RIO FERDINAND

Tunhma chuan ka nundan leh ka ngaihtuah zawng te kha midang ka hrilh ngai lem lo a, amaherawhchu tunhnai kum tlemte a ka nuna thil thleng hian ka ngaihdan chu min thlaktir a, chuvangin “Thinking Out Loud” lehkhabu hi ka ziak ta a ni.

Hringnuna tluchhe mai tur hian ka inngai ngai lo a, ka khauh ve tawkin ka inhre thin. Kum 15 ka nihin professional footballer ka ni tawh a, kum 20 chuang zet football ka khel. Mite chuan ka rorum a, ka nelawm loh min ti fo thin, mahse engahmah ka ngai lem lo.

Kum 2015 May thla a lo thlen erawh chuan ka khawvel chu a keh chhe ta vek mai. Ka nupui duhtak Rebecca chu hnute cancer vangin a boral a, kan fate pathum hmalam hun chu ka kutah a innghat ta. Ka thinlung hi fei a chhun ang mai hian a na ngawih ngawih a, ka fate’n min mamawhzia pawh ka hai lo.

Football hian hringnunah thil tam tak min zirtir niin ka lo ngai thin a, mahse BBC tana ka nupui ka sun chungchanga documentary kan siam kha chuan khelmual chhunga ka thilzir zawng zawngte khan ka tawrhna a la hen pha lo hle a lo ni. Vawiin thlengin ka chunga thil thleng hi hriatthiam tumin ka la bei fan fan a ni.

Nitin mai hian tute nge an nih pawh ka hriat loh hian an duhtak, an hmangaihte an chan thu hi min hrilh thin a. Kan zavai mai hian kan khawvel hmachhawn mek hi huaisenna thuah thum nen hmachhawn a tul thin.

‘Thinking Out Loud’ hi ka nupui Rebecca-i hla duh ber pawl a ni a, chuvangin a bu hminga sa ka ni. Lu ka sun leh ang tih ka ngaihtuahna sir khatah pawh ka dah ngai loh laiin ka nu duhtak chuan kumin July thla khan cancer natna avang bawkin min boralsan leh a. Kan chhungkaw tan chuan hei aia na hi a awm thei tawh lo. Amaherawhchu he kan chhiat tawhna hi midangte tana malsawmna thlentu a lo ni hlauh a nih chuan kan hreawm tuar te kha a thlawn lo tihna a ni ang.

(Rio Ferdinand a lehkhabu hi kumin October thla hian tlangzarh tum a ni e.)

Posted in Rampawn.

Leave a Reply

Or