Arjen Robben leh Franck Ribery te inkar boruak tha lo avang hian he Dutch International star  nakum a contract zo tur  hian a hmalam hun a ngaihtuah that leh phah mek niin Europe chanchinbu thenkhat chuan an tarlang a ni.

Robben leh Ribery te hian Real Madrid nena UEFA Champions League Semi-final first leg an khelh tum khan free-kick pet tur zawk chungchang dressing room lama an sawidunnaah an inhmuthiamlo a, kut an inthlak hial ta niin an sawi a ni. Sport Bild magazine chuan Ribery hian Robben hi a hmaiah a hnek a ni tiin an sawi a, tin, inkhelh zawh hnu thlalak tarlan ah Robben hi a mit dinglam hnuai a duk a ni.

Bayern Munich lam chuan hetih hunlai hian hemi chungchang thuah hian engmah thuchhuah an siam lo a, an Media Director Markus Horwick chuan,” Dressing room a thil thleng chuan dressing room chhung a pel tur a ni lo.” tiin a sawi a, tin, manager Jupp Heynckes chuan he thil thleng hi thudik nge diklo a nih tih pawh a sawichiang duhlo a ni.

Mahse a karleh Thawhtanni ah Robben hian Kicker magazine chu hrilhin,” Franck khan a thiltih kha a tihloh tur a ni tih a hria a ni. Heng thil thleng hi a mawilo a, a thalo bawk a ni, chuvang chuan thil zawng zawng hi uluk taka ka ngaihtuah chian a ngai a ni.” tiin a sawi a ni.

Ribery leh Robben te hi an inkar siamtha tura koh an nih hnuah Ribery hian ngaihdam dilin Euro 50,000 a club hian an chawi tir bawk a, an inkar boruak pawh a tha tawh nia sawi a ni.  Hemi thil a thlen hnu kartawp inkhelah Werder Bremen nen an inhmachhawnin Ribery hian goal a thun a, a thun zawh hian Robben bulah va tlanin a va chibai nghe nghe a ni.

Mahse hetia an inrem tawh hnuah pawh hian Bayern President Uli Hoeness chuan Robben-a contract thar tura an indawrna chu a tawp rih tih sawiin Allianz Arena a a hma hun tur a chiang ta lo tih a sawi a ni. Hoeness chuan,” Ka hriatchinah chuan a signature chiah a ngai tawh kha a ni a, mahse tunah chuan engkim hi hun danga la tihfel tura sawn hlat a ni.” a ti.

Netherlands International Robben hian tuna a contract ah hian kum khat chiah a nei tawh a, hemi anih chuan season thar tawpah hian man lo in a chhuak thei dawn a ni. Amah chuan hemi chungchangah hian tihian a sawi a,” Tunah chuan thil awmdan kan ngaihchan phawt a, engnge thleng zel kan enchhin phawt a ngai a ni – thil thleng tam tak a awm si a.” a ti. ” Duhthlan tur dang pawh a awm nual a, hei hi thil danglam a ni lo a, club lian ber te zinga mi tana khelh chuan mite hian kan theihna hi an hre tlat a ni.” a ti bawk a ni.