RAINBOW ARMBAND LEH LGBTQ

Euro 2020 khelh mekah, Captain thenkhatin Rainbow Colour (Chhimbal rawng) Armband hren an intih hmuh chho va, hei hi a chhan nia lang chu LGBTQ (anpui kawp ching) thlavang hauhna a ni. Anpui kawp chingte an thlawp tih an lantirna anga ngai pawh a awm theih ang.

A bul:
Euro 2020 tan hnuah, Hungary sawrkar chuan anpui kawp chingte chungchangah thu thar an nei a, kum 18 hnuai lam zinga anpui kawp chungchang vawrh lar leh chawi san khapna dan an passed. Hei hian a tum chu School zirlaiah hetiang lam hawi telh loh te, naupang en tura siam TV Show velah anpui kawp sawi mawina lam tih chhuah loh te a ni.

An dodal nghal:
Hungary sawrkarin dan a siam thar hi duh lotu an tam nghal hle a, Hungary leh khawvel hmun thenkhatah LGBTQ Community leh anmahni thlawptu ten dodalna an lantir nghal a ni.

Khelmual a thleng:
Chu dodalna chuan Football Stadium a luh chilh a, chu mai duh tawk lovin khelmual chhungah bu a khuar ta a ni.
German Football Association leh Munich Mayor Dieter Reiter chuan, Germany leh Hungary ten Allianz Arena-a Group match hnuhnung ber an khelh khan, stadium chu pawn lam atangin Rainbow Colour-a kah en an duh a, UEFA-ah ngenna an thlen. Mahse, an ngenna hi UEFA chuan a lo hnawl phawt. Hemi zan hian Germany-a stadium dang thenkhat chu he rawtna ang hian Light hmanga kah a ni. An ngaih pawimawh lai ber Euro khelhna hmuna an ti thei lo hi an hrethiam lo va, Europe-a LGBT Community ten UEFA hnenah lehkha thawnin, an lungawi loh thu an puang chhuak.

Mahse, stadium chhungah erawh an hlawhtling hle a. Hnam hla sak laiin Hungary fan pakhat chu Rainbow Flag nen mual chhungah a tlan lut. Inkhelh hnuah pawh Rainbow Flag nen thahnemngai takin ‘anpui kawp’ te tan an au chhuak zui.

Captain Armband a thleng:
Tun Euro Group match-ah khan Germany Captain Manuel Neuer chuan Rainbow Colour Armband a lo hreng tawh a, England nen Round of 16 an khelh khan a chhunzawm bawk. Neuer hian June 7-a Latvia nen Warm Up match an khelnaah pawh a lo hreng tawh a ni.

England Captain Harry Kane pawhin Round of 16 match-ah ‘chhimbal rawng’ Armband a rawn hreng ve bawk – An match dawt lehah pawh a chhunzawm rin a ni. Kane hian Tottenham lamah pawh Annual Rainbow Laces week-ah a lo hreng tawh thin niin sawi a ni.

Netherlands Captain Wijnaldum khan Round of 16 match-ah a lo hreng tawh bawk a, LGBTQ Support-na a nih thu sawi chiang lo mah se, a chiang tho!

Engati nge Chhimbal rawng chu:

Rainbow Flag an tih mai, chhimbal rawnga siam Flag hi LGBTQ Pride Flag a ni a, a colour hrang hrang hi entir an neih tir ve thlap! Chuvangin, he Rainbow Armband hmang hian, “Hetiang ho hi kan pawm a ngai. Kan intluk tlang vek a, in en hrang tur kan awm lo,” tiin, heng Captain-te hian LGBT Flag hmangin ‘anpui kawp chingte’ chu an au chhuahpui ta a ni.

Zawhna:
Anpui kawp chingte hi kan pawm lo nge, anmahni zawk hian leilung dan an pawm lo? He thil hi keini hnawl chawp mai mai nge, Pathian min siam dan hian a hnawl sa?