REAL MADRID IN ATLETICO MADRID AN KHAWIH HNANG – Lawmkima Hmar

Real Madrid 3-0 Atletico Madrid 
Ronaldo 10′, 72′, 85′
.
Thawhleh zana UEFA Champions League khelhah Real Madrid chuan Madrid club an elpui Atletico Madrid chu Cristiano Ronaldo hat-trick siam hmangin Santiago Bernabeu-ah an lo tuk zal.
.
Game tang et awt tak, menrei man awm takah hian mualneitu Real Madrid hian La Liga lama hneh an harsat thin Atletico Madrid chu Champions League-ah erawh hneh an harsat lo tih entirin inkhel pum an thunun zawk.
.
Minute 10 a liam fel awrh tihin Ronaldo chuan Casemiro cross ball chu sang taka zuangin a tauh goal. A vengtu Atletico Madrid defender ten an va khan lo teh lul em!
.
Atletico in an ai phurh sût tumin bei thin mah se, an hmatawng Gameiro hmu tur a awm meuh lova, Carassco leh Saul Niguez ten an hna hlen zo lovin Antoine Griezmann erawh kan hmu zeuh zeuh.
.
Goal dang a luh belh lawk loh hnu second half hun chawhnu lamah Atletico defender talbuai nangchingin box chhung atangin kawh zetin a hlap goal leh.
.
A duh tawk dawn emaw tih hnu minute 85-naah dinglam sir atanga tlu chunga Lucas Vasquez cross ball chu lei hrulah a ke dinglam bawkin a thun leh. He goal hi Champions League final hruai thlengtu, Atletico tan erawh an zinkawng tawpna entirtu a tih ngam.

Heti hian Champions League semi-final bikah goal 13 thun tawhin Champions League semi-final a goal thun tam ber, goal 11 thuntu Real Madrid hranghlui Alfredo Di Stefano mel lung lo phun tawh chu a lehpel ta chiah.
.
Tin, Champions League-ah goal 103 thun tawhin he competition a Atletico Madrid goal thun belhkhawm aiin goal 3 in a tam zawk.
.
Hei mai hi a la ni lo, Ronaldo hian an mualah Champions League goal 54 thun tawhin mahni muala goal thun tam ber record hun rei tak chhung Messi-a’n a lo kawl tawh chu a thaichhiat sak ta bawk.
.
Season khat Champions League KO round-a a zawna hat-trick siam thei hmasa ber a niin defence nei tha Bayern Munich leh Atletico Madrid laka a zawna goal 3 ve ve thun hi thil awlai a ni lo. Hei bakah 2012-13 season a Robert Lewandowski hnu lama Champions League semi-final a hat-trick siam thei awm chhun a ni rih bawk!
.
Tun tum hi Champions League bika a hat-trick siam vawi 7-na niin a career a hat-trick a siam vawi 47-na a ni tawh maw le!!
.
Madrid derby-ah goal 21 thun tawhin goal thun tam ber a ni mek a, Real Madrid tan hian Champions League-ah vawi 86 a inlan atangin goal 88 a thun tawh a, assist 23 a nei tawh bawk. A va namai lo em!

Ronaldo zawng, a thlen chin apiang hi record a ni a, a rah chin a piang a ram a ni zel rih dawn a nih hi!