Zan dar 6 ah Power Department leh Aizawl Football Club inkhel a awm ve bawk avangin, zan dar 7 anih meuh chuan lammual ah mi an tam tawh ngei mai. Dar 8 inkhel tur mah nise, mipuiin thutna chan loh hlauvin an kal hma hlawm hle. Ticket la tur leh gate a lut tur ringawt pawn in tlar fe a ngai reng a ni.

Ticket free na hmun bridge pawh an khat thap tawh hnu chuan, tlang lam pawh an khat thap mai. Chutah Dinthar fans an rawn lang tan a, sound box nen an rawn ni rup mai, boruak a sang nghal ngei e, mipui an pungkhawm tam tial tial a. Dinthar fans te khuang nen an rawn lang leh a, hetiang ang reng reng a fans tha hi Mizoram ah hmuh tur an vang ngei ang.

Inkhelh hma in coach ve ve te an kawm a, Lunglei lam Coach chuan Semi final an thleng phak a rinloh thu a sawi rualin, an inbuatsaihna erawh a tha ber te zinga ami anih tur thu a sawi a. Chutih laiin Dinthar Coach erawh chuan Champion ngei a inrin thu sawiin an mahni puitu khawtlang hruaitu te hnehah lawmthu a sawi bawk.

Players an lo lut a, Dinthar fans te au thawm chu lammual kil tin atang chuan a hriat a. Inkhel an tan chiah tihin Dinthar players ten thawm an rawn nei lian ve leh nghal a. Lunglei lam chu an nawr nghal siah siah mai a, petgoal na chance pawh an ngah nghal hle. Chance ngah na na chuan an pet goal ta nge nge a, goal hmasa ber thuntu hi Samuel-a a ni. Hemi hnu reilo te ah Denghmingthanga’n a petgoal leh a, chance pawh an neih belh zel bawk a. Dinthar keeper erawh a awl hle, tan atanga minute 30 chhung ngawt chu ball nung lai a khawihlo.

Defender tihsual nangchingin Samuel an a ti goal leh a, Lunglei in ball an thah leh chiah chuan Dinthar Striker Denghmingthanga rawn in lar in Lunglei player hneh atangin ball chhuh sakin tun tournament a goal pui ber??? chu centre bul atang chuan a thun ta a. Mipui in mak anti a ni ngei ang, thawm beisei angin a ring lova mahse a zawi chuang hek lo. First half chhung zawng hian Lunglei Captain Tetea Tlau chu a inti bo emaw tih mai turin hmuh tur avang hle. Dinthar game erawh a tha thlawt e mahse hun tawp hma deuhin Rinkima’n referee a nem avangin red card a hmu a. First half chu a tawp zui nghal bawk.

Second half ah 10 a khel Dinthar in Chhuanzika hmangin goal an thun leh a, Lunglei Ramthar tan beisei a bo tan tawh khawp mai. Mahse hmingchhe taka hawng an tumlo, hun tawp dawnah KC-a goal rawn thunin, hun pek belhah Tetea Fanai in a rawn thun leh bawk. Inkhel laia assistant referee lunga an vawm avangin game reilote a khaihlak avangin hun pek belh pawh a rei deuh a, minute 97 Lunglei Ramthar chuan chance tha tak an nei leh a, mahse goal ah an chantir thei ta lo a. Minute 100na ah hun tawpin Dinthar chuan a kum zawnin Red Ribbon Inter Village Football Tournament ah final an lut ta a ni.