(he thuziak hi Ema Dula Ralte ziak, Facebook a Arsenal tantute awmna Gooner’s Inn atanga ka lakchhuah a ni)

May 17, 2004 khan Arsene Wenger chuan Feyenoord atangin Robin van Persie chu £2.75 million in a lei a, Arsenal legend a Dutch pui Dennis Bergkamp thlaktu tur atana a lei niin an sawi a. Winger ni thin chu Wenger chuan Forward ah a chherchhuak a.

Arsenal a a season hmasa ber 2004-05 ah competition hrang hrang ah match 41 khelin goal 10 a khung a, assist vawi 1 a nei bawk a. Season tawp lamah inhliam in a tlakbuak zui nghal a.

2005-06 Season an han tan leh a, season a tan tha hle a. November thla ah Player of the Month lawmman te a la a, chutia a khelh chhoh that mek lai chuan a kezungpui ruh a titliak a, rei tak a chawl leh ta. Heti chung hian competition hrang hrangah match 38 khelin goal 11 a khung a, assist vawi 2 a nei hman bawk a ni.

2006-07 Season chu tha takin a tan leh a, Charlton Athletic lamah goal ropui tak ‘Airborne Volley’ hmangin a khung a, BBC in Goal of the Month – September ah an thlang nghe nghe anih kha. Chutihlai chuan January 21, 2007 ah chuan a ke ding lam ruh a khi leh a, a chawlh leh a ngai ta. Heti chung hian match vawi 31 khel hmanin goal 13 a thun hman a, assist vawi 8 lai a nei hman bawk a ni. Hemi season hian Arsenal top scorer a ni bawk.

Season thar 2007-08 an han tan leh a, Theirry Henry chuan Barcelona lam a pan tak avangin Robin van Persie chu striker rinrawl ber a nih a ngai ta a. Season bul a tan tha in league match hmasa 10 ah goal 7 lai a thun nghal ta mai a. Mahse ram tana a khel tura koh an nih tumin a khup a ti hliam leh a, heta a inhliam hi December ah rawn let leh in a inhliam nawn leh a, January thla chawhnu lam ah a inkhel leh thei chauh a. Heta a rawn let hi inhliam nawn leh in season tluanin inkhel thei lovin a awm ta a ni. Hemi season hian vawi 23 khelin goal 9 a khung a, vawi 5 a thiante khung turin a siam sak a ni.

2008-09 Season a rawn inher chhuak leh a, hemi season zet hi chu a khel tha in Arsenal Player of the Season ah an thlang hial a. Vawi 44 khelin goal 20 lai a khung a, assist vawi 15 lai mai a nei bawk a. Liverpool lama a goal khung BBC Goal of the Month – December ah thlan a ni a, captain Fabregas leh assistant captain Almunia te an inhliam avangin captain armband chu hemi season hian a vawikhat nan a hreng ve a ni. Hemi season hian Arsenal a a luh hnua a vawi hnih nan Arsenal season top scorer a ni leh ta bawk a ni. Hemi season hian inhliam tenau in a nei ve neuh neuh a, league ah pawh match 26 chauh a khel a ni.

2009-10 Season a intan leh a, Arsenal ah kum khat chiah contract a neih tawh avangin Arsenal hotute nen contract thar ziak turin an indawr a, chu an indawrna chu a hlawhtling a, Kum 2013 thleng contract thar chu a ziak ta a. Heta contract thar a ziah tum hian, “KA THINLUNG HI ARSENAL AH A AWM TLAT A, CLUB DANG JERSEY HA TURIN KA INRING PHAL LO,” tiin a sawi nghe nghe. Hemi season pawh hian Emmanuel Adebayor a chhuah avangin Arsenal hmatawngah a tang a, mahse inhliamin a tlakbuak leh ta. Season tluan in match 19 chiah a khel hman a, goal 10 khung hmanin assist vawi 9 a nei hman tho a ni.

2010-11 season chu Jersey No.10 ha in bul a tan a, August 28, 2010 ah Arsenal tana a match 200 na a khel a, mahse hemi match ah hian a kerek tina in rei tak a chawlh leh phah ta a. November 7, 2010 ah a rawn let leh thei chauh a ni. Heta a rawn let hi a che tha hle a, January 1, 2011 leh February 12, 2011 inkar chhungin goal 10 zet a thun hman a, hei hi Premier League record a tling pha hial a ni. February 27, 2011 ah chuan Wembley a an inkhelh tumin a khup a tihnat avangin lakchhuah a ni a, hemi tum hian kar 3 chhung lai a chawl a ni. Hemi season hian away match vawi 9 khelhah a goal a khung vek a, hei hian Premier League record a siam bawk a ni. EA Sports chuan Player of the Month – April ah thlangin Barcelona lama a goal khung chu Arsenal Website chuan Goal of the Season ah a thlang nghe nghe a ni. He season hian match 33 khel in goal 22 a khung a, assist vawi 7 a nei bawk a ni.

2011-12 season alo inherchhuak a, Fabregas in a kalsan tak Captain Armband chu hrengin Arsenal team chu a kaihruai a. Hemi season zet hi chu a khel ropuiin mel lung pawimawh tak tak a phun a a ni. Premier League Top Scorer niin league ah ringawt goal 30 a khung a, league match zawng zawng a khel kim vek bawk a ni. Hemi season hian match 48 lai khelin goal 37 a thun a, assist vawi 15 a nei hman bawk a ni. Season liamta ah hian inhliam avangin match 2/1 bak khelhloh a neilo a ni. Hemi season hi Arsenal-a a luh hnu a tluang taka season a hman zawh hmasak ber a ni bawk.

July 4, 2012 ah chuan Robin van Persie chuan Arsenal ah contract a ziak thar dawnlo tih khawvel hriatah a puang ta rup mai a. Arsenal in contract ziahpui an tum danah a lungawi thei lova, kum 2013 a a contract thi mai tur chu a pawtsei duh ta lo a ni.

Arsenal-a kum 8 a khelh chhung hian season khat (2011-12) chauh inhliamin a tibuai lova, kum 7 vel zet chu Arsenal in a hliam te duat takin an enkawl ti ila kan sawi sual tam pui lovang chu. Hetia season khat tluang taka an khelh chhoh takah chuan a class sanzia kan hmu a, league ah top scorer a rawn ni nghal mai a. Kum 7 chhung zet a hliam te lo tuam dam tu Arsenal chu ‘an tum a sanglo’ tiin a sawisel tan ta!

Tunah hian kum 29 a ni tawh a, chutia contract thar a ziah duhloh takah chuan club hrawl pui pui in lakluh tumin an dawr a. Chung zingah chuan Juventus, Man. Utd leh Man. City te chu a lawk zual te an ni awm e. Tunah tak hian Man. Utd nen an inhnim hnai hle ni a sawi a awm a, chutih rual vek chuan Arsenal in world class player 3 lai mai an han lakluh leh takah chuan Arsenal-a cham a duh leh tawh tia sawi tu an awm nawk bawk. Thudik ber hriat a har ta hle a, Arsenal a chhuahsan mai dawn nge Arsenal ah a khel chhunzawm dawn, i lo thlir ho teh ang!