Red Ribbon Football Tournament kharna (final) tura Durtlang leh Chanmari intum tur a nghahhlelhawm a. Hetiang baka final duhthusam hi a awm thei chuang lovang.
Fans Vs Fans

Durtlang in fans an nei tha a, an zai ri hriat a chakawm tawh a, chubakah fans te inthuamna (costume) pawh hmuh a chakawm tawh. Lammual tlâng lam chu a sen thup turah ngai ang. Chanmari lam pawh fans lamah chuan an theuneu lo khawp mai, an tam hrim hrim bakah sound system an la nei cheu. Chanmari anthem bakah an track thar te nen lammual an sawi nghing dawn. Hei hi Durtlang fans ten an chhang let thei angem le?

Team Vs Team
Player an neih ṭhat zia chu kan sawi ngun tawh, tunah chuan an team dinhmun hi i’n bihchiang zawk teh ang. Durtlang lamin an defender Mamawia (Hruaia) inhliam vangin an chhawr theih a rinawm loh a, mahse an Captain Ruata erawh a ke ruh a khi emaw tih hnuin a ulh a ni tih hriat a ni a. Ani hi chu khel thei tura ngaih a ni.
Chanmari lamin Durtlang player tha Francis-a an nei a, he midfielder tha zet hi Semi Final 2nd leg khan warm up naah a ke a tih ulh avangin a khel thei lova, mahse final-ah chuan khel thei tura ngaih a ni. Hetihlai hian an player pawimawh Zemabawk atanga an lak Mahuma chu discipline that tawk loh vangin SemiFinal khan hrem a ni a, tunah hian an hrem chhunzawm dawn em tih hriat a la ni lo.

DEFENDER
Hruaia Vs I-tana

Durtlang lam tan experience player leh Asst. Captain ni bawk Hruaia defence lamah pawimawh leh dawn a. Ani tel lo chuan Durtlang defence hi a tha lo tih ngam a ni, mahse a kaihhruaina hnuaiah chuan defence tha ber te zing ami an ni thung. A tlan chak mai bakah a san that avanga boruak lama ball a chan theihna te hi Durtlang tan chuan inghahna tlak ava ni tak em.

I-tana erawh Hruaia ang em em in a pawimawh lova, mahse Hruaia aia a chhiatna a awm chuang lo. Chanmari lam hi team balance a that avangin I-tana tel loh lai pawhin goal an chhuah lova, Itana awm hnuah pawh an lamah a la goal chuang lo. Mahse I-tana awm hnuah chuan boruak lamah an ngaihtuahawm lo deuh. I-tana experience hi goal la chhuahlo Chanmari tan hian ava hlu dawn em.

MIDFIELDER (WINGER)
Zoramthara Vs Danmawia

Zoramthara hi lian lo mahse a tlanchakna leh a goal thun theihna avang hian dahhniam chi a ni lova, Round of 16 atangin goal 9 a thun tawh a, match tinah goal a thun bakah hattrick vawi hnih a siam tawh nghe nghe. Chanmari team hian tournament tan hmain lak an lo tum tawh a, mahse engemaw harsatna vangin an la ta lo. Final ah Chanmari inchhir ngawih ngawihna tur khawpin a khel thei angem?

Danmawia hi Northeast Games a Mizoram team a tel a ni a, first eleven ah khel tam lo mahse goal 5 lai a thun tawh a, Aizawl Venglai nen 2nd Leg an khelh tih lovah kha chuan goal a thun vek a ni. Ani pawh hi a palian lo a, mahse a tlan chak em em thung. National U-16 Tournament a Captain na hnuaia Mizoram lo Champion pui tawh leh nikum lama Durtlang pawh Red Ribbon-ah a lo Champion pui tawh atang hian a that dan tur chu a hriatthiam theih ang a, Durtlang pawn an la leh lo hi an ui ngei a rinawm.

STRIKER
MC-a Vs Zico

MC-a hian Round of 16 atangin goal li a thun tawh a, mahse kan hriat tur chu Round of 16-a an match hmasa berah Republic Veng lamah goal hnih a score a, khami hnu khan TATA Academy a, a trial tak avangin SemiFinal atang chauhin a rawn khel leh a, Tuidam nen an inkhelh tumin goal hnih a thun leh a, minute 67 naah inhliam vanga thlak a la ni zui. Semi Final 2nd leg a khel lo bawk. Goal per minute-ah chuan he striker goal thun thei tak hi a tha ber mai awm e. Chuvang chuan final ah pawh hian a lut anih chuan Chanmari Goal Virgin ah hian a thun theih a rinawm.

Zico erawh hi chu Round of 16 atang chauhin Chanmari tan a rawn khel tan a, mahse hemi hnu hi chuan match tinah a khel thung. Match 5-ah goal hnih chauh thun mahse a thiamna nep chuang lova, Chanmari game ti nung tu te zing ami a ni. MC-a ang lo takin experience a lo neih that tawh avangin Final-ah pawh hian a hlauhawm zawk ngei a rinawm. Zico hian final-ah hian goal a thun loh anih pawhin a thawhrah sengin a thianten goal an thun ngei a rinawm.