RANTI MARTINS

Indian football chanchina foreigner tha ber zinga mi Ranti Martins chuan football a chawlhsan niin phai lam media thenkhatin an tarlang.
 
Kum 33 a upa Nigerian striker hian NFL/I-League ah goal 214 thunin goal thun tam ber a ni a, I-League ah hian vawi 7 top scorer ni tawhin club hrang hrang pathum – Dempo (4), Prayag United leh East Bengal (2) atang tein top scorer a ni thei a ni.
 
Kum 2004 – 2012 chhung khan khatih laia club tha Dempo tan khelin a vanglai hun a hmang a, 2011/12 I-League ah khan game 26 – ah goal 32 thunin season khata goal thun tam ber record a siam chu vawiin thlengin khum a la ni lo. India rama a khelh chhung hian game 213 – ah goal 198 a thun.
 
Dempo tan hian NFL/I-League nomawi vawi 5 chawiin Federation Cup (2004) leh Durand Cup (2008) a chawi pui bakah 2008 AFC Cup – ah khan goal 8 thunin Dempo chu semi-final a luhpui a, Indian club zinga hetiang dinhmun thleng thei hmasa ber an ni.
 
Prayag United, Rangdajied United leh East Bengal tan pawh record tha tak hnutchhiahin Prayag tan hian game 44 ah goal 31 a thun a, Rangdajied tan game 8 – ah goal 8 thunin East Bengal tan vawi 39 inlanah goal 32 a thun a, kum 2016 khan Malaysia club Penang a zawm ta a ni.
 
I-League Best Player, Best Forward leh Foreigner of the Year lawmman lo dawng tawh Martins hian I-League ah mimal record a hnutchhiah nual a, game khata goal thun tam ber (7 goals) te, season khata goal thun tam ber (32 goals) leh I-League – a goal thun tam ber (214 goals) te an ni a. East Bengal – a zawm hnu hian a club hlui Dempo 5-1 a an sawp tumin goal 5 a thun bawk.
 
American Soccer League side Maryland SGFC Eagles tana a hun tawp hmangtu Martins hian hliam dam hleithei lo a nei niin sawi a ni a, real estate sumdawnna lam luhchilh a tum niin sawi a ni bawk.