Referee chungchang hi engtin nge ni ang?

Estimated read time 4 min read

Mizoram Premier League Season 5 khelh mekah referee thutlukna dik tawk loa ngaih theih avangin inkhel result a danglam niin tualchhung football ngainatu tam takin an ngai. Hemi chungchang hi MPL commentator hriat hlawh Johny Hmar pawhin a vei tih thu ziak hmangin a rawn thai lang a, hmasawnna theih dan tur a ziak lang bawk.

He thu hi Facebook group ‘Mizoram Premier League (MPL) Sawihona’ atanga lakchhawn a ni a, Johny ngaihdan hi chhiar la, comment lamah i ngaihdan sawi zui ve rawh le.

Referee chunchang hi engtin nge ni ang?
– Johny Hmar

Hmasawnna

MPL Season 5 kan khel mek a, season hmasa ber atangin buaina leh harsatna hrang hrang kan lo paltlang tlang tawh a, hma pawh kawng hrang hrangah kan sawn chho zel. A entu (neutral) lam te, fans lam te, player leh coaching Staff te pawhin hma an sawn zel a, physio pangngai neih kawngah te pawh club-ten hma an sawn nasa hle, a lawm awm.

Zonet Cable TV lam pawhin tun aia fiah zawk leh en nuam zawk a pekchhuah theih dan tur an dap mek bawk a nih hmel a, TV lam atang a lo thlir thintu tan pawh thu lawmawm a ni. Mahse neihsa nei lo a kal chho an nih avangin hma erawh an la chak tawk lo a, duhkhawp lohna a la tam, nghak leh hret i la, ziaawm leh zual turah ngai phawt ang.

Buaina ngai
Hman atanga vawiin thleng a kan buaina chu ‘match official’ te a ni. Referee-in min tan lo, an ham lai lo, lehlam pawl a tan bik, Offside leh side lo, penalty min pe ve duh lo, ho lutukah penalty an pe bik, a tlan that chhia, a positioning a dik lo…. a va tam em!

MFA lamin an hrem ngam lo, suspend ve sela, referee chah chhuak ve rawh se tiin lungawi lote an au chhuak a, thurawn pawh kan nei tha thin khawp mai. Thuneitute lam pawh an lu a hai ve viau thin ang. Referee tha chu an duhve tho kan ring deuh a!

Ni e, kan match official te hian tih dik loh leh tihsual palh te, inthlahdah avang a tihsual ve hrim hrim te pawh an nei zauh zauh thin a, a tuartu tan chuan a na a ni. Kan sawi zawng zawngah hian an tisual vek kher lo thei a, tihsual pawh an ngah tih erawh zep thu a cheng lo.

MFA lam hian han hrem vak dawn se, referee hi kan ngah tawk si lo, kan neih that ve ber ber te an ni ve bawk si. Anni lah match hnih khat bak tha takin an ham tluan hleithei lo emaw tih tur an lo ni bawk si nen, sawisel bak tih theih nei si lo tan a buaithlak duh khawp mai. Kan match official-te chunga lungawi loh avanga midang dem palh leh an hmasawn loh avanga midang puh pawh a awm thei dawn tlat.
Heti hian ti ila
Hetia kan lungawi lohna te sawi a duh tawk ngah mai loin, kum lama naupang zawk, rilru chak leh football ngainatute hian referee lam hi luhchilh ta ila. Kan zirlai/eizawnna ti buai si loin tih dan a awm ka ring.

Referee tha kan duh a, tun a miten kan duhthu an sam lo. Mahse tumah referee lam luhchilh duh kan awm si loh chuan awm hmunah kan phun kan phun lo thei lo. Au au in sawi sawi mah ila kan au chhuak har ang tih a hlauhawm.

Tuna mite hi chuan an nih tur ang an ni zo tawh a, tun aia hma han sawn leh chu a har mai thei. An tlem avangin han hrem vak dawnin a buaithlak ve thei si a, chuvang chuan referee te hi ngah ta deuh ila, a tisual chiang chu hrem hmak hmak thei tur leh anmahni zingah pawh inelna tha a awm ang. An tan leh zual theihna turin thalai, football ngainatu leh hmangaihtute hian kan tlakchham referee tha ni tur hian han luhchilh teh u. Hnam dang Referee chahchhuah ngawt ai chuan kan tangkaipui zawk ka ring a, kan ti deuh duah a ni e.

You May Also Like

More From Author

2Comments

Add yours

+ Leave a Comment