Tlai dar khat anih meuh chuan Lammual ah mipui a thu khat leh hmur tawh a, College Veng fans chu chhim lampang ah awmin Durtlang fans te hmar lamah an awm thung. Neutral fans awmna tlang lamah pawn Durtlang tan tu an tam ngei mai. Tantu ngah zawk Durtlang an an khel tha nghal hle a, tan atanga rei lo te ah chance nei nghal in an vanduai hlauh a, College Veng lam pawh an tang thei khawp mai, first half ah hian game hmuhnawm tak an khel a ni. Second half ah erawh team chhe zawk a ngaih College Veng in draw an tum tih a hriat a, Durtlang tan Man of the Match M.S Tluanga khel a hmuhnawm ngei mai. Durtlang lamin han nawr tum viau mahse College Veng lam an lo tan ve tlat avangin goal awmlo in an in draw ta a. Penalty a vawi thum lai lo chak tawh College Veng fans leh players te an lawm a, amaherawhchu vanneihna pawh hian chintawk a lo nei zel e. An senior player Zomawia’n sudden death ah penalty a missed avangin an tla ta a ni. Man of the Match M.S Tluanga hi tun tournament a Best Player anih beisei awm ber pawl a ni.

Salem Veng 2-2 Kolasib Vengthar (7-6 on penalties)

Kolasib an vanduai ngei mai. Zofooty lamin Salem Veng chak zawk turin ring mah ila an han inkhel meuh chuan kan ring sual ngei dawn anih hi kan han ti hman a. Kolasib lamin 2-0 in hma an hruai a, chumai nilovin penalty ngei ngei tura ngaih referee in a pe lo bawk nen, vanduai a kaltluang hle. Salem tan an midfielder rinrawl Jerry an a rawn thun hnu ah George an rawn thun lehin an rawn nih rual a. Penalty ah an vanneih ta zawk ta a ni. Penalty ah erawh Salem Veng an chungnung deuh zawk a, pet hmasa zawk Kolasib tan Lammual pressure chu a sang mah mah a ni. Salem Veng chak mahse Kolasib Vengthar ui pui tu an tam ngei ang.