RICHARLISON HRINGNUN ZINKAWNG BUMBOH

Estimated read time 8 min read

Tun season Premier League a team hot tak Everton tan player pawimawh tak mai a ni a, kum 2017 khan kum 20 chauh a upa niin Watford a rawn zawm. He club atang hian Premier League a player langsar zingah a rawn tel chho a. Watford tan season khat a khelh hnuah Everton a zawm a, a ni telin hmalam a pan a ni ber. A khelh dan style leh a theihna te hi han en ila, Premier League player tur dik tak a ni a tih theih ang. A chanchin ka sawi mek, Richarlison de Andrade-a’n Premier League khel tura zinkawng bumboh ve tak mai a rawn zawh dan chanchin chu hei le…

Richarlison de Andrade hi kum 1997 May ni 10 khan Nova Venécia, Espirito Santo, Brazil ah a piang a, a pa hi lung mistiri niin, a nu hian thil tihfai leh ice cream zuarin ei a zawng thin thung.Chhunkaw nuamsa tak atanga seilian a ni lo a, mahse a nu leh pa te hian an kaihruai tha bawk a, a nunah pawh hmuh theihin a awm.

A chawrchhuahna hmunin a zir vak lo nen naupang mai a nih lai atangin sual kawng zawhna hun remchang pawh a ngah ve thin hle a, mahse Richarlison hian a hnar thei zel thung.

“Ka chenna hmunah chuan mi thahnem takin ruihhlo an khawih a, silai lah an leklam nasa. Reh deu dup mahse a hlauhawm thin khawp mai. Vawi tam tak chu Weed zu ve turin min thlem thin a, mahse Pathian zarah ka zu ngai lo. Ka Football School kalna a kan coach te kha police officer te an ni a, ka unaupa nen thu tha tak takin min fuih reng thin.”

Ka thian kawm thin tam tak chu ruihhlo avangin an boral tawh a, thenkhat chu Jail ah an tang. Ka la be pawp reng thin a, an kawng zawh ang ka zawh ve loh avangin ka lawm em em a. Chhia leh tha hriatna ka nei a, ka tih ve a rem lo.”

“Ka awm lohna tur hmunah ka awm avangin vawi tam tak chu ka nunna ka chan teuh thin hle. Tum khat chu ka lu ah pa pakhatin silaiin min tin reng a, a drugs ka ru emaw a tih avangin. Han hmet puak zet se chuan ka zo der a ni mai. Hlau thawng takin ka awm a, mahse ka him thei hram. A silai ken a dah thlak hnu chuan ka tlan chhe nghal a, chu hmunah chuan ka kal leh tawh ngai lo.”

Footballer nih hi ka tum ber a ni a, training naah pawh thahnem ka ngai thin a. Pathian zarah ka duh ka thlang sual lo a, ka awmna hmun tur dik takah min dah a ni.” tiin a sawi.

Professional club a zawm hmasak ber hi Brazillian club América Mineiro a ni a, he club ah hian a hming a chher tan. América Mineiro a zawm hma hian club tam taka trial a nei hman a, mahse a tling zo lo zel. Trial a hlawhchham zat hi a kut zungtang neihin a chhiar sen loh thu a sawi hial. A piancham ah Figueirense in an hnawl zet kha chu hrehawm a ti lehzualin football bansan te a rilruk hman.

Football kha ka bansan hman tep a, mahse ka inti pachang hram hram a. Belo Horizonte ah America MG tan a tawp nan trial hmachhawn turin ka zin. Kal man chauh daih pawisa ka nei a, ka ril a tam em avangin ka haw man tur chu chaw ei nan ka hmang zo a, ka hlawhtlin ngei kha a ngai a ni tawp mai. Khami zing khan theihtawp tak meuh ka chhuah a ka tling ve ta hram e,” tiin a Professional club zawm hmasak ber a a luh dan chanchin a sawi.

América Mineiro tana a trial tum hian boot bun tur a nei lo a, a thianpa boot hawhsakin a vanneihpui hlauh. A thil tawnah a lawm zia thu leh a thianpa chungah a lawm takzet thu CNN Sport’s Amanda Davies bulah a sawi nghe nghe.

America-MG ah hian youth team lamah a che ngap thei hle a, rei lo te ah America-MG senior team ah a lut chho a, mahse harsatna dang a tawk lehzui. “Ka ke ah hliam na tak mai ka tuar a, thla thum lai ka chawlh phah. Kum hrehawm tak a ni, mahse thil tam tak ka zir phah a, a hma aia tha zawk a let turin ka thawkrim zui.” tiin a inhliam lai chanchin a sawi.

Khelmual a rawn rah leh hnuin América Mineiro tan match 24 a khelh ah goal 9 khungin assist 4 a nei a. Brazillian club langsar Fluminense in an lalut hmak. Fluminense ah pawh a nung chhunzawm zel a, match 44 a khelh atangin goal 11 leh assist 7 a nei a, Brazil Under-20 team tana khel turin koh a ni. He club ah hian season hnih chhung tha tak a khelin kum 2017 khan £11.2M sengin Watford in an lalut a,Premier League lamah a hmel kan hmu.

