen hun ka lo hman ve tawhah te, a bikin Newcastle-ah club tana ka inpekna te, a khawpui a ka thinlung ka dah zia leh khawtlang thlenga ka inpekna te hi ka lanchhuahtir ve in ka inhria a, heng zawng zawng hi puitling tak leh rilru thianghlim takin ka ti vek a ni.

Newcastle board khan ka contract tihfelna hun kha kum khat vel dawn lai hun an nei a. Mahse season tawpa sawihona kan neihah chuan contract pawmawm tak min zawrh ta hauh lo mai.

Kan sawihonaah chuan academy leh training ground-ah te sum an thehchhuah theih loh tur thu min hrilh a – hei hi an hre duh a nih chuan Mike Ashley-a’n a duh loh chhan pawh hi ka sawi vek thei ang. Anni (board) lamin an duh chu kum 24 hnuai lam player lakluh a ni a, transfer bazar a player leina tura sum an dah nen chu chu a inmil thei a ka hriat loh avangin top 10 kai tur chuan kan ṭhat tawk ka ring lo a ni.

Kan in hmuhkhawmna kan zawh hnuah chuan tuna contract min zawrh aia ṭha hi min zawrh ka ring chuang lo a. Kan inkawmna hmasa aṭanga ni 19 a ral hnuah chuan sawihona kan nei leh a – chutah chuan hlawh ngâi bâkah player lakluh chungchanga ka thuneihna eng emaw zat min laksakna tur chu ka hmaah an rawn chhawpchhuak ta a.

Matchday programme ah bawk khan Charnley-a khan Joelinton chu lalut turin kumin kumtir February thla a inremna an lo siam tawh thu a ziak tel a, khata ṭang khan player lakluh chungchangah pawh ka hriat lovin thil an lo kalpui hle tih a hriat theih âwm e.

Kum 3 chhunga an thutiam an hlen lohna avang khan keipawhin anni kha ka ring zo ta bik lo a ni.

Premier League kan kâi hnuah 10-na niin season kan khâr a. Chumi avang chuan staff leh player zawng zawngten bonus an dawng vek a, chutihrual chuan kei leh ka coaching teamte erawh bonus pek ve kan ni ta lo a. Hei hi contract thar ka ziah duh loh min hremna te pawh a ni mahna.

A tawpah chuan anni hnen aṭangin contract ṭha zawk min zawrh ka beisei tawh lo a, anni lam pawhin contract thar ka ziah an ring ta bik lo a. Heng zawng zawng hi chanchinbumite hmaah ka sawi rem an ti lo a, a chhan chu anmahni phalna la lo a club thu sawi kha rem an ti lo a ni.

Chuvang chuan fans ho ang tho in club neitu thar kan neih tâk mialin tiin June chu phur takin ka nghâk a. Mahse hun a kal zel a, Europe ah hna kan hmu lo chho zel a. A tawpah chuan ka nghâk reng thei ta lo a. Chhungkaw pa ka ni a, tin ka staff Paco, Antonio leh Mikel te pawh chhungkaw enkawltu vek an ni a, an hmalam hun chiang lo taka dah chu ka duh ta lo a.

Kan hmaah Newcastle aṭangin contract ṭha em em lo a awm a, neitu thar an awm tâk mialin tiin beiseina chhete kan nei a. Tin China aṭangin contract ṭha tak min rawn zawrh a, ni e, he contract min zawrh hi a ṭha khawp mai. Khawmualpui hran leh league hran a ni a, mahse min ngaisang dertu leh min duh em em tute an ni tih a hriat theih avangin thutlukna awlsam tak chu ni lo mahse thutlukna erawh ka siam fel ta a ni.

Pathianni zing khan Dalian-a ka chênna inah TV ka han on a, chutah chuan Alan Shearer-a documentary a lo chhuak a. A mak ve angreng khawp mai.

Shearer-a’n a pet goal apianga Newcastle fans te hlim hmel ka hmu a. Kha boruak ang kha hrilh nawn ka ngai lo a, a chhan chu tunhnai maia ka thinlung zawng zawng ka pekna hmun kha a ni a. Kha video ka en lai khan club chanchin leh a theihna zawng zawngte ka han ngaihtuah a, chutah chuan ka rilruah he thil hi ka ngaihtuah ta a – Newcastle ṭantu kum 18 mi hian tuna a club ṭan kalphung hi engtin tak ngai ang maw?

(Hei hi The Athletic a Rafa Benitez-a’n a ziak a ni a, a sei deuhhlek avangin a club thar chanchin a ziakte chu paih a ni)

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment