REAL MADRID IN CHAMPIONS LEAGUE FINAL AN INPET KAI – Lawmkima Hmar

Atletico Madrid 2-1 Real Madrid FT
Saul Niguez 12′ Griezmann 16′ – Isco 42′

Agg : Atletico Madrid 2-4 Real Madrid
.
Atletico Madrid chuan first leg-a an chan chhiatzia hre reng mah se, tih theih loh a awm lo tih rilru puin an mikhualte an lo dawng sawng a, first leg-a goal zawna pet miah lo khan minute 4 chhungin goal 2 an thun.
.
Atletico in first half-ah an tana sahar Ronaldo an dah that theih avangin thlamuang takin hmalam an nawr thei a, minute 12-naah near post a ding Saul chuan corner atangin a tauh lut.
.
A vanglai a pelh tawh hnu pawha a tlan chakna la chhawr tak Fernando Torres chuan penalty hlawhchhuakin French forward Griezmann chuan goal-ah a chantir a, Real Madrid nihrual turin goal khat chiah an mamawh ta.
.
Mahse, sa huai hlira khat Madrid squad-ah danglamna thlen thei an tam. Benzema chuan veilam sir a ball la lutin Atletico defender 3 venna kar atanga la chhuakin goal a thawkchhuak a, a tawp khartu erawh Isco a ni thung.
.
He goal hian Atletico hmabak a ti ko zual a, tlang tur chuan minute 45 chhungin goal 3 an thun a ngai. An goal mamawh hriain thunbelh tumin bei thin mah se Real Madrid in mawl duh lova an goal venhim an ngaih pawimawh avangin goal dang a lut zui lova, Galaticos hian final an lut ta a ni.
.
Tihian Real Madrid chu European Cup/Champions League final lut zing ber niin vawi 15 an lut ta. An hnuaiah AC Milan (11) Bayern Munich (10) Juventus (9) leh Barcelona (8) te an awm. Tin, season 4 liam ta chhung a final vawi 3 an luhna a ni ta bawk.
.
June 3, 2017 hian Wales khawpui Cardiff; Madrid atanga mel 765 a hla, Turin atanga mel 666 a hlaah final khelh a ni dawn a, tu tak dingchang ang maw?

Posted in Rampawn, Real Madrid.

Leave a Reply

Or