Everton forward hian naupang mai a nihlaiin a nu leh pa te inthenna avangin hun khirh zet mai a tawng a, thuthlukna pawh siam harsa a ti hle, “Ka nu leh pa te an inthen a, ka nu in Nova Venecia lam a pan. Keipawhin truck lir lai chungah chuangin ka zui ve hman tep a, mahse ka zuang thla a, ka pa lam panin ka tlan ta zawk.”

Ka nu kha ka hre chiang a, ka inkhelh leh infiam a remti dawn lo tih. Chuvangin ka pa bulah kum 10 ka nih thlengin ka cheng ve ta a ni. Car silna ah te ka inhlawh ve a, chocolate leh ice cream te ka zuar kual ve thin bawk. A chang chuan ka pu bulah ka thawk ve a, mahse a nuam tehchiam lo.” tiin a dinhmun khirih tak chanchin hi a sawi.

Richarlison hian a pa chu a hlawhtlin theihnan a mi pawimawh tak a nih thu sawi telin, “Ka pa kha local team tan a khel ve thin a, inkhelh a thiamin en turin ka kal ve ziah thin. Goal a khung thei hle a, tum khat chu match khatah goal 7 lai a khung nghe nghe.”

Ni khat chu inah ka awm laiin ka ta tur Football 10 a rawn hawn hem mai a, nitin ball nen chuan shooting ka zir thin. A leina tur a neih avanga rawn hawn a ni lo a, Footballer tha tak ni tura min duh em vang zawk a ni.” tiin a pa nena an chanchin hi a sawi.

Fluminense tana season hnih a khelh hnuah European Football a khelh theihna hun remchang a nei a, Ajax nen inbiakna thui tak an nei hman, mahse Watford FC coach Marco Silva a rawn lang.

“Ajax nen khan engkim mai kha kan ruahman hman a, mahse Marco Silva hnen atangin call ka dawng a. Premier League a khelh hi ka naupanlai atanga ka lo suangtuah thin a nih avangin ka rilru ka thlak, ngaituahna sen nawn pawh a ngai lo.”

Ajax hi club lian tak, Champions League a khel pha an ni a, ka hlawh pawh pawh a tam zawk dawn tih ka hria. Premier League ah hian ding chhuak turin ka rawn kal a ni. Pawisa engzat mahin ka dream hi a ti danglam thei lo ang.” tiin a sawi.

Liverpool leh Watford inkhelh tumin substitute atanga lutin Watford tana a match hmasaber a khel a, chumi hnuah AFC Bournemouth hmachhawn lehin a goal hmasaber khungin Watford player pawimawh a ni chho nghal. Richarlison hian Watford atanga Everton thlenga a zui tak Portuguese coach Marco Silva chu a ngaisangin a zah hle a, a tan chuan a pa ang mai a nih thu a sawi nghe nghe.

Brizillian forward hian a thil tawn tawn mek hi a ngaihluin, a thlen chinah a lawm thiam hle a, “Avaí leh Figueirense in min hnawl a, mahse vawiinah chuan Premier League ah player ropui tak tak te ka hmachhawn thung. Watford tan a Manchester United ka hmachhawn tumin Zlatan Ibrahimovic ka hmu zet kha chu, Hei ngei hi a ni e, naupang suangtuahna a tak ram chang ta chu…’” tiin a hlimzia thu a sawi.

Kum 2018 August thla khan ram tan a khel tura koh a ni a, USA lakah a debut match a khel. Kum khat hnuah chuan Copa America 2019 champion Brazil team ah telin final ah substitute atangin Firmino a thlak a, Brazil chak nemnghehna goal khungin 3-1 in Peru an hneh.

Everton forward hian Brazil player rinrawl nih a, a player duh em em Neymar kiang a khelh chu a tum a nih thu a sawi a. PSG forward nen pawh hian inngaina hle. Richarlison hian a naupan deu laiin Neymar hairstyle en tawnin a lu a meh tir ve thin.

“Ka tleirawl chhuah a ka player duh ber mai a ni a, ka interview na ah pawh a hairstyle anga ka sam ka meh thin thu te ka sawi thin. Brazil national team ka zawm hnuin hemi chungchang hi ka hrilh a, a nui nasa hle a, amah ang player a bul hnai ah an awm ve chu lawmawm a tih thu min hrih zui.”

Khawvel a league lian ber, Premier League a khelh ve hi ka inring ngai lo. He hmun min hruai thlengtu Pathian hnenah lawmthu ka sawi a, zinkawng thui tak zawh tur ka la nei a. Ka kum ala naupangin ka teammate te hnen atangin thil tam tak ka la zir dawn a ni,” tiin a dinhmun tawn mek chungchang a sawi.

– C. Lalrempuia

C Tlanthianghlima

Football tui ve tak

You May Also Like

More From Author