Tottenham leh Real Madird te Luka Modric an indawrna chungchangah an in rem siam thei ta a, Modric chu Real Midfielder a ni dawn ta. Real in an lei chuahna man hi 30 ml pound vel a nih rin a ni. He Croatian International, kum 26 mi hian vawiin ah medical ti tur in Real a pan ta a ni.

Tottenham chairman Daniel Levy chuan Modric an chhuah dan chungchang ah ” Modric hi player tha tak a ni a, kan zing a tel a tum tak loh hnuah Real Madrid nen kan in dawr fel thei hi a lawmawm a, an ni club hi hun rei tak a ta inthiantha kan ni” a ti. Modric hian 2008 ah Dinomo Zagreb atangin Tottenham 15.6 ml pound in a zawm a, Real ah a man let vel in an hralh leh dawn ta a ni.Tottenham ah match 150 chuang khel hman in goal 17 lai a thun hman a ni.Modric hi Tottenham ah luh tirh in defensive midfielder a ni thin a, Harry Redknapp in Tottenham a enkawl hnu ah tawlh hma hret in attacking midfielder zawk ah a khel chho a, Tottenham player pawimawh ber zing a mi a ni chho ta a ni.

Real Madrid ah Champions League khel tur a inbuatsaih Modric hi a class san zia chu kan hre theuh awm e. Real ah pawh starting eleven a chan ngei pawh a rinawm a, chutih rual in Real Midfielder te dinhmun a sawhnghin a rinawm hle. Real ah hian Kaka, Khedira, Alonso, Di Maria, Grenero, Ozil leh Diara te an awm a, han en mai pawh hian player tha tak tak vek an ni awm e, Nuri Sahin phei chuan khelhna hmun a chan loh avangin transfer request a dil a, loan in Liverpool lamah an chhuah a nih kha. Modric tan competition a sang viau dawn rual in Modric luh avanga khelhna changlo an awm ngei a rinawm, player hming lar ber Kaka phei chu Man Utd lam in an rim ni awm te pawh in a lang mek a, engtin chiah nge Modric hian Real midfield a sawi ang tih hi ngaituah tham tak a ni. Chutih laiin a kalsan tak Tottenham in season bul an tan thalo nghal a, aiawh a an lei Gulfi Sigurdsson chuan a hmun a la awh zo lo hle a tih theih awm e.