Mizoram Football Association (MFA) chuan vawiin ni 24 March 2012 (Inrinni), tlai khan Red Ribbon khelh tur hmabak atana referee ten tha zawka an ham theihnan Referee Seminar neih a ni. He hunah hian MFA Senior Vice President PC Vanlalhruaia, Finance Secretary leh Referee Board Chairman ni bawk Lalruatsanga Tochhawng, Executive Committee Member leh Red Ribbon Round of 16 a Match Commissioner tur Laltanpuia Hnamte leh Honorary Secretary Lalnghinglova Hmar ten thu an sawi bakah ngaihdan sawi khawmna neih a ni.

Referee te hi Red Ribbon leh North East Games an ham avangin an fitness pawh a tha hlawm hle a. Hemi anih avang hian he hunah hian hun vawng dik, dik taka ham leh zahawm taka khawsak chu an thupui ber a ni a. Hei bakah hian tun tournament kal tawh a, an tihsual awmte chu ennawn niin tihsualna ngaiah hian tihsual nawn an tum tawh lo a. Village Council/Local Council Team tel ten pawisa tam tak an seng bakah Champion turin theihtawp an chhuah a, chuvang chuan team te thawrimna leh pawisa seng hi referee tihsual vanga tih thlawn tir an tum lo hle a ni.

MFA hruaitute chuan referee te chu a hunah chuan yellow card leh red card pawh ren lo turin an hrilh bakah an thiltih avanga thinrim an awm a, an khawih anih chuan khawih let ve lo turin an hrilh a. Mahse anmahni khawihtu player emaw team emaw chu na taka hrem an tiam thung a ni.

He Seminar atang hian MFA lamin Referee hmasawnna atan theihtawp an chhuah tih a lang a, referee lam pawn anti mai mai lo tih a lang bawk. Inpuahchahna a tha a, mahse referee hi mihring ve mai an ni tih erawh kan hriat a tha. Mipui lam pawhin an hriat tur chu referee in a lo tihsual palh a, kan lungngawilo anih chuan Match Commissioner hnenah kan lawmlohna kan thlen mai a tha a. Buaina siam avangin kan chak phah dawn lova, referee (mihring ve tho) kha rilru hreawm leh thlabar in kan siam dawn tihna a ni.

Pic: Referee leh Red Ribbon a Match Commissioner tur Pu Laltanpuia Hnamte (Pu Pate-a)
Standing (L-R): James C. Lalnuntluanga, Rothangliana, Joel, Lalremtluanga, Vanlalhruaia, Jonathan Lalngaihawma, Lalramhluna, C. Lalrintluanga, C. Lalmuankima.
Sitting (L-R) : Lalhlimpuia, Lalrawngbawla, F. Zohmingliani, Laltanpuia Hnamte (Match Commissioner), Biakhlua, M.S. Dawngliana, B. Lalrinkima