Central YMA chuan kum engemaw zat chhung chu football tournament, Mizorama football intihsiakna lian ber a lo buatsaih tawh thin a, nimahsela buaina nasa tak a thlen fo avangin tha lo tiin a lo titawp tawh a. Tunah, MFA leh MSACS tangkawp chuan Mizorama football intihsiakna ropui ber an buatsaih leh mek a, a hlawhtling thawkhat viau niin a lang. Kumin hi a vawi 3na a ni. He tournament thil tum chu football tihhmasawn leh thalaite HIV/AIDS laka fihlim tura zirtirna pek hi a ni. He tournament chungchanga ka sawi duh te:

SECHAL A TEL TAWH LO
He tournament-a champion lawmman atana pawisa fai nuai chuang teh meuh an siam avang khan veng/khua hrang hrang ten beih tlak niin an hria a, chumi belhchhah tura sechal an han telh leh zel hian a tihlu viau nia ngaih a ni. Vawi hnih kha chu pawisa fai bakah sechal an han telh a, nimahsela ranvulh leh nungchate khawngaih kawnga harh chak tak Zofate zingah hian sial telh tha ti lo kan tam em em mai a, duh loh avanga au thawm pawh a ring hle a nih kha. Pu Zairema’ kawlhawk (Zika) kahhlum a nih avanga music video ropui tak kan siam te, ram tinuamtu hauhuk kahhlum khawngaih avanga lumenpui te, pipute tih anga kut nia sechhun rawtna siam a nih ruala sial aiin min chhun zawk mai r’u ti ngam kan awm te, sakah duh tawh lo-a silai tung (surrender) te leh kan ranvulh duat em em mai ui te tana intihhlimna leh intihsiakna ropui tak ‘ Dog Show ’ kan buatsaihsak bakah na tuar rei hman lo tura ran talhna khawl kan nei ve ta te hian nungcha leh ranvulhte laka kan ngilneihzia a tilang chiang hle a, lawmawm hle mai. He hmasawnna hriain buatsaihtute paw’n lawmman atan sial an telh tawh lo a, an fakawm hle. Hei hian an rilru zauzia a tichiang hle. Lawmman atana sechal an telh tawh loh avangin he intihsiakna hi a nep phah chuang hauh lo a, khua/veng 222 lai an tel a ni.

PLAYER THLAN DAN
He tournament ropui taka champion kan duh theuh avangin player pawh kan duhtui hlawm hle a, hun leh sum sen pawh kan inhuam a, veng/khua thenkhat phei chuan sum tam tak sengin veng dang/state dang mite an chhawr hial a ni awm e. Football hian hma a sawn phah ngei ang. Hemi kawngah hian rilru kan tizau dawn nge kan tizim zawk dawn tih erawh hriatthiam a har khawp mai. Mahni veng tan theuh khel thei ilang chuan a hlu leh zualin a rinawm midang lak ai chuan. Tin, player tha sum sing tam tak hlawh tura kan ruai dawn a nih paw’n kan chhawr zel theih tur leh hnam tihmingtha thei tur Mizo ngei ni thei se. Thenawm state-a mite pawh Mizo ve tho, zo hnahthlak ve tho an nia kan ti a nih erawh chuan thu hran ni se. Mizote hi induhsak ila ka tihna mai a nia.

A FAIR LO, BUAINA…
Football-a buaina chhuah fo chhan hi supporter-te vanga thleng awm zeuh zeuh mah se a tlangpuiin match official te thutlukna siam vang hi a ni. Mizorama kan buai fona chhan ber chu referee tha leh huaisen tak kan la neih loh vang hi a ni. Match official te hian security an nei tha tawk lo bawk. Tin, professional rilru hi players ho bakah official te pawn kan la nei hlawm lo a, duhsak bik leh duhsak loh bik kan la nei hlawm niin a lang. Nikuma buaina chhuak inang rau rauah pawh a then disqualified-a a then disqualified loh te pawh a awm a, hetiang buainate hi uluk taka chinfel thin ni se a tha ngawt ang. A nih loh chuan kan thil tum thelhin inhmelmakna kan petchhuak palh ang tih a hlauhawm. Kan changkang hlawm tawh a, mahni veng inkhel video-a lo capture tawk te pawh kan awm thin avangin fimkhur a ngai hle. Player leh fans zawng zawngte hian match official te hi an thiam emaw thiam lo emaw an tello-a inkhel thei lo kan nih avangin zah thiam ang u. Hei hian hnam changkang, ‘house of football’ a chengte tihawm reng a nihzia a lantir ang a, state dang mite pawn min ngaisang ang. Hun, tha leh sum tam tak senga inbuatsaih vek kan nih hlawm avangin inkhel kan enkawl dan leh buaina kan chinfel dan kawngah kan fimkhur viau a tha ang.

Red Ribbon Football Tournament 2012 tluang taka khelh zawh a nih theih nan duhsakna ka hlan mawlh mawlh e.

(He article hi Vanglaini ni 5th March, 2012 chhuakah khan tarlan a ni a, a ziaktu Miltona, Vaivakawn phalna thlapin kan rawn tichhuak e. A soft copy nen thlapa min petu a ziaktu Milton-a chhungah lawmthu kan sawi e. – ZoFooty Admin)