Joint YMA field, Vaivakawn a khelh a ni a. Dinthar Veng thenawm lawk anih piah lamah fans nei tha veng an lo ni bawk nen. An tumpui Republic pawh entu nei tha veng tho anni. Team tha pahnih annih bawk avangin inkhel en an tam ngei mai. Tun Red Ribbon a inkhel entu tam ber anni ngei ang.

First half chu inkhel hmuhnawm han tih tur a ni lova, Republic Veng in cross bar an pet per chu goal hlauawm deuh a ni thei mai awm e. Second half ah erawh a dang ta zar mai, Dinthar in attacking football hmuhnawm tak an khel a, cross bar chu goal ni ta se chuan goal 6 vel chu an thun ngei ang, mahse goal an thun thei tlat lo. An attack nasat avangin an defence an hlamchhiah deuh a, minute 75 ah Vanlalawmpuia’n (Cte-a) a petgoal a. Dinthar in attack nasa zual sauh a, fans an tang bawk a. Minute 87 ah buai nuaih nuaih karah Denghmingthanga’n Dinthar tan a sut a. Inkhel tih tawp zui a ni.

Republic Veng in an tihgoal khan lawm avangin fans thenkhat an tlan lut a, buaina erawh a awm lo. Dinthar fans an tam si a, finalist tan chakloh a hreawm, fans hovin chakloh an duhloh. Republic Veng Keeper inhliam chu Dinthar fans in time delay ah ngai khawih an tum a. Mahse an khawih hmanlo niin a lang. Dinthar in minute 87 ah an petgoal ta a, fans ho lawm avangin field ah an tlan lut a, tlan lut zingah zurui tlem a zawng an awm avangin an tihloh tur an va ti ta a. Keeper leh players lo va khawih tawk te an awm tak avangin Republic Veng players ten venhimna a that bawk si loh avangin inkhelh chunzawm an duh ta lo a ni.

Tun tournament ah hian MFA rules hman a ni a. Chutah chuan buaina siam hmasa zawk chu chaklo zawka puan tur a ni. Chutia nih chuan Dinthar chu chaklo zawk a puan tur a ni.

An la khelh bak minute thum chu Ramhlun Sports Complex ah ni 23 February zingkar ah khelh zawh tur a ni. Chutah chuan inkhel entu awm phal a ni lovang.

Organiser te an demawm, an thuthlukna avanga dem ni lovin. Venhimna tha lo avang hian an demawm. Thil thleng tur an hmu phalo hi an demawm. Amaherawhchu buaina lian tham a chhuak lova, inkhel dangah erawh venhimna ti tha tawh se, a lawmawm ngawt ang.

Dik thawkhat tho mai, Republic Veng an khawihlai evidence a awm tlat lova. Chumai bakah mi pali panga vel vangin Dinthar hi chaklo ta se, buaina nasa zawk a thleng thei tlat.